Yesu adagumana na asodzi

Paidapita nthawe kundochokera pomwe Yesu adagumana na atumi, Petulo adaganiza voyenda kukapha ntsomba ku nyanja ya Galileya. Thomasi, Yakobo na Yohani nawombo adayenda. Iwo adaphata basa usiku wose koma alibe kuphata ntsomba iriyose.

Pomwe kudachena adaona munthu munango ali imirire mphepete mwa nyanja. Munthu moyu adawabvunza kuti: ‘Ko imwepo mwaphako ntsomba?’ Iwo adadawira kuti: ‘Ne ibodzi.’ Iye adawauza kuti: ‘Thusani akombe wanu mbali ya kumakulu.’ Pamwapo adapha ntsomba zizinji mwakuti adakangira kuzipfuwira kuntunthu. Nthawe mweyo Yohani adazindikira kuti munthu muyo ni Yesu Ndipo adanena kuti: ‘Aa ni ambuya kani!’ Petulo padandobva vimwevo, adalumphira m’madzi mumo nkuyamba kunyaya kuyenda kuntunthu. Opfunzira anango adamutewera na mwadiya.

Pomwe adafika kuntunthu, adagumana ntsomba na nkate viri pamoto. Yesu adawauza kuti amupaseko ntsomba zinango kuti ayingizire chakudya chimwecho. Patsogolo pake adawauza kuti: ‘Bwerani tidye matabitchu.’

Pomwe adamaliza kudya, Yesu adamubvunza Petulo kuti: ‘Ko unikonda kuposha basa yakupha ntsomba?’ Petulo adadawira kuti: ‘Inde Ambuya, imwepo munkudziwa vimwevo.’ Yesu adalewa kuti: ‘Dyesa wana wangu wankhosa.’ Patsogolo pake Yesu adamubvunza pomwe kuti: ‘Ko Petulo unikonda?’ Iye adadawira kuti: ‘Ambuya, imwepo munkudziwa kuti nikukondani.’ Yesu adalewa kuti: “Busa wana wangu wankhosa.” Manje adamubvunza pomwe kachitatu ndipo Petulo adabva ntsisi nkudawira kuti: ‘Ambuya, imwepo mukudziwa vose ndipo munkudziwa kuti nikukondani maninge.’ Yesu adanena pomwe kuti: “Dyesa wana wangu wankhosa.” Patsogolo pake adamuuza pomwe kuti: “Pitiriza kunilondola.”