Amuna 12 adayenda kukaona dziko ya Kanani

Aizarayeri padachoka ku phiri ya Sinai, adapita na muchipululu cha Parana n’kukafika pa malo yochemerewa Kadesi. Ali pa malo mwayo Yahova adauza Mose kuti: ‘Sankhula amuna 12 ochokera ku dzinza iriyose kuti ayende kukaona dziko ya Kanani yati nikupaseni.’ Pamwapo Mose adasakhula amuna 12 wale n’kuwauza kuti: ‘Yendani ku Kanani, mukaone peno dziko mweyo ni yabwino kulimamo minda na kubzalamo mbewu. Mukaone pomwe kuti peno wanthu wake ni wamphanvu panango wofoka komasoti akhala m’misasa panango m’mathaundi.’ Pavidateno, wanthu mwawo adayamba ulendo woyenda ku Kanani ndipo pagulu mwapo penze Yoswa na Kalebe.

Pazidapita ntsiku 40, amuna mwawo adabwerera ndipo adatenga vipaso va nkhuyu, makangadza na uva. Iwo adati: ‘Dziko yake ni yabwino maninge koma wanthu wakumuko ni wa mphanvu ndipo akhala m’mathaundi yamipanda yataliyatali. Pamwapo Kalebe adalewa kuti: ‘Tingakwanise kuwagonjesa, naboni tiyende. Ko unkudziwa ndawa yake Kalebe adalewa vimwevi? Ndawa yakuti iye na Yoswa ambakhulupirira maninge Mulungu. Koma wanthu anango 10 wale adalewa kuti: ‘Neye, ayi kuti tiyende. Wanthu wake ni akuluakulu komasoti ni wamphanvu mwakuti isepano timbandowoneka ninge twabombo.’

Aizirayeli padabva vimwevi, adakhumudwa maninge. Adayamba kudandaula kuti: ‘Naboni tisankhule ntsogoleri munango kuti tibwerere ku Iguputo. Shuwa tiyende tikaphewe?’ Koma Yoswa na Kalebe adalewa kuti: ‘Wanthu imwe, naboni tibvere Yahova ayi kuti tichite mantha, Yahova atiteteze.’ Koma Aizarayeri mwawo alibe kubvera mwakuti ambafuna kupha Yoswa na Kalebe!

Ko Yahova adachita tani? Iye adauza Mose kuti: ‘Aizirayeli nawachitira vinthu vizinji, koma iwo ankufunalini kunibvera. Ndawa ya vimwevi, akhale muchipululu kwa magole 40 ndipo wose afere mumo. Koma omwe akangene m’dziko yomwe nawapolomisa pabodzi na wana wawo, ni Yoswa na Kalebe.’