Petulo adalamba Yesu

Yesu pewenze muchipinda cha m’dzulu, iye adauza atumi wake kuti: ‘Usiku muuno mose munithawe nkunisiya nekhanekha.’ Petulo adati: ‘Koma inepano neye! Podiya kuti anango wose mwawa achikuthawani, inepano nekha ningakusiyenilini.’ Koma Yesu adamuuza kuti: ‘Tambala akalibe walira, iwepo unilambe katatu kuti ukunidziwalini.’

Pa nthawe yomwe wanthu adaphata Yesu nkuyenda naye kwa Kayafa, atumi wose adathawa. Koma awiri adapitiriza kutewera gulu mwiyo. M’bodzi mwa wanthu mwawo omwe ambatewera, wenze Petulo. Iye adangena nawo m’nyumba ya Kayafa muyo nkumbawotha moto na wanthu anango. Pamwapo mtsikana munango nyabasa, adamuzindikira Petulo nkunena kuti: ‘Akulu imwe nakudziwani! Mwenze pabodzi na Yesu!’

Petulo adadawira kuti: ‘Neye, inepano nenzelini na munthu moyu! Komasoti vomwe unkunena ivi, ninkuvidziwalini!’ Pavidateno adanyamuka nkuyenda cha ku nsuwo wa mpanda. Koma mtsikana munango pomwe nyabasa padamuwona adauza wanthu kuti: ‘Akulu awa enze pomwe na Yesu! Koma Petulo adati: ‘Inepano Yesu muyo ninkumudziwalini olo pang’ono!’ Patsogolo pake mwamuna munango adati: ‘Ndiwe wopfunzira wa Yesu! Kayankhulidwe kako kakuwoneseratu kuti ndiwe wa ku Galileya.’ Koma Petulo adalumbira kuti: ‘Shuwa inepano ninkumudziwalini munthu muyo!’

Nthawe mweyoletu tambala adalira. Pamwapo Yesu adachungunuka nkunyang’ana Petulo. Pavidateno, Petulo adakumbukira vomwe Yesu adanena vire. Ndipo adayenda panja nkuyamba kulira maninge.

Oweruza wa mu Tiribunali Ikulu ya Ayuda, adasonkhana mu nyumba ya Kayafa, kuti ayambe kutonga mulandu wa Yesu. Enze adabverana kale kuti aphe Yesu. Ndipopamwapa ambandofuna kumugumanira chifukwa. Koma alibe kuchigumana. Patsogolo pake Kayafa adabvunza Yesu kuti: ‘Ko ndiwe Mwana wa Mulungu?’ Yesu adadawira kuti: ‘Inde.’ Pavidateno, Kayafa adati: ‘Pakufunikalini pomwe umboni unango. Moyu ankunyoza Mulungu!’ Oweruza wose adabverana ndipo adati: ‘Aphewe basi.’ Patsogolo pake anango adakwantsa Yesu mbama na kumulavulira mata, ambamubisa nkhope nkumumenya patsogolo pake nkumbanena kuti: ‘Peno ndiwe mneneri, tiuze yemwe wakumenya!’

Patsogolo pake pakudachena, adayenda naye kumalo yoweruzira milandu ndipo adamubvunza pomwe kuti: ‘Ko ndiwe Mwana wa Mulungu?’ Yesu adadawira kuti: ‘Mukunena mwekha kuti ndine Mwana wa Mulungu.’ Apa adamugumana na mulandu wonyoza Mulungu ndipo adayenda naye kwa governadori wa Chiroma dzina yake Potiyo Pilato. Ko kumuko vidamala tani? Tiwone mu msolo unkubwera.