Deuteronomo

4 “Manje imwepo Aizirayeli, bverani malangizo na vigamulo vomwe ninkukupfunzisani kuti mumbavitewedze. Mukachita teno mudzakhale na moyo nkukangena mudziko yomwe Yahova Mulungu wa azibereki wanu ankukupasani kuti mukaitenge nkukhala yanu. 2 Ayi kuingizirapo kalikose pa mawu yomwe ninkukulamulani, ndipo ayi kuchosapo kalikose pa mawu mwaya, kuti mumbasunge malamulo ya Yahova Mulungu wanu yomwe ninkukupasani.

3 Imwepo mudaona na maso yanu vomwe Yahova adachita pa nkhani ya Baala wa ku Peori. Yahova Mulungu wanu adadzonga munthu aliyese pakati panu yemwe adalondola Baala wa ku Peori. 4 Koma mose imwepo omwe mwaphatisisa Yahova Mulungu wanu munamoyo lero. 5 Onani, nakuuzani malangizo na vigamulo mobverana na vomwe Yahova Mulungu wangu wanilamula. Kuti mumbakatewedze mwivo mudziko yomwe munkuyenda kukaitenga kuti ikhale yanu. 6 Mumbakatewedze malangizo na vigamulo mwivi mosamala maninge, ndawa mukachita mwivi mudzaonese kuti ndimwe wanzeru na ozindikira pamaso pa wanthu wa makhaindi yanango omwe adzabve va malangizo yose mwaya ndipo adzanene kuti: ‘Ntundu ukulu muyu ni wa wanthu wanzerudi na ozindikira. 7 Pale Yahova Mulungu wathu adawira mapemphero yathu nthawe zose. Ko panantundu unango wamphanvu womwe milungu yake yali nawo pafupi tene? 8 Ndipo ni ntundu unango uponi wamphanvu womwe unamalangizo na vigamulo volungama volingana na Chilamulo chose mwichi chomwe ninkukupasani lero?

9 Koma samalani ndipo mukhale tcheru* kuti osati muyebwe vinthu vomwe maso yanu yadaona, nakuti vinthu mwivo osati vichoke m’mitima yanu ntsiku zose za moyo wanu. Wana wanu na azizukulu wanu mumbawauzembo vinthu mwivo. 10 Pantsiku yomwe mudaima pamaso pa Yahova Mulungu wanu ku Horebe, Yahova adaniuza kuti: ‘Sonkhanisa wanthu kwa inepano kuti abve mawu yangu, na cholinga chakuti apfunzire kunigopa ntsiku zose zomwe iwo adzakhale na moyo mudziko iyi komasoti kuti apfunzise wana wawo.’

11 Manje wanthu imwe mudafenderera nkuimirira m’nyantsi mwa phiri. Phiri mwiyo imbagaka moto womwe umbafika kudzulu,* ndipo kwenze mdima na ntambo upsyipa. 12 Pamwapo Yahova adayamba kuyankhula namwe kuchokera m’moto. Imwepo mudabva mawu koma mulibe kuona kalikose. Mudandobva mawu yokha basi. 13 Iye adakuuzani pangano yake, panango kuti Malamulo Khumi,* yomwe adakulamulani kuti mumbayatewedze. Patsogolo pake adanemba Malamulo mwayo paminyala yawiri yosema. 14 Panthawe mwiyo Yahova adanilamula kuti nikupfunziseni malangizo na vigamulo, vomwe munkufunika kumbakavitewedza mukakangena mudziko yomwe munkuyenda kukaitenga kuti ikhale yanu.

15 Mukhale tcheru,* ndawa pantsiku yomwe Yahova adayankhula namwe kuchokera pakati pa moto ku Horebe, mulibe kuona kalikose m’moto muyo. 16 Manje samalani kuti osati muchite vinthu mosakhulupirika pakukonza chirichose chosema, chifaniziro chirichose chimuna panango chikazi, 17 chifaniziro cha nyama iriyose ya padziko yapasi panango chifaniziro cha mbalani iriyose yombululuka mum’lengalenga, 18 chifaniziro cha chinthu chirichose chomwe chikwawa pasi panango chifaniziro cha ntsomba iriyose yam’madzi yapasi pa dziko. 19 Mukanyang’ana kudzulu nkuwona dzuwa, mwezi na nyenyezi, gulu yose ya vinthu vakudzulu, ayi kumbatengeka navo nkuyamba kuvigwadira na kuvitumikira. Yahova Mulungu wanu wavipereka kwa wanthu wose okhala padziko yapasi. 20 Ayi kuchita mwivo ndawa Yahova ndiye adakutengani nkukubulisani mu uvuni wosungunulira visimbi, adakubulisani mu Iguputo, kuti mukhale wanthu wake,* ninge mwamuliri lero.

21 Yahova adakalipa nane ndawa ya imwepo, ndipo adalumbira kuti adzanibvumizelini kuti niyambuke Yorodano panango kuyenda mudziko yabwino maninge yomwe Yahova Mulungu wanu adakupasani kuti ikhale yanu. 22 Inepano nifere mudziko ino. Niyambukelini Yorodano, koma imwepo muyambuke nkukatenga dziko yabwino mwiyi. 23 Samalani kuti osati muyebwe pangano ya Yahova Mulungu wanu yomwe adachita namwe ndipo ayi kukonza chifaniziro chosema, chifaniziro cha chinthu chirichose chomwe Yahova Mulungu wanu adakulambizani. 24 Ndawa Yahova Mulungu wanu ni moto wodzonga, iye ni Mulungu yemwe afuna kuti wanthu ambadzipereke kwa iye yekha basi.

25 Mukakakhala na wana komasoti azizukulu ndipo mukakakhala nthawe itali mudziko mumo, nkumbachita vinthu vokudzongesani pakukonza chifaniziro chosema cha chinthu chirichose, nkuchita choipa pamaso pa Yahova Mulungu wanu, mwakuti nkumukalipisa, 26 lero ninkuikha kudzulu na dziko yapasi ninge mboni zokutsutsani, kuti mudzafe mwakankulumize mudziko yomwe munkuyenda kukaitenga mukayambuka Yorodano. Shuwadi, mudzakhalelini kwa nthawe itali mudziko mumo ndawa mudzadzongewe. 27 Yahova adzakunyaluseni pakati pa makhaindi yanango, ndipo wanthu ang’onong’ono okha pakati panu ndiwo wati adzapulumuke m’madziko ya makhaindi yomwe Yahova adzakuthamangisireni. 28 Kumuko mudzatumikire milungu yamiti na yaminyala, yokonzewa na manja ya wanthu, milungu yomwe yangaonelini, kubva, kudya panango kununkhiza.

29 Mukadzafagafa Yahova Mulungu wanu muli kumuko, mukadzamufagafaga na ntima wanu wose na moyo wanu wose, mudzamugumanedi. 30 Pakumalizira pake, vinthu vose mwivi vikadzakuchitikirani nkukhala pa mabvuto yakulu, mudzabwerere kwa Yahova Mulungu wanu ndipo mudzabvere mawu yake. 31 Pale Yahova Mulungu wanu ni Mulungu wachifundo. Adzakusiyenilini panango kukudzongani panango kuyebwa pangano yomwe adalumbira kwa azibereki wanu.

32 Manje bvunzani va ntsiku zakalekale imwepo mukalibe kukhalako, kuchokera pantsiku yomwe Mulungu adalenga munthu padziko yapasi. Mufagefage kuchokera kumalekedzero yakudzulu nkukafika malekedzero yanango yakudzulu. Ko vinthu vikuluvikulu ninge mwivi vidachitikako kale, panango ko pali yemwe adabvako kale vinthu ninge mwivi? 33 Ko pali wanthu anango omwe adabvako kale mawu ya Mulungu yankubveka kuchokera pamoto ninge momwe imwepo mudayabvera nkupitiriza kukhala na moyo? 34 Panango ko Mulungu adayendako kale kukatenga ntundu wa wanthu kuti ukhale wake kuchokera pakati pa ntundu unango pakuphatisira basa viweruzo,* vizindikiro, vodabwisa, nkhondo, djanja yamphanvu, djanja yopfuthula na vinthu vopasa mantha volingana na vomwe Yahova Mulungu wanu adakuchitirani ku Iguputo imwepo munkuona? 35 Imwepo mwaonesewa vinthu mwivi kuti mudziwe kuti Yahova ni Mulungu chaiye. Palibe pomwe Mulungu munango kuchosapo iye. 36 Adakuchitisani kuti mubve mawu yake kuchokera kudzulu na cholinga chakuti akulangizeni kuti mumbamubvere. Padziko yapasi pano, iye adakuchitisani kuti muone moto ukulu, ndipo mudabva mawu yake yochokera pamoto muyo.

37 Ndawa yakuti ambakonda azibereki wanu ndipo adasankhula mbadwa* zawo zobwera patsogolo pawo, adakubulisani ku Iguputo na mphanvu zake zizinji ndipo ambakunyang’anirani. 38 Adachosa pamaso panu makhaindi yakuluyakulu na yamphanvu kuposha imwepo, kuti akungeneseni mudziko yawo nkukupasani kuti ikhale yanu ninge momwe viriri lero. 39 Ndipomwapa mudziwe lero, ndipo mumbakumbukire muntima mwanu kuti Yahova ni Mulungu chaiye, kudzulu na padziko yapasi. Palibe pomwe munango. 40 Mumbabvere malangizo na malamulo yake yomwe nikukulamulani lero kuti vinthu vikufambireni bwino, imwepo na wana wanu obwera patsogolo panu, kuti mukhale kwa nthawe itali mudziko yomwe Yahova Mulungu wanu ankukupasani.”

41 Panthawe mwiyo, Mose adapatula mathaundi yatatu mbali ya kumachibese kwa Yorodano. 42 Peno munthu wapha munzake mwangozi ndipo wenze akalibe wazondanako naye, munthu muyo ambathawire ku thaundi ibodzi pa mathaundi mwaya kuti akhale na moyo. 43 Mathaundi yake ni Bezeri, muchipululu chomwe chiri mudera yotunthumukako, yakuti wanthu wa dzinza ya Rubeni ambathawireko. Thaundi ya Ramoti ku Giliyadi, yakuti wanthu wa dzinza ya Gadi ambathawireko na thaundi ya Golani ku Basana, yakuti wanthu wa dzinza ya Manase ambathawireko.

44 Chilamulo chomwe Mose adapereka kwa Aizirayeli ni ichi. 45 Chilamulo mwicho ni vikumbuso, malangizo na vigamulo vomwe Mose adapasa Aizirayeli padabula mu Iguputo. 46 Adawapasa vimwivi ali pafupi na Yorodano, muchigwa, monyang’anana na Beti-peori. Dera mwiyi ni dziko ya Mpfumu Sihoni ya Aamori, yomwe imbakhala ku Hesiboni ndipo Mose na Aroni adaiwina pomwe adabula mu Iguputo. 47 Iwo adamutengera dziko yake mwiyo na dziko ya Ogi mpfumu ya Basana. Mwaya ni mafumu yawiri ya Aamori yomwe yenze kumbali ya kumachibese kwa Yorodano. 48 Dera mwiyi idayambira ku Aroweli m’mphepete mwa chigwa cha Arinoni mpakana kuphiri ya Sione, yomwe ni phiri ya Herimoni, 49 komasoti dera yose ya Araba mbali ya kumachibese kwa Yorodano, mpakana ku Nyanja ya Araba,* m’nyantsi mwa mitunthu ya Pisiga.