Samueli woyamba
12 Pomalizira, Samueli adauza Aizirayeli wose kuti: “Nachita vose vomwe* mudaniuza, ndipo nakusankhulirani mpfumu yakuti imbakutongeni. 2 Manje mpfumu ire ni mwiyi yomwe inkukutsogolerani.* Koma inepano nakalamba ndipo tsitsi yangu yachita invi. Wana wangu amuna ni mwawa omwe muli nawo ndipo inepano nakutsogolerani kuyambira niri kamulumbwana mpakana lero. 3 Inepano naimirira pano. Mupereke umboni pamaso pa Yahova na pamaso pa wodzodzewa wake. Ko alipo yemwe nidamutengera ng’ombe panango bulu wake? Panango ko alipo yemwe nidamuchitirako vinthu viribe chilungamo panango kumujerera? Ko nidatambirako bobobo kwa aliyese kuti nileke kuchita chilungamo? Peno nidachitako vimwevi ndine wokonzeka kukubwezerani.” 4 Iwo adadawira kuti: “Mulibe kutichitira vinthu viribe chilungamo, mulibe kutibera komasoti mulibe kutambira chirichose kwa isepano.” 5 Padateno, iye adawadawira kuti: “Yahova ni mboni yokutsutsani ndipo nayembo wodzodzewa wake ni mboni lero kuti mulibe kunigumana na mulandu uliwose.”* Iwo adanena kuti: “Inde, iye ni mboni.”
6 Pamwapo Samueli adauza wanthu mwawo kuti: “Yahova, yemwe adaphatisa basa Mose na Aroni, yemwe adabulisa pomwe azibereki wanu mu dziko ya Iguputo, ni mboni. 7 Manje bwerani pafupi kuti nikuweruzeni pamaso pa Yahova mobverana na basa zose zolungama zomwe Yahova wachitira imwepo na azibereki wanu.
8 Yakobo padandofika ku Iguputo, azibereki wanu nkuyamba kukumbira Yahova kuti awathandize, Yahova adatumiza Mose na Aroni kuti atsogolere azibereki wanu pakuchoka ku Iguputo kuti ambadzakhale mu dziko mwiyi. 9 Koma iwo adayebwa Yahova Mulungu wawo ndipo iye adawapereka* kwa Sisera nkulu wa masocha ya Hazori, komasoti kwa Afilisiti na kwa mpfumu ya Mowabu, ndipo wose mwawa adamenyana nawo. 10 Pamwapo adalirira Yahova kuti awathandize ndipo adati: ‘Tachimwa, ndawa tasiya kutumikira Yahova nkuyamba kutumikira Abaala na vifaniziro va Asitoreti. Manje tipulumuseni kwa azondi wathu kuti timbakutumikireni.’ 11 Patsogolo pake Yahova adatumiza Yerubaala, Bedani, Yefita na Samueli ndipo adakupulumusani kwa azondi wanu wose wokuzungulirani kuti mukhale pantendere. 12 Pomwe mudawona kuti Nahasi, mpfumu ya Aamoni, wabwera kudzamenyana namwe, mudayamba kuniuza kuti: ‘Neye, ise tinkufuna mpfumu basi,’ olo kuti Mpfumu yanu ni Yahova Mulungu wanu. 13 Manje mpfumu yomwe mwasankhula ni mweyi, mpfumu yomwe mudakumbira. Yahova wakusankhulirani mpfumu yakuti imbakutongeni. 14 Peno mudzagope Yahova, kumutumikira na kumubvera, ndipo peno mudzasiyelini malamulo ya Yahova komasoti peno imwepo na mpfumu yanu mudzatewere Yahova Mulungu wanu, viri bwino. 15 Koma mukasiya kubvera Yahova komasoti kutewedza malamulo ya Yahova, Yahova adzakulangeni imwepo komasoti ababa wanu. 16 Manje bwerani apa kuti muwone chinthu chikulu chomwe Yahova achite. 17 Ko ino ni nthawelini yokolola tirigu? Nikumbire kwa Yahova kuti achitise kudzulu kugunda na kugwesa nvula. Vikateno mudziwe komasoti kuzindikira kuti mwachita voipa maninge pamaso pa Yahova pakukumbira kuti mukhale na mpfumu.”
18 Pamwapo Samueli adakumbira kwa Yahova ndipo Yahova adachitisa kudzulu kugunda, nvula nkugwa ntsiku mwiyo. Wanthu wose adachita mantha maninge na Yahova komasoti Samueli. 19 Pavidateno, wanthu wose adauza Samueli kuti: “Tipempherereni isepano atumiki wanu kwa Yahova Mulungu wanu, ndawa tikufunalini kufa. Taingizira chinthu chinango choipa pa machimo yathu pakukumbira kuti tikhale na mpfumu.”
20 Koma Samueli adawauza kuti: “Ayi kuchita mantha. Nishuwadi kuti mwachita voipa vose mwevi. Koma olo nteno, ayi kusiya Yahova. Mumbamutumikire Yahova na ntima wanu wose. 21 Ayi kupatuka nkuyamba kutewera milungu yomwe yalibe basa* yomwe ni yosathandiza komasoti yangakupulumusenilini ndawa yalibe na basa.* 22 Ndawa ya dzina yake ikulu, Yahova adzasiyelini wanthu wake, ndawa Yahova wafuna kuti imwepo mukhale wanthu wake. 23 Komasoti ni vosakwanisika kuti inepano nichimwire Yahova pakusiya kukupemphererani. Ndipo nipitirize kukulangizani va njira yabwino na yolungama. 24 Koma mumbagope Yahova nkumbamutumikira mokhulupirika* komasoti na ntima wanu wose. Kumbukirani vinthu vikuluvikulu vomwe wakuchitirani. 25 Koma mukambachita vinthu voipa mwadala, mudzaphewe, imwepo pabodzi na mpfumu yanu.”