Deuteronomo

25 “Amuna akagegedzana ambayende kwa oweruza ndipo oweruza mwawo ambagemule mulandu muyo. Wosaphonya ambamuweruze kuti alibe mulandu ndipo wophonya ambamuweruze kuti anamulandu. 2 Peno wophonya muyo ankufunika kukwapuliwa, woweruza ambalamule kuti wophonya muyo amumphumise pasi, ndipo ambamukwapule pamaso pa oweruza muyo. Ambamukwapule mobverana na choipa chomwe wachita. 3 Angamukwapule mpakana mitchamu 40 koma osati yapitirire pamwapo. Peno angapitirize kumukwapula mitchamu yanango kuingizira pamwapa, m’bale wako muyo angachitisiwe manyazi iwepo unkuwona.

4 Ayi kumbamanga ng’ombe pakamwa ikambapula mbewu.”

5 Peno amuna paubale pawo ankukhala pafupi na pafupi, manje m’bodzi nkumwalira akalibe kubereka mwana mwamuna, nkazi wa womwalira muyo afunikalini kulowodwa na mwamuna wochokera m’banja inango. Atsano* wake ambayende kwa iye kukamutenga kukhala nkazi wawo, ndipo ambachite ukwati wa pachimulamu. 6 Mwana woyamba yemwe nkazi muyo angabereke, ambatenge dzina ya mwamuna womwalira ule, kuti dzina ya m’bale wake osati ipfudzike mu Izirayeli.

7 Manje peno mwamuna muyo ankufunalini kulowola nkazi wamasiye wa m’bale wake muyo, nkazi muyo ambayende kwa akulu pansuwo pa thaundi nkuwauza kuti: ‘M’bale wa mwamuna wangu walamba kusunga dzina ya m’bale wake mu Izirayeli. Alibe kubvuma kuti anilowole inepano mulamu wake.’ 8 Akulu wa thaundi mwiyo ambamuchemere nkuyankhula naye. Iye akapitiriza kulamba nkunena kuti: ‘Ninkufunalini kulowola nkazi muyu,’ 9 nkazi wamasiye muyo ambafenderere m’bale wa mwamuna wake muyo akulu mwawo ankuwona ndipo ambamuvule ntsapato nkumuthira mata kumaso* nkunena kuti: ‘Ivi ndivo vinfunika kuchitikira munthu yemwe walamba kumanga nyumba ya m’bale wake.’ 10 Manje dzina ya banja yake* mu Izirayeli imbadziwike kuti: ‘Nyumba ya munthu ule yemwe adavuliwa ntsapato.’

11 Peno amuna ankumenyana ndipo nkazi wa m’bodzi pa amuna mwawo wabwera kudzaletserera mwamuna wake kwa yemwe ankumumenya, ndipo nkazi muyo wapfuthula djanja yake nkuphata vidzo voberekera va mwamuna munango uyo, 12 mumbamugwate djanja nkazi muyo, ndipo ayi kumbamuchitira chifundo.*

13 M’sakha mwanu ayi kuti mumbakhale mipimo yawiri yosiyana yopimira kulemera kwa chinthu, ayi kumbakhala na mpimo ukulu na ung’ono. 14 M’nyumba mwanu ayi kuti mumbakhale vopimira viwiri vosiyana,* ayi kumbakhala na mpimo ukulu na mpimo ung’ono. 15 Mumbakhale na mpimo chaiye na woyenerera wopimira kulemera kwa chinthu na mpimo chaiye woyenerera wopimira kuwanda kwa vinthu kuti ntsiku zanu ziwande mudziko yomwe Yahova Mulungu wanu ankukupasani. 16 Ndawa munthu aliyese yemwe achita vimwivi alibe chilungamo ndipo ni wonyantsa kwa Yahova Mulungu wanu.

17 Mumbakumbukire vomwe Aamaleki adakuchitirani panjira pomwe mumbachoka ku Iguputo. 18 Iwo adagumana namwe panjira nkupha wanthu wose womwe ambafamba moshupikira m’mambuyo mwanu. Iwo adachita vimwivi pemwenze ofoka na oneta ndipo alibe kugopa Mulungu. 19 Manje Yahova Mulungu wanu akadzakupumulisani kwa wanthu wose wokuzungulirani omwe akuzondani, mudziko yomwe Yahova Mulungu wanu ankukupasani kuti muitenge kukhala yanu, mudzapfudze dzina ya Aamaleki padziko yapasi. Ayi kudzayebwa kuchita vimwivi.