Yahova adasankhula Yoswa

Mose adatsogolera ntundu wa Aizirayeli kwa magole yazinji. Manje padasala pang’ono kumwalira, Yahova adamuuza kuti: ‘Iwepo udzawangeneselini Aizirayeli mu Dziko Yopolomisiwa, koma nindodzakuonesa Dziko mwiyo.’ Patsogolo pake, Mose adakumbira Yahova kuti asankhule ntsogoleri munango wakuti ambatsogolere wanthu mwawa. Yahova adamuuza kuti: ‘Yenda kwa Yoswa ndipo ukamuuze kuti ndiye yemwe namusankhula.’

Mose adauza Aizirayeli kuti ndawa yakuti iye wenze adasala pang’ono kumwalira, Yahova adasankhula Yoswa kuti awatsogolere pongena mu Dziko Yopolomisiwa. Manje Mose adauza Yoswa kuti: ‘Ayi kuchita mantha, Yahova akuthandize.’ Patsogolo pake, Mose adayenda padzulu pa phiri ya Nebo, kumuko Yahova adamuonesa Dziko yomwe Adapolomisa Abulahamu, Isaki na Yakobo. Pamwapo Mose adamwalira anamagole 120.

Pamwapo Yahova adauza Yoswa kuti: ‘Muyambuke kamadzi ka Yorodano na kungena mu dziko ya Kanani nikuthandize ninge momwe nimbachitira na Mose. Umbawerenge malamulo yangu ntsiku iriyose. Khala wolimba ntima ndipo ayi kuchita mantha, yenda ukachite vomwe nakuuza.’

Yoswa adatumiza wanthu awiri kuti ayende akaone thaundi ya Yeriko. Mu nkhani inkubwera, tidzaone vomwe vidachitikira wanthu mwawa padafika kumuko. Padabwererako iwo adalewa kuti, manje yenze nthawe yakuti Aizirayeli angene mu dziko ya Kanani. Mangwana yake Yoswa adauza Aizirayeli kuti anyamuke. Patsogolo pake adauza wantsembe omwe ambatakula likasa ya pangano kuti atsogole nkuyenda mu kamadzi ka Yorodano. Pa nthawe mweyo nkuti kamadzi mwaka kenze kadadzala. Koma wantsembe mwawo padandoponda mukamadzi mumo, kamadzi mwako kadayamba kuphwira iwo adafamba nkufika pakati pa madzi ndipo adaimirira pamwapo mpakana Aizirayeli wose kuyambuka. Panango vomwe adachita ivi vidawakumbusa Aizirayeli vomwe Yahova adachita pa Nyanja Ifuwira.

Padafamba kwa magole yazinji, manje Aizirayeli adafika mu Dziko Yopolomisiwa. Iwo adayamba kumanga manyumba, mathaundi, adalima minda nkubzala uva, vipaso na mbewu zosiyanasiyana. Imweyi yenzedi dziko yofamba nkaka na uchi.