Wonembewa na Yohani
20 Ntsiku yoyamba ya sondo mwiyo, Mariya wa ku Magadala adayenda kumanda* muko machibese maninge kudakali mdima ndipo adaona kuti mwala wachosewa kale pa manda* mwapo. 2 Pamwapo adathamanga nkuyenda kwa Simoni Petulo na kwa wopfunzira munango yemwe Yesu angamukonda maninge ule. Iye adawauza kuti: “Ambuya achosewa m’manda mule ndipo tinkudziwalini kuti awaikha kuponi.”
3 Padateno, Petulo na wopfunzira munango ule adanyamuka kuyenda kumanda muko. 4 Wose awiri adayambira pabodzi kuthamanga. Koma wopfunzira munango ule angathamanga maninge kuposha Petulo ndipo ndiye adayambirira kufika kumanda muko. 5 Padakotama nkusuzira nkati, adawona nguwo zili pasi, koma alibe kungenamo. 6 Patsogolo pake, Simoni Petulo yemwe ambabwera m’mambuyo mwake adafikambo, ndipo adangena m’manda mumo. Mumo adawona nguwo zire zili pasi. 7 Nguwo yomwe adamukulungira kunsolo ilibe kuikhiwa pabodzi na nguwo zinango zire, koma adaifunyafunya nkuiikha payokha. 8 Patsogolo pake wopfunzira yemwe adayambirira kufika kumanda ule adangenambo nkati ndipo adaona nkukhulupirira vomwe adauziwa. 9 Iwo enze akanati kubvesa vomwe malemba yanena kuti Yesu afunika kumuka kwa wakufa. 10 Pamwapo opfunzira mwawo adabwerera kumuyi kwawo.
11 Koma Mariya adakhalilira panja pafupi na manda mwayo ankulira. Ankulira teno, adakotama kuti awone m’manda mumo 12 ndipo adaona angelo awiri omwe adavala vichena ali khale penze thupi ya Yesu. M’bodzi adakhala pasi kunsolo ndipo munango adakhala kuminyendo. 13 Iwo adamubvunza kuti: “Amayi, ndawa chani munkulira?” Amayi mwawo adadawira kuti: “Ambuya wangu atengewa ndipo nikudziwalini kuti aikhiwa kuponi.” 14 Padanena vimwevi, adachungunuka ndipo adaona Yesu ali imirire pamwapo, koma alibe kumuzindikira kuti ni Yesu. 15 Yesu adabvunza mayi muyo kuti: “Amayi imwe, ndawa chani munkulira? Ko munkufaga mbani?” Pakuganizira kuti ni munthu yemwe ambanyang’anira munda muyo, iye adamudawira kuti: “Amuna imwe, peno ndimwepo mwamuchosa, pulizi niuzeni komwe mwamuikha kuti nikamutenge.” 16 Yesu adamuuza kuti: “Mariya!” Iye adachungunuka nkumuuza mu Chiheberi kuti: “Rabôni!” (kutanthauza kuti “Mpfunzisi!”) 17 Yesu adamuuza kuti: “Ayi kuningingimira ndawa nthawe yakuti niyende kwa Ababa ikanati kukwana. Koma yenda kwa abale wangu ndipo ukawauze kuti: ‘Ine ninkuyenda kwa Ababa wangu na Ababa wanu, kwa Mulungu wangu na Mulungu wanu.’” 18 Mariya wa ku Magadala adayenda kwa opfunzira wale ndipo adawauza kuti: “Ine nawaona Ambuya!” Ndipo adawauza vomwe Yesu adamuuza vile.
19 Maulo ya ntsiku mwiyo, yomwe yenze ntsiku yoyamba ya sondo, wopfunzira mwawo adasonkhana pabodzi. Mu nyumba yomwe adasonkhana iyo adakhiya misuwo ndawa ambagopa Ayuda. Koma Yesu adangena nkuimirira pakati pawo ndipo adawauza kuti: “Ntendere ukhale namwe.” 20 Padanena vimwevi, adawawonesa manja yake na kumbabvu kwake. Pamwapo wopfunzira mwawo adakondwa padawona Ambuya mwawo. 21 Yesu adawauza pomwe kuti: “Ntendere ukhale namwe. Molingana na momwe Ababa adanitumira, inembo ninkukutumani.” 22 Padanena vimwevi, adawafulizira mphuwe nkuwauza kuti: “Tambirani mzimu uchena. 23 Mukakhululukira munthu yemwe wachita chimo, ndiye kuti Mulungu wamukhululukira kale. Koma mukaleka kukhululukira munthu yemwe wachita chimo, ndiye kuti Mulungu alibe kumukhululukira.”
24 Koma Thomasi yemwe ambadziwika pomwe kuti Didimo, m’bodzi wa opfunzira 12 wale wenze nawolini pabodzi pomwe Yesu adabwera. 25 Ndipomwapo opfunzira anango wale adamuuza kuti: “Ise tawaona Ambuya!” Koma iye adawadawira kuti: “Nikaleka kuwona vilonda* va maperego m’manja mwawo na kuikha chala changu mu vilonda va maperego mwayo na kuikha pomwe djanja yangu kumbabvu kwawo, shuwa nikhulupirirelini.”
26 Pazidapita ntsiku 8, opfunzira wake mwawo enze pomwe m’nyumba ndipo Thomasi wenze nawo pabodzi. Yesu adangena podiya kuti misuwo yenze yokhiya ndipo adaimirira pakati pawo nkunena kuti: “Ntendere ukhale namwe.” 27 Patsogolo pake adauza Thomasi kuti: “Ikha chala chako apa ndipo ona m’manja mwangu umu. Bweresa djanja yako uphate kumbabvu kwangu uku ndipo uleke kukaikira koma ukhulupirire.” 28 Thomasi adadawira kuti: “Mbuya wangu komasoti Mulungu wangu!” 29 Yesu adamubvunza kuti: “Ko wakhulupirira ndawa yakuti waniona? Okondwa ni omwe akhulupirira olo akanati kuwona.”
30 Shuwadi, Yesu adachita pomwe vizindikiro vinango vizinji pamaso pa opfunzira mwawo vomwe vilibe kunembewa mu mpukutu uno. 31 Koma ivi vanembewa kuti mukhulupirire kuti Yesu ni Khrisitu, Mwana wa Mulungu, komasoti ndawa yakuti mwakhulupirira, mukhale na moyo mudzina yake.