Malangizo ya Nsonkhano wa Utumiki na moyo wathu Wachikhrisitu

Viri mupepa ya malangizo ino

• Mawu yoyamba 2

• Chuma chogumanika M’mawu ya Mulungu 3-5

  • Nkhani 3

  • Mpfundo zothandiza 4

  • Kuwerenga Baibolo 5

• Kupfunzis mwabuya mu umboni 6-14

  • Ulendo woyamba 7

  • Ulendo wobwereza 8

  • Kupfunzisa wanthu 9

  • Kufotokoza vomwe mukhulupirira 10

  • Nkhani 11

  • Cholinga 12

  • Khaindi ya ulaliki 13

  • Kuphatisa basa mavidiyo na mabukhu 14

• Moyo wathu wachikhrisitu 15-16

  • Pfunziro ya Baibolo ya Mpingo 16

• Mawu yomaliza 17

• Kutembeja na kupereka malangizo 18

• Kusunga nthawe 19

• Wonyan’ganira dera akambazungira Mpingo 20

• Sondo ya nsonkhano wadera panango wachigawo 21

• Sondo yachikumbuso 22

• Wonyan’ganira nsonkhano wa utumiki na moyo wathu wachikhrisitu 23

• Tcheyamani wa nsonkhano wa utumiki na moyo wathu wachikhrisitu 24

• Mulangizi wothandiza 25

• Malo yanango 26

• Mavidiyo 27

1. Malangizo yomwe yali mukabukhu kano, yambathandize aliyese yemwe ali na mbale pa Nsonkhano wa utumiki na moyo wathu wachikhrisitu. Wanthu mwawa afunika kuwona pomwe malangizo yomwe yali mukabukhu ka Nsonkhano wa utumiki na moyo wathu wachikhrisitu pabodzi na malangizo yomwe yali mukabukhu kano akanati kuchita mbali yomwe wapasiwa ku Mpingo. Wofalisa wose afunika kulimbikisiwa kuti anembese na cholinga chakuti ambapasiwe nkhani za opfunzira. Wanthu anango omwe asonkhana na mpingo nthawe zose ndipo atewedza mpfunzo zomwe Baibolo ipfunzisa na mpfundo zachikhrisitu pamoyo wawo, anganembese kuti ambapasiwe nkhani za opfunzira. Wonyan’ganira nsonkhano wa utumiki na moyo wathu wachikhrisitu afunika kukambirana vomwe vifunika kuti munthu anembewe mu shikola na aliyese yemwe ni wofalisalini, koma anachidwi chofuna kunembesa mu shikola ya utumiki ambamuthandize kuwona peno ni woyenerera kunembesa. Vimwevi vifunika kuchitika ali pabodzi na munthu yemwe apfunzira naye Baibolo (panango azibereki wake omwe ni mboni). Vinthu vomwe munthu afunikira kuti ayanmbe kuchita mbali mu shikola ya utumiki, ni volingana na vomwe vifunikira kuti akhale wofalisa wosabatiziwa.—od-CN msolo. 8 ndime. 8.

MAWU YOYAMBA

2. 1 Minutu. Sondo iriyose, patsogolo pa nyimbo yoyamba na pemphero, cheyamani wa nsonkhano wa utumiki na moyo wathu wachikhrisitu ambafotokoze mwachigwato vomwe tipfunzire. Tcheyamani muyo ambatsindike maninge mpfundo zomwe abale na alongo angaphindule nazo maninge.

CHUMA CHOGUMANIKA M’MAWU YA MULUNGU

3. Nkhani: 10 Minutu. Pa kabukhu kansonkhano na moyo wathu wachikhrisitu pambakhele nsolo komasoti mpfundo zikuluzikulu ziwiri panango zitatu. Nkhani mweyi ifunika kuperekewa kwa nkulu panango kwa ntumiki wothandiza woyenerera. Tikambayamba bukhu inyowani ya m’Baibolo, timbanyan’ganire vidiyo. Patsogolo wokamba nkhani ambawonese kubverana komwe kulipo mu vidiyo na msolo womwe uli mukabukhu. Koma afunikapomwe kuwonesesa mpfundo zomwe ziri mukabukhu. Komasoti peno nthawe iripo afunika kufotokozera mafoto yomwe yaikhiwa yomwe yakonzewa kuti yathandize kubvekesa mpfundo za munkhani mwoiyo. Angaingizire ma leferensiya yanango yomwe yangathandize kubvekesa bwino mpfundo za munkhani yake.

4. Mpfundo zothandiza: 10 Minutu. Iyi ni nkhani ya mibvunzo na midawiro iribe mawu yoyamba panango yomaliza. Nkhani mweyi imabakambiwe na nkulu panango mtumiki wothandiza woyenerera. Iye afunika kubvunza mibvunzo yose yawiri. Komasoti angasankhule kuwerenga mavesi yose yomwe yaikhiwa panango neye. Wanthu omwe alatiwa kuti adawire afunika kufotokoza midaworo yawo osapitirira 30 segundo.

5. Kuwerenga Baibolo: 4 Minutu. Nkhanai mweyi iperekewe kwa wopfunzira mwamuna. Afunika kundowerenga mavesi yomwe wauziwa palibe kunena mawu yoyamba panango yomaliza. Tchayamani afunika kutnandiza munthu muyo kuti abvese vomwe ankuwerenga, awerenge motewedza na mosadodoma, ambachinje mawu, kupuma moyenerera komasoti kuyamnkhula mwachibadwa. Pakuti mavesi yanango yomwe abale ambapasiwe kuti awerenge yambakhale yazinji ndipo yanango yambakhale pang’ono, wonyan’ganira nsongano wa utumiki na moyo wathu wachikhrisitu afunika kuganizira buya ya wopfunzira akambagawa nkhani zimwezi.

KUPFUNZISA MWABUYA MU UMBINI

6. 15 Minutu. Chigawo chimwechi cha nsonkhano chakonzewa kuti chimbathandize aliyesekuyeserera vomwe angachite mu umboni komasoti kuyingizira buya yolalikira na kupfunzisa. Peno ni vokwanisika akulu afunika kupasiwa mbali zinango za opfunzira. Wopfunzira aliyese afunika kuphatisira basa pfunziro yomwe wapasiwa kuti aphatise basa kuchokera mukabukgu ka Kupfunzisa panango kabukhu ka mumbakonde wanthu. Tumabukhu tumutu tuwonesewa nkati mwa vizindikiro ivi ( ) mu kabukhu ka utumiki na moyo wathu wachikhrisitu. Nthawe zinango kumbakonzewe dongosolo yakuti wanthu akambirane mpfundo zinango. Mbali yokambirana mweyi ifunika kuperekewa kwa nkulu panango kwa ntumiki wothandiza woyenerera. Onani ndime 15 pa nkhani ya momwe nkhani yokambirana ifunika kuchitiriwa.

7. Ulendo woyamba: Nkhani mweyi iperekewe kwa munthu mwamuna panango nkazi. Peno yaperekewa kwa munthu nkazi, munichiro muyi akhalembo nkazi. Ndipo peno yaperekewa kwa munthu mwamuna, munikachiro muyi akhalembo mwamuna panango munthu wa m’banja yake. Wopfunzira komasoti womuthandizira wake angasankhule kukhala pasi panango kuimirira akambachita chitsanzo. Kuti mudziwe vizinji va cholinga komasoti khaindi ya ulaliki womwe mufunika kuchita pachitsanzo chanu, onani ndime 12 na 13.

8. Ulendo wobwereza: Nkhani mweyi iperekewe kwa munthu mwamuna panango nkazi. Peno yaperekewa kwa munthu nkazi, munichiro muyi akhalembo nkazi. Ndipo peno yaperekewa kwa munthu mwamuna, munikachiro muyi akhalembo mwamuna. (km-CN 5/97 p. 2) Wopfunzira komasoti womuthandizira wake angasankhule kukhala pasi panango kuimirira akambachita chitsanzo. Wopfunzira afunika kuwonesa vomwe anganene pakufuna kuyambisa nkhani yomwe adakambirana kale na munichiro muyi pa ulendo woyamba. Akauti mudziwe vizinji va cholinga komasoti khaindi ya ulaliki pa vomwe mufunika kuchita pa chitsanzo chanu onani ndime 12 na 13.

9. Kupfunzisa wanthu: Nkhani mwei iperekewe kwa munthu mwamuna panango ankazi. Peno yaperekewa kwa munthu nkazi, munichiro muyi akhalembo nkazi. Ndipo peno yaperekewa kwa munthu mwamuna, munikachiro muyi akhalembo mwamuna. (km-CN 5/97 p. 2) Wopfunzira komasoti womuthandizira wake angasankhule kukhala pasi panango kuimirira akambachita chitsanzo. Nkhani mweyi imbawonese pfunziro ya Baibolo inkuchitika kale. Palibe chifukwa chakuti pakhale mawu yoyamba panango yomaliza, pokhapokha peno msolo wa pfunziro yomwe wopfunzira muyo wapasiwa unkunena vimwivo. Ni kofunikalini kuwerenga ndime zose zomwe mwapasiwa olo kuti mungasankhule kuwerenga.

10. Kufotokoza vomwe mukhulupirira: Peno ikambiwe ninge nkhani, mbali mweyi ifunika kuperekewa kwa wopfunzira mwamuna. Koma peno ikhale inge chitsanzo, ingaperekewe kwa wopfunzira nkazi panango mwamuna. Peno yaperekewa kwa munthu nkazi, munichiro muyi akhalembo nkazi. Ndipo peno yaperekewa kwa munthu mwamuna, munikachiro muyi akhalembo mwamuna. Wopfunzira afunika kupereka m’dawiro wobveka bwino komasoti mochenjera akambadawira mbvunzo wa nsolo wa nkhani yake mobverana na maleferensiya yomwe wapasiwa. Wopfunzira angasalule kutomola bukhu yomwe adaphatisa basa pankufagafaga panango neye panthawe yomwe ankukamba nkhani yake.

11. Nkhani: Mbali mweyi ifunika kuperekewa kwa munthu mwamuna ndipo imbakambiwe ninge nkhani mu mpingo. Peno nkhani mwiyo yachokera ku vakumapeto A mu kabukhu kakuti Kondani wanthu, wopfunzira afunika kufotokoza momwe mavesi mwayo yangaphatisiriwe basa mu umboni. Mwakulinganiz, mungafotokoze nthawe yomwe lemba mwiyo ingaphatisiriwe basa, tanthauzo yake na momwe tingaiphatisire basa pokambirana na munthu. Peno nkhani yake yachokera pa ibodzi ya pfunziroyomwe iri mu kabukhu ka Kondani wanthu, ambaikhire nzeru maninge pa momwe tingaphatisire basa mpfundo mwizo mu umboni. Angafotokoze chitsanzo chomwe chiri pampfunzo yoyambirira ya pfunziro mwiyopanango angafotokoze malemba yanango yoingizora pa pfunziro mwiyo yomwe ni yothandiza.

12. Cholinga: Mpfundo zomwe ziri pa ndime ino komasoti zomwe zinkubwera, zinkufotokoza maninge momwe tingachitire pa mbali ya “Ulendo woyamba” komasoti “Ulendo wobwereza”. Cholinga cha wopfunzira chifunika kukhala pakufotokoza mpfundo zachigwato za chonadi cha M’Baibolo kwa munthu yemwe ankuyankhula naye na kutsimikizira kuti ulendo wobwereza udzachitike. Wopfunzira afunika kusalula nkhani yofika pamoyo yakuti adzakamirane yosatenga nthawe ikulu. Angasankhule peno afunika kugawira mabukhu, kuwonesa vidiyo panango neye. M’malo mwakundosungiratu mawu yofunika kuyankhula, opfunzira afunika kuingizira buya yawo yokambirana na wanthu pakukamba nkhani zawo motsimikizira komasoti mowonesa chodwi kwa obvesera.

13. Khaindi ya ulaliki: Opfunzira afunika kupatisa basa khaindi ya ulaliki omwe apasiwa mobverana na momwe vinthu viriri mu dera yanu. Mwakulinganiza:

1. (1) Kulalikira nyumba na nyumba: Khaindi ya ulaliki muyu uphatanidzapo kulalikira nyumba na nyumba, kugumana na wanthu, kufona, panango kunemba makalata. Kuphatanidzapomwe kuchita maulendo yobwereza kwa wanthu omwe tidawalalikira.

2. (2) Ulaliki wa mwamwayi: Khaindi ya ulaliki muyu uphatanidzapo kulalikira kwa wanthu kuchokera pankhani zinango zomwe tinkucheza nawo ndipo patsogolo pake nkuyamba kuwafotokozera mpfundo za chonadi. Zingaphatanidzepo mpfundo za M’Baibolo na wanthu omwe tiphata naewo basa, omwe tipfunzira nawo shikola, mavizinyu, omwe tapakira nawo pabodzi karo panango kulikose komwe tingagumane nawo tikambachita vinthu vathu va ntsiku na ntsiku.

3. (3) Ulaliki wa pamalo yogumanika wanthu azinji: Khaindi ya ulaliki muyu uphatanidzapo kulalikira na tumasherufu, kulalikira wanthu pamalo yogulisira vinthu, ulaliki wa munsewu, kulalikira ku malo yosungira vinyama, poimisira makaro panango malo yaliyose yogumanika wanthu azinji.

14. Kuphatisira basa mavidiyo na mabukhu: Mobverana na momwe vinthu viriri, wopfunzira angasalule peno angafune kuwonesa vidiyo panango kugawira bukhu. Peno nkhani ya wopfunzira ikufunika kuwonesa vidiyo panango iye wasankhula kuphatisa basa vidiyo, afnika kuifotokoza ndipo patsogolo pake akambirane mpfundo za mu vidiyo mwiyo koma afunikalini kuyiriza.

MOYO WATHU WACHIKHRISITU

15. Nyimbo ikamala, 15 minutu za mbali mweyi imbakhale na nkhani ibodzi panango ziwiri zothandiza wanthu kuphatisa basa Mawu ya Mulungu pamoyo wawo. Nkhani mwezi zimbaperekewe kwa akulu na kwa atumiki othandiza woyenerera. Koma peno ni vofunika va pa mpingo zimbakambiwe na akulu okha. Peno nkhani ni yokambirana, wokamba nkhani mweyi ambabvunze mibvunzo pa mbali iriyose pa nkhani mweyi kuphatanidzapo mpfundo zinango zomwe wapasiwa. Afunika kukhala na mawu yoyamba yachigwato na cholinga chopereka nthawe yokwana yokambirana mpfundo zose na kupereka mwayi kwa osonkhana. Peno nkhani mweyi ni yobvunza anango mibvunzo, ni vofunika kuti obvunziwa mwawo ambakadawire ali ku pulatifomo m’malo modawira ali khale pamalo yawo.

16. Pfunziro ya Baibolo ya Mpingo: 30 minutu. Iperekewe kwa nkulu woyenerera. (M’mipingo yomwe ni an’gonon’gono maning, atumiki othandiza woyenerera angapasiwe mbali mweyi peno ni vofunika.) Bungwe ya akulu ifunika kuwona bwinobwino buya yopfunzisa ya nkulu aliyese kuti isankhule akulu omwe ni oyenerera kuti ambchitise pfunziro ya Baibolo ya Mpingo. Akulu omwe angasankhuliwe afunika kuchitisa pfunziro mweyi mofika pamoyo, kuthandiza obvera kuti afotokoze mpfundo zothandizadi pa malemba yoyenerera, kuthandiza aliyese kuti awone momwe angaphatisire basa mpfundo za mu pfunziro mwiyi pa moyo wake, ndipo afunikalini kudya nthawe. Abale omwe asaluliwa kuti ambachitise mpfunziro mweyi afunika kuwerenga na kutewedza mpfundo zomwe gulu yakonza za momwe tingachitisire nkhani ya mibvunzo na midawiro. (w23.04 p. 24, kabokosi) Peno mwamaliza kukambirana mpfundo zose zankhani za sondo mwiyo mufunikali kutalimphisa pfunziro mwiyo kundofuna kumaliza nthawe yomwe yasala. Peno ni vokwanisika, sondo iriyose pfunziro ya Baibolo ya mpingo imbachitisiwe na m’bale munango ndipo m’bale munango ambawerenge ndime, osati m’bale yemwe adawerenga sondo yapita. Peno tcheyamani wa nsonkhano wa utumiki na moyo wathu wachikhrisitu wanena kuti pfunziro mweyi ichitiwe mwachigwato ndawa ya nthawe, m’bale yemwe ankuchitisa pfunziro ambasalile yekha momwe angachitisire mwachigwato. Iye angasankhule kuti ndime zinango osati ziwerengewe koma angondobvunza mibvunzo.

MAWU YOMALIZIRA

17. 3 munutu. Tcheyamani wa nsonkhano wa utumiki komasoti na moyo wathu wachikhrisitu ambabwerezere mwachigwatio mpfundo zothandiza zomwe tapfunzira pa nsonkhano. Ambanenepomwe mwachigwato vomwe tidzapfunzire sondo ya mangwana. Peno ntawe ikalipo angatomole madzina ya wanthu omwe apasiwa nkhani sondo ya mangwana.Tcheyamani angaperekepomwe virengezo vofunika panango kuwerenga makalata panthawe mwiyi. Vilengezo va nthawe zose, ninge vofotokoza basa yathu yolalikira panango kuchenesa Nyumba ya Ufumu vifunikalini kulengezewa koma vimbamatikiwe ku kwadru ya virengezo va mpingo. Peno vilengezo ni vizinji panango kalata ni itali afunika kugumana nthawe panango kukumbira abale omwe anankhani mu moyo wathu wachikhrisitu, kuti azifupikise. (Onani ndime 16 na 19.) Nsonkhano moyu umbamale na nyimbo na pemphero.

KUTEMBEJA NA KUPEREKA MALANGIZO

18. Wopfunzira aliyse akamaliza nkhani yake, tcheyamani, wa nsonkhano wa utumiki na moyo wathu wachikhrisitu ambamutembeje na kumupasa malangizo kwa nthawe yosapitirira 1 munutu. Ndipo malangizo mwayo yambachokere pa pfunziro yomwe adapasiwa. Tcheyamani akanena nkhani yomwe wopfunzira akakambe osati anenepomwe pfunziro yomwe wapasiwa. Koma akamaliza tcheyamani muyo afunika kumutembeja ndipo anganene pfunziro yomwe adapasiwa, na kufotokoza m’bali yomwe wachita bwino panango vomwe afunika kuchinja pa ulendo unango. Tcheyamani angasankhule pomwe kutembeja panango kupereka malangizo pa mbali zinango za momwe wopfunzira muyo wakambira nkhani yakepeno akuwona kuti vingathandize wopfunzira panango obvera. Tcheyamani angapereke pomwe malangizo yothandiza kwa opfunzira misonkhano ikamala panangho ntsiku inango ndipo malangizo mwayo yafunika kuchokera mu kabukhu ka Kondani wanthu na mu ka bukhu ka Kupfunzisa panango mu bukhu ya Sukulu ya Utumiki. Malangizo mwayo yangachokere pa pfunziro yomwe wopfunzira muyo adapasiwa panango pa pfunziro inango. Kuit mudziwe vizinji pankhani ya udindo ya tcheyamani wa nsonkhano wa utumiki na moyo wathu wachikhrisitu komasoti na udindo wa mulangizi wothandiza, onani ndime 19, 24, na 25.

KUSUNGA NTHAWE

19. Mbali iriyose komasoti ndemanga za tcheyamani osati zimbapitirire yake. Podiya kuti kabukhu ka Utumiki na moyowathu Wachikhrisitu kaliretu na nthawe ya mbali iriyose, peno mwamaliza kufotokoza mpfundo zose za mbali yanu mufunikalini kuingizira vinthu vinango kuti mukwanirise nthawe yose yomwe mudapasiwa. Peno mbali zinango za pamisonkhano zapitirira nthawe yake, tcheyamani wa Nsonkhano wa Utumiki na Moyo wathu Wachikhrisitu panango mulangizi wothandiza afunika kupereka malangizo kwa yemwe wapitirira nthawe yake misonkhano ikamala. (Onani ndime 24 na 25.) Nsonkhano wose kuphatanidza nyimbo na pemphero ayi kuti vipitirire ora ibodzi na 45 minutu.

WONYANG’ANIRA DERA AKAMBAZUNGIRA MPINGO

20. Wonyang’anira dera akamazungira mpingo, misonkhano yambafambe ninge momwe taonesera mu kabukhu ka ndandanda ya misonkhano ya utumiki na moyo wathu wachikrisitu. Koma nkhani utumiki yomwe wonyang’anira dera akamba ya 30 minutu imbangene m’malo mwa pfunziro ya Baibolo ya Mpingo. Nkhani ya utumiki mwiyo ikalibe kuyamba, tcheyamani afunika kubwerezera vomwe tapfunzira, kunenako pang’ono vomwe tidzapfunzire sondo yamangwana kulengeza vinthu vofunika, kuwerenga makalata peno yalipo patsogolo pake kuchemera wonyang’anira dera kuti adzakambe nkhani yake. Wonyang’anira dera akamaliza kukamba nkhani yake awuze wanthu kuti ayimbe nyimbo yomalizira yomwe wasankhula. Angakumbire m’bale munango kuti adzafunge na pemphero. Sala B ya chiyankhu cha mpingo muyo ifunikalini kuchitika pasondo yomwe wonyang’anira dera ankuzungira mpingo. Koma kagulu kafunika kupitiriza kuchita misonkhano yaker olo kuti wonyang’anira dera akuzungira mpingo womwe uthandiza kagulu mwako. Koma panthawe yomwe wonyang’anira dera ankukamba nkhani ya utumiki, kagulu kafunika kubvesera nkhani mwiyo.

SONDO YA NSONKHANO WADERA PANANGO WACHIGAWO

21. Peno muli na nsonkhano wadera panango wachigawo, misonkhano ya mpingo ya sondo mwiyo yafunikalini kuchitika. Mpingo ufunika kukumbusiwa kuti afunika kupfunzira mpfundo za pa misonkhano ya mpingo panthawe ya pfunziro ya banja panango pakupfunzira pawokha.

SONDO YACHIKUMBUSO

22. Misonkhano ya mpingo ya nkhati mwa sondo yafunikalini kuchitika peno ntsiku yachikumbuso irimbo nkati mwa sondo.

WONYANG’ANIRA NSONKHANO WA UTUMIKI NA MOYO WATHU WACHIKHRISITU

23. Bungwe ya akulu ifunika kusankhula nkulu m’bodzi kuti akhale wonyang’anira nsonkhano wa utumiki na moyo wathu wachikhrisitu. Iye ambawonesese kuti nsonkhano muyu unkuchitika mwadongosolo komasoti motewedza malango yomwe tafotokoza. Afunika pomwe kuchita vinthu mobverana na mulangizi wothandiza. Kabukhu ka ka ndandanda ya misonkhano ya utumiki na moyo wathu wachikhrisitu kakandofika, iye yemwe ni yemwe ambagawe nkhani zose za misonkhano ya nkati mwa sondo ya minyezi yawiri. Vimwevi viphatanidzapo nkhani za opfunzira, nkhani zomwe ziperekewalini kwa opfunzira na omwe adzakhale matcheyamani kuchokera pa abale omwe bungwe ya akulu idasankhula. (Onani ndime 3-16 na 24.) Akambapereka nkhani kwa opfunzira, afunika kuganizira vinthu ivi: Magole ya opfunzira, peno ni wodziwa vizinji panango neye komasoti ufulu wake wakuyankhula pankhani yomwe akakambe. Afunikapomwe kuphatisa basa mpfunzo zimwezo akambapereka mbali zinango za nsonkhano muyo. Aliyese yemwe wapasiwa nkhani za opfunzira afunika kudziwisiwa kudakali masondo yatatu kuti adzakambe nkhani yake, pophatisa basa fomu yankhani ya Nkhani ya mu nsonkhano wa utumiki na moyo wathu wachikhrisitu (S-89). M’bale yemwe anyang’anira nsonkhano wa utumi na moyo wathu wachikhrisitu afunika kuwonesesa kuti ndandanda ya misonkhano yose yaikhiwa ku kwadru ya mpingo. Bungwe ya akulu ungasankhule nkulu munango panango ntumiki wothandiza kuti ambamuthandize. Koma akulu wokha ni omwe afunika kugawa nkhani zomwe ziperekewalini kwa opfunzira.

TCHEYAMANI WA NSONKHANO WA UTUMIKI NA MOYO WATHU WACHIKHRISITU

24. Sondo iriyose, nkulu ambakumbiriwe kuti akhale tcheyamani wa nsonkhano. (Mipingo yomwe yana akulu wochepa maninge, atumiki wothandiza woyenerera angakumbiriwe kukhala tcheyamani peno ni vofunika kuchita teno.) Tcheyamani ambakambe mawu yoyamba na yomaliza. Ambachemere pomwe wokamba nkhani zosiyanasiyana za nsonkhano muyu ndipo peno akulu ni ang’onong’ono angambakambembo nkhani zinango. Tcheyamani ambayankhule mwachigwato maninge nkhani iriyose ikamala komasoti akambachemera wokamba nkhani. Bungwe ya akulu ifunika kusankhula akulu oyenerera kuti ambakhale matcheyamani ndipo ambachinjanechinjane. Mobverana na momwe vinthu viriri pa mpingo, panango wonyang’anira nsonkhano wa utumiki na moyo wathu wachikhrisitu angambakhale tcheyamanin mobwerezerabwerezera kusiyana na akulu anango. Nkulu yemwe adasankhuliwa kuti ambachitise pfunziro ya mpingo ndiye kuti ni woyenererambo kukhala tcheyamani wa nsonkhano. Nkulu yemwe wasankhuliwa kukhala tcheyamani afunika kypereka malangizo yachikondi komasoti kutembeja abale na alongo omwe akamba nkhani za opfunzira. Tcheyamani afunika kuwonesesapomwe kuti misonkhano yakumala pa nthawe yake. (Onani ndime 17 na 19.) Peno tcheyamani angafune komasoti peno pulatifomu kuli malo yokwana, iye angaime pa mikolofoni yanango pambali kuti ambayankhulirepo, yemwe ankukamba nkhani yapatsogolo wafika kale pa mikolofoni yake. Angasankhule kukhaliratu ku pulatifomu muko pampando na meza kuti ambachemerere omwe ankukamba nkhani za opfunzira na kuwapasa malangizo ali ku pulatifomo kumuko. Vimwevi vingathandize kuti nthawe osati idzongeke.

MULANGIZI WOTHANDIZA

25. Peno ni vokwanisika, sankhulani nkulu yemwe akamba bwino nkhani kuti akhale mulangizi wothandiza. Mulangizi moyu ambapereke malangizo kwa akulu na atumiki wothandiza omwe akamba nkhani zosiyanasiyana pa misonkhano yose ya mpingo peno ni nsonkhano wa utumiki na moyo wathu wachikhrisitu, nkhani ya wose, pfunziro ya Ntsanja Ulonda panango pfunziro ya Baibolo ya Mpingo. (Onani ndime 19.) Peno mu mpingo mumo muli akulu azinji omwe akamba bwino nkhani, angambachinje mulangizi wothandiza gole iriyose. Ni vosafunika kuti mulangizi wothandiza ambapereke malangizo mbali iriyose ikandomala.

MASALA YANANGO

26. Mpingo ungakhale na masala yanganani, mobverana na kuwanda kwa opfunzira. Sala iriyose ikhale na mulangizi woyenerera ndipo ngati vingakwanisike akhale nkulu. Ntumiki wothandiza woyenerera angaphatisiwe basa ku sala B peno nivodekana. Bungwe ya akulu ichadekana kusalula m’bale panango mulongo yemwe angakhale pa udindo moyu, ndipo peno nivodekana abale mwawa ambachinjanechijane. Mulangizi achadekana kutewedza malangizo yomwe yali mu ndime 18. Wanthu achadekana kukumbiriwa kuti ayende mu sala B mbali yakuti Mpfundo zothandiza ikamala mu Chuma chogumanika m’mawu ya Mulungu. Iwo afinika kubwera akandomaliza mbali ya wopfunzira womalizira kuti akachite vose na mpingo.

MAVIDYO

27. Mavidyo yosaluliwa yadzawonese mobverana na misonkhano. Mavidyo mwaya ya misonkhano ya nkati mwa sondo yadzagumanike pa apilikativo ya JW Library^® mungadzapatise basa vipangizo vosiyanasiyana.

© 2023 Watch Tower Bible and Tract Society of Pennsylvania

S-38-PHM 11/23