Kalata yochokera ku Bungwe yotonga

‘Imwepo muchadikana kukhala apfunzisi.’ (Aheb. 5:12) Ndoganizirani! Yahova yemwe ni Mpfunzisi nkulu mu chilengedwe chose, akutiluwira kuti timbapfunzise anango va iye! Kupfunzisa wanthu va Yahova m’banja yathu, mumpingu na mu umboni ni mwayi wathu ndipo ni udindo ukulu maninge. Ko tingakhale tani apfunzisi wabwino?

Mdawiro unkugumanika pa vomwe Paulo adanembera Timoteyo kuti: ‘Pitiriza kukhala wodzipereka pakulewenga pamaso pa wanthu, pakuwadandaulira na pakuwapfunzisa.’ Paulo adalewa pomwe kuti: ‘Ukambachita vimwevi udzadzipulumuse wekha na wanthu wokubvera.’ (1 Tim. 4:13, 16) Isepano tinantontholo wopulumusa moyo. Bulosha mweyi yakonzewa na cholinga chakukuthandizani pankhani mweyi. Wonani mpfundo zinango zothandiza.

Pa tsamba iliyose panalemba yomwe inkuwonesa mpfundo ya m’Baibolo yobverana na msolo panango chitsanzo cha momwe tingaphatisire basa vomwe tapfunzira

Yahova ni ‘Mpfunzisi nkulu.’ (Yes. 30:20) Podiya kuti bulosha mweyi ikuthandizeni kuyingizira buya yakulewenga na kupfunzisa, ayi kuduwala kuti ntontholo wathu uchachokera kwa Yahova. Iye ndiye achadonsa wanthu kuti abwere mu gulu yake. (Yoh. 6:44) Ndipomwapa, timbakumbire mzimu wakuchena. Mumbaphatise basa Mawu ya Mulungu. Timbawathandize wanthu kuganizira maninge Yahova osati isepano. Cholinga chathu chimbakhale kuthandiza wanthu kuti ambakonde maninge Yahova.

Imwepo mwapasiwa udindo wakupfunzisa wanthu ntontholo wakudikana maninge. Tinashuwa kuti imwepo mukambathemba ‘mphanvu yomwe Mulungu achapereka,’ mudzakhale wabuya pakupfunzisa.—1 Pet. 4:11.

Ndise apfunzisi ayanu,

Bungwe yotonga ya Mboni za Yahova