MSOLO 22
Ko imwepo mungalalikire tani ntontholo wabwino?
Pomwe munkupfunzira chonadi cha m’Baibolo panango mungaganize kuti, ‘Aliyese achadikana kudziwa vimwivi!’ Shuwadi aliyese achadikanadi kuvidziwa! Koma nthawe zinango mungakhumudwe mukambawuza anango vomwe munkupfunzira. Naboni tikambirane momwe mungambapiririre bvuto mweyi na momwe mungakhalire wokondwa mukayamba kulalikira ntontholo wabwino moyu wa m’Baibolo.
1. Ko mungafotokozetani vomwe munkupfunzira m’Baibolo kwa wanthu omwe muchawadziwa?
Ateweri wa Yesu adati: ‘Tingalekelini kuyankhula va vinthu vomwe tidawona na kubva.’ (Machitidwe 4:20) Iwo angalemekeza maninge chonadi mwakuti ambafuna kuwuzambo wanthu azinji omwe adakakwanisa kuwalalikira. Ko imwepo muchabvambo mwa njira mweyi? Peno teno, nyang’anani njira zomwe mungakwanisire kufotokozera azibale na azishamwali wanu mwaulemu vomwe mwapfunzira.—Lewengani Akolose 4:6.
Njira zinango za momwe mungayambire macheza
Mukambayankhula na wachibale mungayambe na nkhani ya m’Baibolo mwakulewa kuti: ‘Sondo ino napfunzira vinthu vopasa chidwi maninge.’
Fotokozani lemba yolimbikisa kwa azishamwali omwe ankudwala panango omwe anankhawa.
Awuzeni vomwe mwapfunzira pa pfunziro yanu ya Baibolo panango kumisonkhano ya mpingu azishamwali wanu omwe angakubvunzeni za momwe sondo yanu yafambira.
Awoneseni azishamwali wanu jw.org saiti.
Chemererani anango kuti adzakhale namwe pabodzi pa pfunziro yanu ya Baibolo panango onesani momwe iwo angakumbirire yawo pa jw.org.
2. Ndawa chani kulalikira pabodzi na mpingu nichakulinga chabwino?
Wopfunzira wa Yesu angachita vizinji osati kundolalikira kokha ntontholo wabwino kwa wanthu omwe angawadziwa. Yesu ‘adawatumiza awiri awiri kumathaundi yanango’ kuti akalalikire. (Luka 10:1) Basa mweyi yomwe ingachitika mwadongosolo idapereka mwayi kwa wanthu azinji wakubva ntontholo wabwino. Wopfunzira mwawa adakhala wokondwa maninge pomwe angaphata basa mweyi pabodzi. (Luka 10:17) Ko imwepo mungakonde kukhala na chakulinga cholalikirira pabodzi na mpingu?
PFUNZIRANI VIZINJI
Onani momwe mungapiririre mantha na kugumana chimwemwe ndawa yakulalikira ntontholo wabwino.
3. Yahova adzakhale namwe
Anango omwe achada kulalikira angakhale na nkhawa ndawa ya vomwe anango angachite panango kuyankhula.
Ko imwepo munamantha kuwuzambo anango vomwe mwapfunzira? Peno teno, ndawa chani?
Wonesani VIDIYO, ndipo patsogolo pake kambiranani mbvunzo uyu.
Ko mulumbwana wa Mboni moyu adalimbana tani na mantha yake?
Lewengani Yesaya 41:10, patsogolo pake kambiranani mbvunzo uyu:
Imwepo mukakhala na mantha yolalikira, ko pemphero ingakuthandizeni tani?
Ko munkudziwa?
A Mboni za Yahova azinji pakuyamba angawona kuti angakwaniselini kufotokozera anzawo vomwe angapfunzira. Mwakulinganiza, Sergey, angadziona kuti niwachabechabe ndipo angadziona kuti angakwaniselini kumbayankhula na wanthu. Koma patsogolo pake pomwe iye adapfunzira Baibolo iye adati: ‘Olo kuti nenze namantha nidayamba kufotokozerambo anango vomwe ningapfunzira. Mosayembekezereka, pomwe ningawuza anango va Baibolo mwevi vidalimbisa chitsimikiziro changu. Ndipo vomwe nimbakhulupirira vidayamba kukhazikika mumtima mwangu.’
4. Khalani waulemu
Mukambalalikira ntontholo wabwino, onani osati vomwe munganene vokha komasoti momwe munganenere. Lewengani 2 Timoteyo 2:24 na 1 Petulo 3:15, ndipo patsogolo pake kambiranani mibvunzo aya:
Ko imwepo mungaphatisire tani basa mavesi mwaya mukakhala kuti munkuyankhula na wanthu va m’Baibolo?
Achibale wanu anango panango azishamwali wanu angabvumelini kukutetekerani. Ko imwepo mungachite chani? Ni chani chomwe muchadekanalini kuchita?
Ko ndawa chani nthawe zose ni vabwino kuphatisa basa mibvunzo mu njira yabwino m’malo mochita kuwakakamiza?
5. Kulalikira ntontholo wabwino kuchabweresa chimwemwe
Yahova adapasa basa Yesu yolalikira ntontholo wabwino. Ko Yesu angaiwona tani basa yake? Lewengani Yohane 4:34, ndipo patsogolo pake kambiranani mibvunzo aya:
Kudya chakudya chabwino kuchathandiza thupi yathu ndipo chichachitisa kuti tikhale wokondwa. Ndawa chani Yesu adalinganiza kuchita vomwe Mulungu achada—pabodzi na kulalikira ntontholo wabwino—na kudya chakudya?
Ko munkuwona kuti ni chimwemwe chiponi chomwe chingabwere ndawa yakulalikira ntontholo wabwino?
Yesani kuchita ivi
Kumisonkhano yapakati pasondo nyang’anani njira zamungayambire macheza.
Kambiranani na omwe achakupfunzisani Baibolo za momwe mungayambire kukambambo nkhani mu Nyumba ya Ufumu. Nkhani zimwizi zingakuthandizeni imwepo kukhala wokonzeka kufotokozerambo anzanu vomwe munkupfunzira.
Phatisirani basa mbali yakuti “Wanthu anango achati” panango kuti “Munthu angabvunze kuti” ndipo mbali mwezi zinkugumanika mu bukhu ino, ndipo vimwivi vingakuthandizeni momwe mungadawirire mibvunzo yomwe ichabvunziwa pafupipafupi.
WANTHU ANANGO ACHATI: ‘Ko kusowa uku mulipampano?’
Ko imwepo mungaphatise tani basa mpata ninge moyu kuti mufotokozerembo anango vomwe mwapfunzira papfunziro yanu ya Baibolo?
CHIGWATO
Mukambayankhula va ntontholo wabwino na wanthu anango muchakhala wokondwa, ndipo kuyamba macheza kungakhale kosashupa kuposha momwe muchaganizira.
Kubwerezera
Ndawa chani tichadekana kufotokozerambo anango va ntontholo wabwino?
Ko mungachitetani vimwivi mwaulemu?
Ko imwepo mungapirire tani mantha yomwe mungakhale nayo pakulalikira?
KUTI MUDZIWE VIZINJI
Onani njira zinayi zosashupa zomwe mungalalikirire ntontholo wabwino pakuphatisa basa kakhadi kolalikirira ka jw.org.
Kuphatisira basa kakhadi ka JW.ORG pakuyamba macheza na munthu (1:43)
Pfunzirani va makhalidwe yanayi yomwe yangakuthandizeni kuti mulalikira ntontholo wabwino.
‘Ko ndimwe wokonzeka kukhala wosodza wanthu?’ (Nsanja ya Olonda, Setembro 2020)
Onani momwe vitsanzo va m’Baibolo vingatilimbisire moyo kuti mumbalalikire olo kuti ndimwe mwana.
Onani vomwe mungayankhule na wachibale wanu omwe akanati wapfunzirako va Yahova.
‘Ko tinganthandize tani azibale womwe ni mbonilini?’ (Nsanja ya Olonda, 15 Março, 2014)