Samueli woyamba
10 Pamwapo Samueli adatenga botolo yadothi yomwe yenze na mafuta nkuikha mafuta mwayo pa nsolo pa Sauli. Patsogolo pake adamubejali nkunena kuti: “Yahova wakudzodza kuti ukhale mtsogoleri wa wanthu wake.* 2 Tikandosiyana, ugumane na amuna awiri pafupi na manda ya Rakele pa Zeliza, mu dera ya Benjamim. Iwo akuuze kuti: ‘Abulu omwe udayenda kukawafagafaga agumanika. Manje ababa wako aleka kuganizira va abulu mwawo koma anankhawa na imwepo mwakuti ankunena kuti: “Nichite tani ine, mwana wangu ankubweralini!”’ 3 Ukakachoka pamwapo, ukapitirize ulendo wako mpakana ukafike ku muti ukulu wa ku Tabori. Kumuko ukagumane na amuna atatu ankuyenda ku Beteli kukatumikira Mulungu chaiye. M’bodzi akhale ali takule wana atatu wa mbuzi, munango ali takule mikate yatatu ndipo munango ali takule mtsuko ukulu wa vinyu. 4 Wanthu mwawo akakutambire nkukupasa mikate yawiri ndipo ukatambire. 5 Ukakachoka pamwapo, ukafike ku phiri ya Mulungu chaiye, komwe kukukhala masocha ya Afilisiti. Ukakafika muthaundi ukagumane na kagulu ka aneneri akuchokera ku malo yokwizika, akunena vakutsogolo. Patsogolo pawo pakakhale wanthu oimba maseche, vinonje, zeze na voimbira va vingwe. 6 Yahova akakupase mphanvu ndipo iwepo ukayambe kuneneratu vakutsogolo pabodzi na aneneri mwawo komasoti ukachinje maninge. 7 Manje vinthu vose vimwevi vikakachitika, ukachite chirichose chomwe ungakwanise ndawa Mulungu chaiye ali nawe. 8 Patsogolo pake ukatsogole kuyenda ku Giligala. Inepanombo niyende kumuko kuti nikapereke ntsembe zoshoka na ntsembe za mbverano. Ukanidikhire kwa ntsiku 7 mpakana inepano nidzafike ndipo nikadzafika nidzakuuze vomwe udzachite.”
9 Sauli padandosiyana na Samueli, Mulungu adayamba kuchinja ntima wake nkukhala ninge wa munthu munango, mwakuti vose vire vidachitikadi ntsiku mwaire. 10 Sauli na ntumiki wake adanyamuka nkuyenda kuphiri kule. Kumuko adagumana na kagulu ka aneneri. Nthawe mwiyo, Mulungu adamupasa mphanvu ndipo nayembo adayamba kunena vakutsogolo. 11 Wanthu wose omwe ambamudziwa padamuwona ankuneneratu vakutsogolo pabodzi na aneneri, adayamba kubvunzana kuti: “Ko mwana wa Kisi muyu wachita tani? Ko Sauli nayembo ni mneneri?” 12 Pamwapo munthu munango adati: “Manje aneneri anango awa ababa wawo ni mbani?” Pamwapa ndipo payadayambira mawu* yakuti: “Ko Sauli nayembo ni mneneri?”
13 Padamaliza kuneneratu vakutsogolo, Sauli adafika ku malo yokwizika. 14 Pamwapo m’bale wa ababa wake adabvunza Sauli na nyabasa wake kuti: “Ko mwenze mwayenda kuponi?” Iye adadawira kuti: “Tenze tayenda kukafaga abulu koma tiribe kuwagumana. Pamwapo tidayenda kwa Samueli.” 15 Pamwapo m’bale wa ababa wake mwawo adabvunza kuti: “Niuzeni, ko Samueli wakuuzani chani?” 16 Sauli adadawira kuti: “Watiuza kuti abulu agumanika kale.” Koma alibe kunenako va nkhani ya ufumu yomwe Samueli adamuuza ire.
17 Patsogolo pake Samueli adasonkhanisa wanthu ku Mizipa kuti akagumane na Yahova. 18 Iye adauza Aizirayeli mwawo kuti: “Yahova Mulungu wa Aizirayeli wanena kuti: ‘Ndine yemwe nidabulisa Aizirayeli ku Iguputo komasoti yemwe nidakupulumusani kwa Aiguputo na mafumu yose yomwe yambakuboneresani. 19 Koma lero mwalamba Mulungu yemwe adakupulumusani m’masautso yanu yose komasoti mabvuto yanu, ndipo mudanena kuti: “Neye, mutisankhulire mpfumu yomwe imbatitonge.” Manje imani pamaso pa Yahova motewedza madzinza yanu na mabanja yanu.’”*
20 Patsogolo pake Samueli adabweresa pafupi dzinza iriyose ndipo dzinza ya Benjamim idasankhuliwa. 21 Pamwapo adabweresa pafupi dzinza ya Benjamim mobverana na mabanja yawo ndipo banja ya Amatiri idasankhuliwa. Pomalizira, Sauli mwana wa Kisi adasankhuliwa. Koma padamufaga, alibe kumugumana. 22 Pamwapo adabvunza pomwe Yahova kuti: “Ko munthu muyu wafika kale kuno?” Yahova adadawira kuti: “Uyo, wabishala pakati pa mitolo.” 23 Pamwapo wanthu adathamanga nkukamutenga. Padaimirira pakati pa wanthu mwawo, ambawoneka ntali maninge mwakuti palibe aliyese yemwe ambapitirira m’maphewa yake. 24 Manje Samueli adauza wanthu wose mwawo kuti: “Ko mwaona munthu yemwe Yahova wamusankhula kuti palibe aliyese wolingana naye?” Wanthu wose mwawo adayamba kukuwa kuti: “Mpfumu ikhale na moyo utali!”
25 Samueli adauza wanthu mwawo vinthu vomwe mpfumu ifunika kutambira kwa iwo ndipo adavinemba m’bukhu nkuiikha mu tenti ya Yahova. Patsogolo pake Samueli adauza wanthu mwawo kuti abwerere kwawo. 26 Nayembo Sauli adayenda kwawo ku Gibeya, ndipo wenze na masocha yomwe Yahova adayachitisa kuti yayende naye pabodzi. 27 Koma wanthu anango wachabechabe ambanena kuti: “Ko munthu muyu angakwanisedi kutipulumusa?” Pamwapo adayamba kumunyoza, mwakuti alibe kumubweresera mphaso iriyose. Koma Sauli alibe kuyankhula chirichose.*