Ko Bungwe yotonga ichaphata tani basa ntsiku zino?

Mu nthawe za atumi, kagulu kadiki-diki kokonzewa na ‘ateweri na akulu ku Yerusalemu’ omwe angatumikira ninge bungwe yotonga, angasalula vinthu vakudekana maninge mudzina ya mpingu wa Akhrisitu wodzodzewa. (Machitidwe 15:2) Iwo angagumana mpfundo zakudikana ndawa yakubvesa Malemba pakutsogolerewa na mzimu wa Mulungu. (Machitidwe 15:25) Isembo tichatewedzera njira mweyi.

Ichatsogolerewa na Yahova kuti ambachite vomwe iye achada. Abale wodzodzewa womwe ankutumikira mu Bungwe yotonga achaphata basa yopfunzisa wanthu mawu ya Mulungu mwakhama. Iwo achasonkhana sodo iliyose kuti akambirane vomwe abale na alongo achadikana padziko yose. Ninge mwevenzere na Akhrisitu woyambirira, malangizo yochokera m’Baibolo yachaperekewa pakuphatisira basa makalata, onyang’anira madera, na abale anango. Vimwevi vichachitisa kuti gulu ya Mulungu ikhale yobverana mu vochita na voganiza. (Machitidwe16:4, 5) Bungwe yotonga ichasamalira na kukonzekeresa chakudya chawuzimu, ichalimbikisa basa yakulalikira va Ufumu na kuyikha na kunyang’anira mawudindo ya abale.

Achatewedzera malangizo ya mzimu wa Mulungu. Bungwe yotonga ichaphatisa basa malangizo ya Wolamulira wachilengedwe chose Yahova na Yesu Khrisitu yemwe ni msolo wa mpingu. (1 Akorinto 11:3; Aefeso 5:23) Wanthu wa m’Bungwe yotonga achadziwonalini ninge mafumu ya wanthu wa Mulungu. Iwo pabodzi na Akhrisitu wodzodzewa anango ‘achatewera mwana wankhosa kulikose kwangayende.’ (Chivumbulutso 14:4) Abale wa m’Bungwe yotonga achatembeja tikambawapempherera.

• Ko nimbani wenze mu bungwe yotonga mu nthawe za Akhrisitu woyambirira?

• Ko Bungwe yotonga ichagumana tani malangizo ya Mulungu ntsiku zino?