Ekisodo
40 Manje Yahova adauza Mose kuti: 2 “Pantsiku yoyamba ya mwezi woyamba, udzamange chihema panango kuti chihema chogumanako. 3 Nkati mwake udzaikhemo likasa ya Umboni ndipo udzafunge komwe kuli Likasa mwiyo na nguwo yogwatisira. 4 Muchihema mwicho udzaikhemo pomwe meza ndipo pameza mwapo udzaikhepo vinthu vake mwadongosolo. Patsogolo pake udzaikhemo choikhapo kandyero nkugasa makandyero yake. 5 Manje udzaikhe guwa ya ntsembe zofukiza yagolide patsogolo pa likasa ya Umboni, nkuikha nguwo yofunga pansuwo wa chihema.
6 Udzaikhe guwa ya ntsembe zoshoka patsogolo pansuwo wa chihema panango kuti chihema chogumanako. 7 Ndipo udzaikhe basiya* pakati pa chihema chogumanako na guwa yantsembe nkuikhamo madzi. 8 Patsogolo pake udzafunge malo yachihema na mpanda ndipo pansuwo wa malo mwayo udzaikhepo nguwo yake yofungira. 9 Patsogolo pake udzatenge mafuta yodzodzera nkudzodza chihema na vose vomwe viri nkati mwake ndipo udzachichenese pabodzi na vombo vake vose kuti chikhale chopatulika. 10 Udzadzodze pomwe guwa ya ntsembe zoshoka na vombo vake vose nkuichenesa kuti guwa mwiyo idzakhale yopatulika maninge. 11 Komasoti udzadzodze basiya na choikhapo chake nkuichenesa.
12 Patsogolo pake udzabwerese Aroni na wana wake pafupi na nsuwo wa chihema chogumanako ndipo udzawasambike na madzi. 13 Ukadzateno udzavazike Aroni vovala vopatulika, basi nkumudzodza na kumuchenesa ndipo adzatumikire ninge wantsembe wangu. 14 Patsogolo pake udzatenge wana wake nkuwavazika mikhanjo. 15 Udzawadzodze ninge momwe udadzodzera ababa wawo kuti atumikire ninge antsembe wangu. Iwo akadzadzodzewa adzapitirize kutumikira ninge antsembe m’mibadwo yawo yose.”
16 Mose adachita vose mobverana na vomwe Yahova adamulamula. Adachitadi vimwivo.
17 Manje m’mwezi woyamba wa gole yachiwiri, pantsiku yoyamba ya mwezi muyo, adamanga chihema. 18 Pomwe Mose ambamanga chihema mwicho, adaikha pasi visimbi vake nkukhazikamo maferemu. Pamwapo adangenesa tumiti twake nkuimisa vipilala pamalo yake. 19 Padateno adayanza nguwo yofunikiza pachihema mwicho na inango yofunikiza padzulu pake, mobverana na vomwe Yahova adalamula Mose.
20 Patsogolo pake adatenga Umboni nkuuikha mu Likasa, ndipo adangenesa tumiti tonyamulira m’mbalim’mbali mwa Likasa mwiyo nkuikha chobwinikirira padzulu pa Likasa. 21 Padateno adangenesa Likasa muchihema nkuikha nguwo yogwatisira pamalo yake ndipo idabisa likasa ya Umboni mobverana na vomwe Yahova adalamula Mose.
22 Manje adangenesa meza muchihema chogumanako nkuiikha kumbali yaku norte* kwa chihema mwicho, kunja kwa nguwo yogwatisa. 23 Patsogolo pake adaikha nkate pamalo yake pamaso pa Yahova, mobverana na vomwe Yahova adalamula Mose.
24 Adaikha choikhapo kandyero muchihema chogumanako patsogolo pa meza, kumbali yaku sul* kwa chihema mwicho. 25 Ndipo adagasa makandyero mwayo pamaso pa Yahova, mobverana na vomwe Yahova adalamula Mose.
26 Patsogolo pake adaikha guwa yantsembe yagolide muchihema chogumanako patsogolo pa nguwo yogwatisa, 27 kuti ambafukizirepo vofukiza vonunkhira, mobverana na vomwe Yahova adalamula Mose.
28 Padateno adaikha nguwo yofungira pansuwo wachihema.
29 Manje adaikha guwa yantsembe zoshoka pansuwo wa chihema panango kuti chihema chogumanako, kuti ambaperekerepo ntsembe zoshoka na ntsembe yambewu, mobverana na vomwe Yahova adalamula Mose.
30 Patsogolo pake adaikha basiya pakati pa chihema chogumanako na guwa yantsembe nkuikhamo madzi yosamba. 31 Mose, Aroni na wana wake ambasamba m’manja na m’mendo mwawo pamwapo. 32 Akambangena muchihema chogumanako komasoti akambayenda ku guwa yantsembe ambasamba, mobverana na vomwe Yahova adalamula Mose.
33 Pomalizira adamanga mpanda kuzungulira pamalo yachihema na guwa yantsembe ndipo adaikha nguwo yofunga pansuwo wa mpanda muyo.
Pamwapo Mose adamaliza basa mwiyo. 34 Patsogolo pake ntambo udayamba kubisa chihema chogumanako ndipo ulemerero wa Yahova udadzadza muchihema mwicho. 35 Mose alibe kukwanisa pomwe kungena muchihema chogumanako, ndawa ntambo wenze udabisa chihema mwicho ndipo mudadzala ulemerero wa Yahova.
36 Muvigawo vose va ulendo wawo, ntambo muyo ukachoka padzulu pa chihema mwicho nkukwira m’dzulu, Aizirayeli ambanyamuka nkuyamba ulendo. 37 Koma ukaleka kukwera m’dzulu, iwo ambanyamukalini mpakana ntsiku yomwe udzakwere. 38 Ntambo wa Yahova umbakhala padzulu pachihema masikati ndipo usiku pambakhala moto. Aizirayeli wose ambaona vimwevi muvigawo vose va ulendo wawo.