Ko Beteli ni chani?

Beteli ni dzina yachiheberi yomwe ichathandawuza ‘nyumba ya Yahova.’ (Genesis 28:17, 19) Dzina mweyi niyodikana kuchemerewa pakufotokoza malo yophatira basa pakufambisa patsogolo basa yolalikira ya Mboni za Yahova padziko yose yapasi. Bungwe yotonga ichakhala ku likulu yapadziko yose ku Nova York, EUA, ndipo ichanyang’anira basa mu nthambi zizinji za madziko yanango. Womwe achatumikira pa malo mwaya ali ninge banja. Achakhala pabodzi na kuphatira basa pabodzi, achadyera pabodzi ndipo achapfunzirira pabodzi Baibolo. Ndipomwapa achadziwika kuti banja ya Beteli. —Salimo 133:1.

Ni malo yomwe wanthu achadzipereka kuti akondwerese Yahova. Amuna na akazi wachikhrisitu womwe achatumikira mu Mabeteli yose achachita vomwe Mulungu achada ndipo achathandiza basa ya Ufumu kwa nthawe zose. (Mateyu 6:33) Palibe yemwe achalipiriwa, koma wose achapasiwa malo yogona, chakudya na mali idiki-diki kuti ambagumanire vadikana va munthu payekha. Aliyese achapasiwa basa yake peno ni mu ofesi, kukhitchini, pamalo yodyera, kodindira mabukhu, kulongedza, kufula, kukonza vodzongeka na basa zinango.

Ni malo yomwe kuchaphatiwa basa zothandizira kulalikira. Chakulinga cha Beteli iliyose ni kukonza kuti chowonadi cha m’Baibolo chikhale chokwanira kwa wanthu azinji. Kabulosha kano ni chitsanzo cha vomwe vichachitika. Kamwaka kadakonzewa motsogolerewa na Bungwe yotonga, patsogolo pake kadatumiziwa ku magulu yazinji ya wotsumbudzulira padziko yose, kadadindiwa na mashini yomwe yachaphata basa mwankakulumize kuti kagawiwe kwa mipingu yopitirira 110.000. Kuti bukhu ikonzewe, banja ya pabeteli ichathandiza mwakhama basa yakudikana maninge yomwe ni kulalikira ntontholo wabwino. —Maliko 13:10.

• Ko ni mbani achatumikira pa Beteli ndipo iwo achakonzerewa chani?

• Ko ni basa iponi yakankulumize yomwe ichaphatiwa pa Beteli iliyose?