Adakhala na mwana pomwe enze wokalamba!

Abulahamu na Sara, enze m’banja kwa magole yazinji. Iwo adasiya nyumba yabwino ku Uri nkuyenda nkumbakhala m’matenti. Koma Sara ambadandaulalini na vimwevi ndawa yakuti ambakhulupirira Yahova.

Sara ambafunisisa kukhala na mwana mwakuti adauza Abulahamu kuti: ‘Hagara nyabasa wangu uyu, achikhala na mwana ningambamuone ninge wangu.’ Kuyenda kwa nthawe Hagara adakhaladi na mwana mwamuna dzina yake wenze Isimayeli.

Payadapita magole yazinji, kumuyi kwa Abulahamu na Sara kudafika alendo atatu. Pa nthawe mweyi nkuti Abulahamu wenze na magole 99 ndipo Sara wenze na magole 89. Abulahamu adapasa alendo mwawo malo yokhala n’nyantsi mwamuti kuti apumulepo ndipo adawakonzera chakudya. Ko unkudziwa kuti alendo mwawa enze mbani? Enze angelo. Alendo mwawo adauza Abulahamu kuti: ‘Gole yamangwana nthawe ninge mweino iwepo na nkazi wako mudzakhale na mwana mwamuna.’ Sara ambatetekera pomwe wenze mu tenti ndipo adayamba kuseka. Iye ambaganizira kuti: ‘Koma nishuwadi momwe inepano nakalambiraumu ningakhaledi na mwana?’

Ndipo gole mwiyo paidafika, vomwe mngelo ule adalewa vidachitikadi. Sara adabereka mwana mwamuna ndipo Abulahamu adamupasa dzina yakuti Isaki kutanthauza ‘kuseka.’

Pomwe Isaki wenze na magole 5, Sara adaona Isimayeli ankumuseka Isaki. Pakufuna kuteteza mwana wake moyu, Sara adauza Abulahamu kuti athamangise Hagara na Isimayeli. Pakuyamba Abulahamu ambafunalini kuchita vimwevo. Koma Yahova adamuuza kuti: ‘Bvera vomwe Sara wanena. Nidzasanalire Isimayeli koma vomwe nidakupolomisa vile vidzakwanirisiwe kupitira mwa Isaki.’