Kapolo yemwe ambabvera Mulungu

Yosefe wenze mwana wachiwiri pa wana womalizira wa Yakobo. Azibale wake ambaona kuti Yosefe wenze mwana yemwe ambakondewa maninge. Ko iwo ambamuona tani? Azibale wake ambamuzonda maninge. Ntsiku inango Yosefe adalota maloto yodabwisa, ndipo adafotokozera azibale wake va maloto mwayo. Koma iwo alibe kukondwa nayo maloto mwayo ndipo ambaganiza kuti ntsiku inango Yosefe ankufuna kuti adzakhale mpfumu yawo. Ndawa ya vimwevi chizondo chire chidaingizirika!

Ntsiku inango azibale wake wa Yosefe, adayenda kukadyesera vipfuwo va ababa wawo pafupi na thaundi inango yochemerewa Sekemu. Manje Yakobo adatumiza Yosefe kuti akawone azibale wake peno alitani. Koma pomwe iwo adamuona ankubwera adayamba kukambirana kuti: ‘Wonani wamaloto ule uyo ankubwera, naboni timuphe.’ Padateno adamuphata nkumuthusira mu chinchera chonoka. Koma m’bodzi mwa azibale wake mwawo adalewa kuti: ‘Ayi kuti timuphe, naboni tindomugulisa kuti akakhale kapolo.’ Pamwapo adamugulisa na kobiri zasiliva zokwana 20 kwa wamalonda wa Chimidiyani omwe ambayenda ku Iguputo.

Patsogolo pake, azibale wake mwawo adatenga chovala chake chakunja nkuchivuika m’magazi ya mbuzi. Manje padafika kumuyi adapasa ababa wawo chovala mwicho nkulewa kuti: ‘Ko chovala ichi mungachizindikire panango ni cha Yosefe?’ Yakobo padaona adaganizira kuti Yosefe wadyewa na chilombo. Ndipo adabva chisoni maninge nkuyamba kulira komasoti ambanyamalisikalini.

Wamalonda wale padafika ku Iguputo, adamugulisa Yosefe kwa munthu waudindo dzina yake Potifala. Pamwapo Yosefe adakhala kapolo, koma Yahova wenze naye. Potifala padaona kuti Yosefe wenze wolimbikira basa komasoti wothembeka, adamuikha kuti ambanyang’anire vinthu vake vose.

Nkazi wa Potifala adaona kuti Yosefe wenze mulumbwana wooneka bwino komasoti wamphanvu. Ntsiku iriyose ambamuuza kuti agone naye. Manje ko Yosefe adachita tani? Yosefe ambalamba ndipo ambamuuza kuti: ‘Neye vimwevi ni vabwinolini, abwana wangu anithemba ndipo imwepo ndimwe nkazi wawo. Manje ningachitirenyi choipa chikulu tene kuchimwira Mulungu?’

Ntsiku inango nkazi wa Potifala adamuchichimiza pomwe Yosefe kuti agone naye mwakuti adamuphata malaya yake koma Yosefe adathawa. Potifala padabwera nkazi muyo adanama kuti Yosefe ambafuna kumuponderera. Patsogolo pake, Potifala adakalipa maninge ndipo adaikha Yosefe mu djeri. Koma Yahova alibe kumuyebwa Yosefe.