Hoseya
1 Yahova adayankhula na Hoseya* mwana wa Beeri mu ntsiku za Uziya, Yotamu, Ahazi na Hezekiya mafumu ya Yuda, komasoti mu ntsiku za Yerobowamu mwana wa Yowasi mpfumu ya Izirayeli. 2 Yahova padayamba kuyankhula kupitira mwa Hoseya, Yahova adauza Hoseya kuti: “Yenda ukalowole nkazi yemwe ambadzachite uhule* ndipo ukakhale na wana ochokera kwa hule. Ndawa dziko mwiyi yasiiratu kutewera Yahova ndawa ya uhule.”*
3 Pamwapo Hoseya adayenda nkukalowola Gomeri, mwana wa Dibulaimu. Patsogolo pake Gomeri adakhala na mimba ndipo adamuberekera mwana mwamuna.
4 Manje Yahova adauza Hoseya kuti: “Mwana muyo umupase dzina yakuti Yezereeli,* pakuti kwakhala kanthawe kang’ono kuti niweruze wanthu wa m’banja ya Yehu ndawa ya wanthu omwe Yezereeli adapha. Ndipo nidzamalise ufumu wa banja ya Izirayeli. 5 Mu ntsiku zimwezo nidzathyole uta wa Izirayeli muchigwa cha Yezereeli.”
6 Patsogolo pake Gomeri adakhala pomwe na mimba nkubereka mwana nkazi. Ndipo Mulungu adauza Hoseya kuti: “Mwana muyo umupase dzina yakuti Lo-ruhama,* ndawa nidzachitirelini pomwe chifundo wanthu wa m’banja ya Izirayeli, ndawa nidzawathamangise. 7 Koma nidzachitire chifundo wanthu wa m’banja ya Yuda ndipo inepano Yahova Mulungu wawo nidzawapulumuse. Nidzawapulumuselini na nkhondo, uta, chibemba makavalo panango pomwe amuna okwera pa makavalo.”
8 Gomeri padalekesa kuyamwa mwana wake Lo-ruhama, adakhala pomwe na mimba ndipo adabereka mwana mwamuna. 9 Manje Mulungu adati: “Mwana muyo umupase dzina yakuti Lo-ami,* ndawa imwepo ndimwelini wanthu wangu ndipo inepano nidzakhalelini Mulungu wanu.
10 Ndipo Aizirayeli* adzawande ninge nchenga wa kunyanja womwe munthu angakwaniselini kuupima panango kuuwerenga. Ndipo kumalo komwe ambauziwa kuti: ‘Ndimwelini wanthu wangu,’ adzauziwe kuti: ‘Ndimwe wana wa Mulungu wamoyo.’ 11 Ayuda na Aizirayeli adzasonkhanisiwe pabodzi ndipo adzakhale obverana. Iwo adzasankhule mtsogoleri m’bodzi nkubula mudziko mwiyo ndawa ntsiku mweyi idzakhale yofunika maninge kwa Yezereeli.”