Abulahamu na Sara adabvera Mulungu

Pafupi na ntsanja ya Babele, penze thaundi inango yochemerewa Uri. Wanthu wa mu thaundi momu, ambatumikira milungu osati Yahova. Koma mu thaundi momu mwenze munthu munango yemwe ambatumikira Yahova, dzina yake ni Abulahamu.

Ntsiku inango Yahova adauza Abulahamu kuti: ‘Fuluka mu thaundi momu ndipo uyende ku dziko inango yomwe nidzakuuze.’ Pamwapa Abulahamu ambafunika kusiya nyumba yake na azibale wake. Patsogolo pake, Yahova adamuza pomwe kuti: ‘Nidzachitise kuti ntundu wako ukhale ukulu ndipo ndawa ya iwepo nidzadalise ntundu wako pa dziko yose yapasi.’

Abulahamu ambadziwalini komwe Yahova ankufuna kuti iye ayende, koma ambakhulupirira maninge Yahova. Patsogolo pake, iye na nkazi wake Sara adalongedza vinthu vawo nkuyamba ulendo wawo utali. Pa ulendo moyu adanyamuka pomwe na ababa wake a Tera komasoti Loti yemwe wenze mwana wa ng’ono wake.

Pa nthawe mweyi Abulahamu wenze na magole 75, pomwe iye na banja yake padafamba ulendo utali adafika mu dziko yomwe Yahova adamuwuza. Dziko mwiyo imbachemerewa kuti Kanani. Ali kumuko Mulungu adayankhula na Abulahamu nkumupolomisa kuti: ‘Dziko yose mweyi nidzaipereke kwa wana wako.’ Pa nthawe mweyi Abulahamu na Sara enze okalamba ndipo enze alibe wana. Manje ko Yahova adakwanirisa tani polomisi yake mweyi?