Vomwe atumi adachita
9 Koma Saulo adapitiriza kugopsya wopfunzira wa Ambuya komasoti ambafunisisa kuwapha. Pamwapo adayenda kwa nkulu wa antsembe 2 kukakumbira mapepa yomubvumiza kuti ayende nayo kumasunagoge yaku Damasiko. Adakumbira mapepa mwayo kuti akakagumana aliyese wotewera Njira mwiyo, mwamuna panango nkazi, akamumange nkuyenda naye ku Yerusalemu.
3 Ali paulendo wake muyo, padasala pang’ono kufika ku Damasiko, mwadzidzidzi adandowona kugwerewera kochokera kudzulu kwamuzungulira. 4 Pavidateno adagwa pasi ndipo adabva mawu yakuti: “Saulo, Saulo, ndawa chani ukunidzudza?” 5 Iye adabvunza kuti: “Ambuya, ko ndimwe mbani?” Adamudawira kuti: “Ndine Yesu, yemwe ukumudzudza. 6 Nyamuka, ungene mu thaundi mweyi, ndipo ukauziwe vochita.” 7 Wanthu omwe enze naye pabodzi pa ulendo muyo, adandoima kusowa choyankhula. Iwo adabva mawu mwaya, koma alibe kuwona munthu aliyese. 8 Patsogolo pake Saulo adaimirira, koma podiya kuti ambanyang’ana, ambakwanisalini kuwona chinthu. Pamwapo adamuphata djanja nkumuperekeza ku Damasiko. 9 Saulo adakhala ntsiku zitatu osakwanisa kuwona ndipo ambadyalini panango kumwa chirichose.
10 Ku Damasiko kwenze wopfunzira munango dzina yake Hananiya. Patsogolo pake Ambuya adayankhula naye m’masomphenya kuti: “Hananiya!” Iye adadawira kuti: “Ine Ambuya.” 11 Pamwapo Ambuya mwawo adamuuza kuti: “Nyamuka uyende ku Nsewu Wasitiriti. Ukakafika panyumba ya Yudasi, ukabvunze va munthu munango dzina yake Saulo, waku Tariso. Iye ankupemphera, 12 ndipo m’masomphenya waona munthu dzina yake Hananiya wafika nkumuphata pamsolo kuti ayambe pomwe kuwona.” 13 Koma Hananiya adadawira kuti: “Ambuya, nabva kwa wanthu azinji va munthu moyu. Nabva voipa vose vomwe adachitira wochena wanu ku Yerusalemu. 14 Ndipo manjeuno antsembe akulu amupasa vimapepa vomubvumiza kuti amange wose wochemera pa dzina yanu.” 15 Koma Ambuya adamuuza kuti: “Yenda, ndawa munthu moyu ni chombo changu chosankhuliwa chotengera dzina yangu nkuyenda nayo kwa wanthu wa makhaindi yanango komasoti kwa mafumu na Aizirayeli. 16 Pakuti nidzamuwonese bwinobwino mabvuto yose yomwe adzagumane nayo ndawa ya dzina yangu.”
17 Pamwapo Hananiya adayenda kukangena munyumba mumo. Ndipo adamuphata pamsolo nkunena kuti: “Saulo m’bale wangu, Ambuya Yesu womwe adawonekera kwa iwepo pansewu omwe udabwera nawo, anituma. Anituma kwa iwepo kuti uyambesoti kuwona nakuti udzadziwe na mzimu uchena.” 18 Nthawe mwiyoletu tunthu towoneka ninge mamba ya ntsomba tudagwa kuchokera m’maso mwa Saulo ndipo adayamba pomwe kuwona. Patsogolo pake adayenda kukabatizika. 19 Padadya chakudya adakhala pomwe na mphanvu.
Iye adapitiriza kukhala ku Damasiko muko na wopfunzira ntsiku zing’onong’ono. 20 Nthawe mwiyo adayamba kulalikira va Yesu m’masunagoge, kuti moyu ni Mwana wa Mulungu. 21 Koma wanthu wose womwe adamubva akuyankhula, adadabwa maninge ndipo ambanena kuti: “Ko munthu moyu ni ulelini yemwe ambadzudza wanthu wa ku Yerusalemu wochemera pa dzina mweyi? Ko iye sikuti adabwera kuno kuti adzaphate* wanthu nkuyenda nawo kwa antsembe akulu?” 22 Koma Saulo adapitiriza kukhala na mphanvu zizinji ndipo ambasowesa nzeru Ayuda waku Damasiko powafotokozera mpfundo zobveka zotsimikizira kuti Yesu ni Khrisitu.
23 Pazidapita ntsiku zizinji, Ayuda mwawo adakonza chiwembu chakuti amuphe. 24 Koma Saulo adadziwa va chiwembu mwicho. Iwo ambafagafaga m’misuwo ya mipanda usiku na masikati kuti amuphe. 25 Pamwapo usiku, wopfunzira wake adamuikha m’dengu nkumubulisira pa janela ya mpanda nkumubulusira kunja.
26 Padafika ku Yerusalemu adayesesa kuti abverane na wopfunzira kumuko. Koma wose ambamugopa, ndawa ambakhulupiriralini kuti ni wopfunzira. 27 Pamwapo Baranaba adamuthandiza pakuyenda naye kwa atumi. Ndipo adawafotokozera bwinobwino momwe Saulo adawonera Ambuya omwe adayankhula naye pansewu. Adawafotokozera pomwe momwe Saulo adayankhulira molimba ntima ku Damasiko mu dzina ya Yesu. 28 Pavidateno adapitiriza kukhala nawo nkumbafamba mosadzibisa* mu Yerusalemu, ndipo angayankhula molimba ntima mu dzina ya Ambuya. 29 Iye angayankhulana na kutsutsana na Ayuda woyankhula Chigiriki. Koma iwo adayamba kufagafaga njira yakuti amuphe. 30 Abale padazindikira vimwevi, adayenda naye ku Kaisareya nkumutumiza ku Tariso.
31 Pamwapo mpingo ku Yudeya kose, ku Galileya na ku Samariya udayamba kukhala pantendere ndipo wenze wolimba. Ndawa yakuti wopfunzira angagopa Yahova* komasoti angalimbikisiwa na mzimu uchena, mpingo muyo umbakulirakulira.
32 Pomwe Petulo angafamba mudera yose mwiyo, adafika pomwe kwa wochena womwe angakhala ku Luda. 33 Kumuko adagumana munthu munango dzina yake Eneya, yemwe adakhala aligone pa m’beda wake kwa magole 8 ndawa wenze wozizira vidzo. 34 Pamwapo Petulo adamuuza kuti: “Eneya, Yesu Khrisitu ankukupolesa. Muka ndipo ukonzekonze pa m’beda pako.” Nthawe mwiyoletu adamuka. 35 Wanthu wose waku Luda na wa kuchigwa cha Sharoni padamuwona, adayamba kukhulupirira Ambuya.
36 Ku Yopa kwenze wopfunzira munango dzina yake Tabita, dzina yomwe itsumbudzuliriwa kuti Dorika.* Tabita ambachita vinthu vizinji vabwino ndipo ambapereka vinthu vizinji kwa wanthu wosauka. 37 Manje mu ntsiku zimwezo iye adadwala ndipo adamwalira. Pamwapo adamusambika nkumugonesa muchipinda cha mdzulu. 38 Pakuti Luda wenze pafupi na Yopa, wopfunzira mwawo padabva kuti Petulo ali muthaundi mweyi, adatuma wanthu awiri kukamukumbira kuti: “Pulizi mubwere kwathu kankulumize.” 39 Petulo padabva vimwevi, adanyamuka nkuyenda nawo pabodzi. Padafika, adamutenga nkuyenda naye muchipinda cha mdzulu chire. Akazi wose wamasiye adabwera kwa iye ankulira ndipo ambamuwonesa vovala vizinji na mikhanjo yomwe Dorika ambasona akanati kumwalira. 40 Petulo adauza wanthu wose kuti abule panja, pamwapo adagwada nkupemphera. Patsogolo pake adachungunuka nkunyang’ana munthu wakufa ule nkunena kuti: “Tabita, muka!” Pamwapo mayi muyo adafungula maso ndipo padawona Petulo, adamuka nkukhazikika. 41 Petulo adamuphata djanja nkumuyimiririsa. Padateno adachemera wochena wale komasoti akazi wamasiye wale, ndipo wose adawona kuti Tabita anamoyo. 42 Vimwevi vidadziwika ku Yopa kose ndipo wanthu azinji adakhulupirira Ambuya. 43 Petulo adapitiriza kukhala ku Yopa kwa ntsiku zing’onong’ono ndipo angakhala kwa munthu munango wopuka vikumba, dzina yake Simoni.