Yesu adamukisiwa

Yesu padafa, munthu munango wachuma dzina yake Yosefe, adayenda kwa Pilato kukakumbira kuti atenge thupi ya Yesu nkukaiyikha m’manda. Yosefe adadzoleka thupi mweyo mafuta yonunkhira nkuyikulungira na nguwo yabwino maninge nkukaiyikha m’manda yomwe adayasema mu chimwala. Patsogolo pake adakunkhuliza chimwala nkufunga pa nsuwo pa manda mwayo. Pamwapo wantsembe akulu adauza Pilato kuti: ‘Tinkuganiza kuti opfunzira wa Yesu angayende kukaba thupi yake nkumbanama kuti wamukisiwa.’ Pilato adawadawira kuti: ‘Yendani mukafunge manda mwayo ndipo mukaikhe magwarda.’

Pazidapita ntsiku zitatu, azimayi anango adabesera maninge kuyenda kumanda muko ndipo adagumana kuti chimwala chire chachosewa. Mngelo wenze khale pachimwala mwapo ndipo adawauza kuti: ‘Imwepo ayi kuti mugope, Yesu wamukisiwa ndipo yendani mukauze opfunzira wake kuti akagumane naye ku Galileya.’

Mariya Magadala, adathamanga kukauza Petulo na Yohani kuti: Thupi ya Yesu yabewa!’ Petulo na Yohani, adathamanga nkuyenda kumanda mouko ndipo adagumanadi kuti thupi ya Yesu mulibe m’manda mumo. Ndipo adabwerera kumuyi.

Mariya padasuzira m’manda mumo adaona angelo awiri ali khale pomwe penze thupi ya Yesu. Ndipo adawabvunza kuti: ‘Ko Ambuya ayenda nawo kuponi?’ Patsogolo pake adawona munthu munago ndipo ambaganiza kuti ni nyabasa wosamalira munda ndipo adamuuza kuti: ‘Amuna imwe, peno ndimwepo mwawachosa Ambuya, pulizi niuzeni komwe mwawaikha.’ Munthu muyo adamuchemera kuti: “Mariya!” Iye adazindikira kuti wenze Yesu. Pamwapo, adakuwa kuti: “Mpfunzisi!” Ndipo adamuphata. Yesu adamuuza kuti: ‘Yenda ukawauze azibale wangu kuti waniona.’ Nthawe mweyo, Mariya adayenda kukauza opfunzira kuti waona Yesu.

Maulo ya ntsiku mweyo, opfunzira awiri ambafamba kuchokera ku Yerusalemu kuyenda ku Emau. Manje munthu munango adayamba kufamba nawo pabodzi ndipo adawabvunza vomwe ambakambirana. Iwo adamubvunza kuti: ‘Ko iwepo ulibe kubva? Ntsiku zitatu zapita izi antsembe akulu adapha Yesu, manje azimayi anango ankunena kuti iye anamoyo.’ Munthu muyo adawabvunza kuti: ‘Ko imwepo munkukhulupiriralini vomwe aneneri adanena? Pale adanena kuti Khrisitu adzafe patsogolo pake, adzamukisiwe!’ Munthu muyo adawafotokozera Malemba yosiyanasiyana. Padafika ku Emau, opfunzira mwawo adamukumbira kuti ayende naye pabodzi kwawo. Panthawe yomwe ambadya chakudya chamaulo, munthu muyo adapemphera ndipo iwo adamuzindikira kuti wenze Yesu. Patsogolo pake iye adasowa.

Nthawe mweyo opfunzira mwawo adayenda ku Yerusalemu ndipo adangena m’nyumba momwe mwenze atumi. Kumoku adawafotokozera vomwe vidachitika. Ali nyumba mumo, Yesu adatulukira. Pakuyamba atumi mwawo alibe kukhulupirira kuti wenze Yesu, koma iye adawauza kuti: ‘Onani manja yangu aya niphateni kuti mutsimikizire. Pale Malemba yadaneneratu kuti Khrisitu adzamukisiwe.’