Gulu yamphanvu ya masocha ya Yahova

Beni-hadadi wenze mpfumu ya Siriya ndipo ambakonda kuyenda kukamenyana na Aizirayeli. Koma nthawe zose mneneri Elisa ambachenjeza mpfumu ya Izirayeli ndipo mpfumu mwiyo imbathawa. Manje Beni-hadadi adaganiza votuma masocha yake kuti akaphate Elisa. Iye adabva kuti Elisa uyo ali ku Dotana.

Masocha ya ku Siriya, yadafika ku Dotana usiku nkuzungulira thaundi mweyo. Machibese, ntumiki wa Elisa padabula panja adawona gulu ya masocha mwiyo. Iye adachita mantha maninge ndipo adakuwa kuti: ‘Mayo ine! Tichite tani pamwapa ambuya?’ Koma Elisa adamuuza kuti: ‘Ayi kugopa, isepano tina azinji kuposha womwe ali na iwo.’ Manje Yahova adafungula maso ya ntumiki moyu ndipo adawona kuti m’mapiri yose yozungulira thaundi mweyo, mwenze makavalo na ngolo za nkhondo zogaka moto.

Pomwe masocha ya Asiriya yambafuna kuphata Elisa, iye adapemphera kuti: ‘Pulizi Yahova, wachitiseni kuti aleke kunizindikira.’ Mwadzidzidzi, masocha yale yadazindikira kuti yankudziwalini komwe yali podiya kuti yambawona. Patsogolo pake Elisa adayauza kuti: ‘Imwepo mwasokera. Bwerani kuno nikuperekezeni kwa munthu yemwe munkumufuna.’ Masocha yale yadayamba kumutewera mpakana kukafika ku Samariya komwe mpfumu ya Aizirayeli imbakhala.

Pamwapa ndipo pomwe masocha yale yadazindikira kuti yali kuponi. Mpfumu ile paidawawona idabvunza Elisa kuti: ‘Ko niwaphe?’ Ko Elisa adawona kuti moyu wenze mwayi wakuti aphe wanthu mwawa? Neye. Patsogolo pake adauza mpfumu mwiyo kuti: ‘Ayi kuwapha. Wapaseni chakudya adye, patsogolo pake muwabvumize kuti ayende.’ Pamwapo mpfumu mwiyo idawakonzera phwando ikulu. Padamaliza kudya, adanyamuka nkumbayenda kwawo.