Yahova adathandiza mpfumu Yehosafati

Yehosafati wenze mpfumu ya Ayuda ndipo adagwesa malo yoperekera ntsembe ya Baala komasoti adadzonga mafano yose ya mudziko mwiyo. Yehosafati ambafuna kuti wanthu adziwe malamulo ya Yahova. Ndipomwapa adatumiza Alevi na wanthu wodziwa Chilamulo kuti akapfunzise wanthu malamulo ya Yahova mu Yuda mose.

Wanthu wa madziko yapafupi na Ayuda, ambagopa kumenyana nawo ndawa ambadziwa kuti Yahova wenze nawo. Wanthu mwawo mpakana ambapereka mphaso kwa mpfumu Yehosafati. Koma Amowabu, Aamoni na wanthu wochokera ku Seiri adabwera kuti adzamenyane na Ayuda. Pamwapo Yehosafati adadziwiratu kuti ankufunika kuthandiziwa na Yahova. Patsogolo pake adachemeresa amuna, akazi na wana kuti abwere ku Yerusalemu. Wanthu mwawo padafika, iye adapemphera kuti: ‘Yahova, palibe imwepo tingawinelini nkhondo mweyi. Pulizi tithandizeni, ndawa tinkudziwalini chati tichite.’

Yahova adadawira pemphero mweyi. Ndipo adalewa kuti: ‘Ayi kugopa, ndawa nikuthandizeni. Khalani m’malo yanu muli imirire na kuwona ninkukupulumusani.’ Ko Yahova adawathandiza tani?

Mangwana yake, Yehosafati adasankhula wanthu woimba nkuwauza kuti ambafambe patsogolo pa masocha. Wanthu mwawo adafamba kuchoka ku Yerusalemu mpakana ku Tekowa komwe kudachitikira nkhondo mwiyo.

Iwo ambaimbira Yahova mokuwa ndipo Yahova adamenyera nkhondo wanthu wake. Adachitisa kuti Amowabu na Aamoni ayambe kuphana wokhawokha, ndipo palibe yemwe adapulumuka. Koma Yahova adateteza Ayuda, masocha komasoti antsembe. Wanthu wa madziko yapafupi na Ayuda adabva vomwe Yahova adachita, ndipo adadziwa kuti iye ankuwathandiza wanthu wake. Ko Yahova apulumusa tani wanthu wake? Iye awapulumusa mu njira zosiyanasiyana, afunalini kuthandiziwa na wanthu kuti achite vimwevo.