Kamtsikana kadathandiza nkulu wa masocha

Kamtsikana kanango ka ku Izirayeli, kadatengewa nkumbakakhala ninge kapolo ku Siriya komwe kwenze kutali maninge na kwawo. Gulu ya masocha ya Asuri ni yomwe idatenga kamtsikana mwaka. Ku Siriya muko kambaphata basa kwa nkulu wa masocha dzina yake Namani. Kamtsikana mwaka kambatumikira Yahova podiya kuti wanthu wa kumuko ambatumikira milungu yabodza.

Namani wenze na matenda ya khate ndipo ambabva kuwawa maninge. Kamtsikana mwaka kambafunisisa kuthandiza Namani. Patsogolo pake, kadauza akazi wa bwana wake mwawo kuti: ‘Ninkudziwa munthu yemwe angakwanise kuwapolesa abwana mwawa. Munthu wake ni Elisa. Ndipo akhala ku Izirayeli. Shuwadi, angakwanise kuwapolesa.’

Nkazi wa Namani adauza mwamuna wake va nkhani mweyi. Namani adayendadi ku Izirayeli kuti akagumane na Elisa. Padafika kumuko, ambaganiza kuti Elisa amupase ulemu wapadzulu ninge munthu wolemekezeka. Koma Elisa alibe olo kuyankhula naye, adandotumiza nyabasa wake kuti akamumonise nkumuuza kuti: ‘Yendani mukasambe maulendo 7 mukamadzi ka Yorodano. Mukachitateno mupole.’

Padabva vimwevi, Namani adakalipa maninge. Iye adanena kuti: ‘Nimbaganiza kuti mneneri moyu anipolese pakuchemera mudzina ya Mulungu wake komasoti kufambisa djanja yake uku na uku. Manje ko ankuniuza kuti nindoyenda kukamadzi kukasamba basi? Ko ankudziwalini kuti ku Siriya kunamadzi kuposha ya ku Izirayeli kuno? Ko nidakandoyendalini kukasamba ku tukamadzi twa kwathu muku?’ Pamwapo Namani adanyamuka mwaukali nkumbayenda.

Koma anyabasa wake adamuthandiza kuti aiganizire bwino nkhani mweyi. Adamuuza kuti: ‘Ko mungachitelini chirichose chomwe chingakuthandizeni kuti mupole? Ndipomwapa, vomwe mneneri moyu wanena ivi nivosashupa. Ko mwatani kundochita vomwe wakuuzani?’ Namani adabvera anyabasa wake mwawo ndipo adayenda ku kamadzi ka Yorodano nkukasamba ka 7. Padasamba komalizira, adandowona kuti khate yake yose yamala. Pamwapo adakondwa maninge ndipo adayenda kwa Elisa kukamutembeja. Adamuuza kuti: ‘Manje nadziwa kuti Yahova ni Mulungu chaiye.’ Ko unkuganiza kuti kamtsikana kale kadabva tani pakadawona Namani ankubwera ndipo wapolesewa?