MSOLO 12
Ko ni chani chomwe chidzakuthandizeni kuti mupitirize kupfunzira Baibolo?
Kunena shuwa kupfunzira Baibolo ni chinthu chakudekana kuposha vinthu vose. Koma nthawe zinango kuchita vimwivi kungakhale koshupa, panango mungambakaikire kuti peno mudzakwanise kupitiriza kupfunzira Baibolo. Koma ndawa ya chani ni vaphindu kupitiriza kupfunzira? Ndipo ni chani chomwe chingakuthandizeni kuchita vimwevi podiya kuti munkugumana na mabvuto yazinji?
1. Ndawa chani kupfunzira Baibolo nikodekana maninge?
‘Mawu ya Mulungu ni yamoyo na yamphanvu.’ (Aheberi 4:12) Kupfunzira Baibolo ni kodekana maninge, iyo ichatithandiza kudziwa vomwe Mulungu achaganiza na momwe iye achabvera akationa. Baibolo ingakuthandizeni kudziwa vinthu vinyowani, kukhala na moyo waphindu na kukhala na tsogolo yabwino, ndipo chodekana maninge nchakuti iyo idzakuthandizeni kukhala shamwali wa Yahova. Mukambapfunzira Baibolo muchakhala munkubvuma kuti mphanvu ya Mawu yake ichinje moyo wanu.
2. Ndawa chani tichadekana kuzindikira kuti chonadi ni chodekana?
Chonadi cha m’Baibolo chili ninge chuma cha ntengo wapatali. Ndipomwapa, iyo ichatilimbikisa kuti ‘tigule chonadi ndipo ayi kuchigulisa.’ (Miyambo 23:23) Tikambakhala kuti tinkuwona kuti vomwe Baibolo ichapfunzisa ni vaphindu tichachita khama kuti tipitirize kuipfunzira podiya kuti tinkugumana na mabvuto yazinji.—Lewengani Miyambo 2:4, 5.
3. Ko Yahova angakuthandizeni tani imwepo kuti mupitirize kupfunzira?
Yahova ni Mlengi wamphanvu ndipo ni shamwali wanu, iye achakudziwani maninge imwepo kuposha munthu aliyese ndipo iye achada kuti imwepo mumudziwembo. Yahova adzakupase ‘shungu na mphanvu kuti mukwanise.’ (Lewengani Afilipi 2:13.) Ndipomwapa mukakhala kuti munkubva ulesi panango munkuwona kuti nivoshupa kuphatisira basa vomwe munkupfunzira pamoyo wanu iye angakuthandizeni. Ndipo mukakhala kuti munkufuna mphanvu kuti akuthandizeni kupirira mabvuto, iye adzakhale kusaidi yanu, pempherani nthawe zose kwa Yahova kuti apitirize kukuthandizani kupfunzira Baibolo.—1 Atesalonika 5:17.
PFUNZIRANI VIZINJI
Onani momwe mungapitirizire kupfunzira Baibolo podiya kuti ndimwe wotangwanika panango kuti wanthu akambakutsutsani. Komasoti onani momwe Mulungu angakuthandizireni kuti muleke kufoka.
4. Onesani kuti kupfunzira Baibolo nkodekana maninge kwa imwepo
Nthawe zinango tichakhala na vinthu vizinji vati tichite mwakuti tichakumbuka kuti tilibe nthawe yowelenga Baibolo. Ko ni chani chomwe chingathandize? Lewengani Afilipi 1:10, ndipo patsogolo pake kambiranani mibvunzo aya:
Ko imwepo munkuwona kuti ‘vinthu vakudikana maninge’ pamoyo ni viponi?
Ko mungawonese tani kuti kupfunzira Baibolo ni kodekana maninge kwa imwepo?
Imwepo mukayamba kuikha nchenga muchombo, patsogolo pake nkudzaikha minyala yangakwanelini
Koma mukayamba kuikha minyala mudzakhale na mipata kuti nchenga wose upite. Nchibodzibodzimbo, mukaikha ‘vinthu vodikana maninge’ pa malo yakuyamba mudzagumane nthawe yochita vinthu vinango
Kupfunzira Baibolo kuchachitisa kuti tikwanirise chosowa chathu chauzimu panango kuti chosowa chathu chomwe nikudziwa na kutumikira Mulungu. Lewengani Mateyu 5:3, ndipo patsogolo pake kambiranani mbvunzo uyu:
Ko ni maphindu yaponi yomwe tidzakhale nayo tikaikha kupfunzira Baibolo pamalo yakuyamba?
5. Ayi kubvuma kuti wanthu akufokeseni
Vingachitike kuti wanthu ankuyesesa kuti akufokeseni kupfunzira Baibolo. Onani chitsanzo cha Francesco. Wonesani VIDIYO, ndipo patsogolo pake kambiranani mibvunzo aya.
Mu vidiyo ko azishamwali na azibereki wake wa Francesco adabvatani pomwe angawauza vomwe iye angapfunzira?
Ko kupirira kwake kudadalisiwa tani?
Lewengani 2 Timoteyo 2:24, 25, ndipo patsogolo pake kambiranani mibvunzo aya:
Ko banja yanu na azishamwali wanu achawonatani vomwe munkupfunzira?
Mobverana na mavesi mwaya ko muchadekana kuchita chani peno munthu ankufuna kukukangisani kupfunzira Baibolo? Ndawa chani?
6. Tsimikizani kuti Yahova adzakuthandizeni
Tikambakhala kuti tinkufenderera Yahova tichada kuti timukondwerese iye, podiya viritene vingakhale voshupa kuti tichinje moyo wathu na kumbachita vinthu vobverana na vomwe iye achafuna. Mukambakhala kuti munkubva teno, ayi kufoka Yahova adzakuthandizeni. Wonesani VIDIYO, ndipo patsogolo pake kambiranani mibvunzo aya.
Mu vidiyo, ko Jim angadekana kuchinja chani kuti akondwerese Yahova?
Ko ni chani chomwe imwepo mwakondwa nacho maninge pankhani yake mweyi?
Lewengani Aheberi 11:6, ndipo patsogolo pake kambiranani mibvunzo aya:
Ko Yahova adzachite chani kwa wale omwe ‘achachita khama kuti amudziwe’ na kumukondweresa?
Ko munkuganiza kuti Yahova achabva tani akambawona khama yanu pakupitiriza kupfunzira Baibolo?
WANTHU ANANGO ACHATI: ‘Ndawa chani imwepo munkupfunzira Baibolo na wa Mboni za Yahova?’
Ko imwepo mungadawire tani?
CHIGWATO
Nishuwadi kuti mukambapfunzira Baibolo mungambagumane na mabvuto yanango, koma dziwani kuti mukambachita vimwevi mudzakhale wokondwa mpakana kalekale. Pitirizani kuthemba Yahova, iye adzakudaliseni.
Kubwerezera
Ndawa chani chonadi cha m’Baibolo ni chuma chantengo wapatali kwa imwepo?
Ko imwepo mungawonese tani kuti ‘vinthu vodikana maninge ni vaphindu’?
Ndawa chani imwepo muchadekana kukumbira Yahova kuti akuthandizeni kupitiriza kupfunzira Baibolo?
KUTI MUDZIWE VIZINJI
Onani jira zosiyanasiyana zokwana zinayi zomwe wanthu akhala ankuziphatisira basa kuti aphatisire basa bwino nthawe yawo.
‘Ko mungachitetani kuti mumbaphatise bwino basa nthawe’ (Galamukani!, Fevereiro 2014)
Wonani momwe Yahova adathandizira nkazi munango yemwe mwamuna wake ambabvesa khama yomwe iye ambachita kuti akondwerese Mulungu.
Wonani momwe mwamuna munango adaphindulira ndawa ya kupirira kwa nkazi wake.
Wanthu azinji achati wa Mboni za Yahova achapfudza mabanja. Ko vimwevi nchaivodi?
‘Ko Mboni za Yahova zichapfudza mabanja panango zichayalimbisa?’ (Nkhani ya pa intaneti)