Malaki
2 “Manje imwepo antsembe, lamulo iyi ni yanu. 2 Mukalamba kubvera komasoti kuganizira nkhani mweyi muntima mwanu kuti mulemekeze dzina yangu, nidzakutumizireni temberero ndipo madaliso yanu nidzayachitise kukhala matemberero. Madaliso nayachitisa kukhala matemberero ndawa nkhani mweyi mulibe kuiganizira muntima mwanu,” wanena teno Yahova wa magulu yankhondo yakudzulu.
3 “Bveserani! Ndawa ya imwepo, nidzonge mbewu zanu zomwe mwabzala ndipo nikuwazireni ndowe kunkhope. Nikuwazireni ndowe za nyama zomwe muzipereka ntsembe pa vikondwerero vanu. Ndipo mudzanyamuliwe nkuthusiwa pa ndowe mwizo.* 4 Vikadzateno mudzadziwe kuti inepano nakupasani lamulo mweyi kuti pangano yomwe nidaichita na Levi ipitirize, wanena teno Yahova wa magulu yankhondo yakudzulu.
5 “Pangano yomwe nidachita naye yenze pangano ya moyo na ntendere kuti ambanigope.* Iye ambanigopa ndipo ambalemekeza dzina yangu. 6 Ambapfunzisa lamulo* ya chonadi ndipo alibe kuyankhulako vinthu voipa. Ambafamba nane mwantendere komasoti mwachilungamo ndipo adachitisa wanthu azinji kuleka kuchita vinthu voipa. 7 Wantsembe afunika kupfunzisa wanthu va Mulungu. Wanthu afunika kuyenda kwa iye kuti akabve Chilamulo* ndawa iye ni nthumi ya Yahova wa magulu yankhondo yakudzulu.
8 Koma imwepo mwaleka kufamba panjira yangu. Mwachitisa kuti wanthu azinji aleke kutewedza Chilamulo.* Ndipo mulibe kubvera pangano yangu yomwe nidaichita na Levi,” wanena teno Yahova wa magulu yankhondo yakudzulu. 9 “Manje inepano nidzachitise kuti imwepo mukhale wanthu onyozeka na alibe na basa kwa wanthu wose, ndawa mulibe kufamba panjira zangu, koma mumbakondera pa nkhani zotewedza Chilamulo.”
10 “Ko tose isepano ababa wathu ni m’bodzilini? Ko ni Mulungulini m’bodzi yemwe adatilenga? Manje ndawa chani tikuchitirana vinthu viribe chilungamo nkumbaipisa pangano ya azibereki wathu wakalekale? 11 Yuda wachita vinthu viribe chilungamo, ndipo mu Izirayeli na mu Yerusalemu mwachitika vinthu vonyantsa. Ndawa Yuda wapsyipiza kuchena* kwa Yahova komwe Mulungu akukonda, ndipo Yuda walowola mwana nkazi wa mulungu wachilendo. 12 Yahova adzaphe munthu aliyese wochita vimwevi m’matenti ya Yakobo, viribe basa kuti munthu muyo ni mbani.* Adzachite vimwevi podiya kuti munthu muyo apereka ntsembe ninge mphaso kwa Yahova wa magulu yankhondo yakudzulu.”
13 “Pali chinthu chinango* pomwe chomwe wanthu imwe munkuchita ndipo chikuchitisa kuti guwa yantsembe ya Yahova idzale na misozi, kulira na kubuula. Ndawa ya vimwevi, ntsembe zanu zomwe muzipereka ninge mphaso ni zosabvumizika kwa iye ndipo akukondwalini na chirichose chochokera kwa imwepo. 14 Imwepo mwanena kuti: ‘Ndawa chani? Ndawa yakuti Yahova ni mboni pakati pa imwepo na nkazi yemwe mudamulowola mudakali mulumbwana, yemwe mwamuchitira vinthu viribe chilungamo podiya kuti ni munzanu komasoti nkazi wa pangano.* 15 Olo nteno pali anango omwe alibe kuchita vimwevi ndawa anamzimu uchena wa Mulungu. Iwo akufuna kukhala na wana omwe angakhaledi wanthu* wa Mulungu. Ndipomwapa samalani kuti mukhale na maganizo yabwino ndipo ayi kuchitira vinthu viribe chilungamo akazi wanu omwe mudawalowola mudakali alumbwana. 16 Ndawa inepano niyipidwa na vakuti wanthu ambamalise mabanja,” wanena teno Yahova Mulungu wa Izirayeli. “Nizonda munthu wankhanza.* Samalani kuti mukhale na maganizo yabwino ndipo ayi kuchita vinthu viribe chilungamo,” wanena teno Yahova wa magulu yankhondo yakudzulu.
17 “Imwepo mwanetesa Yahova na mawu yanu. Koma mukunena kuti: ‘Tamunetesa tani?’ Pakunena kuti: ‘Aliyese yemwe achita voipa ni wabwino kwa Yahova ndipo akondwa naye,’ panango pakunena kuti: ‘Ko Mulungu wachilungamo ali kuponi?’”