Ekisodo

30 Ukonze guwa ya ntsembe zofukiza. Uikonze na matabwa ya akasiya. 2 Mbali zose zinayi zikhale zolingana,ntalintali mwake ikhale 45 sentimetro,* mfupimfupi mwake ikhale 45 sentimetro. Ndipo kutalimpha kwake kuchokera pasi mpakana padzulu ikhale 90 sentimetro. Nyanga zake uzikonzere pabodzi na guwa mwiyo.* 3 Uipalangire golide wosefeka bwino, padzulu pake na m’mbalim’mbali mwake kuzungulira guwa mwiyo komasoti nyanga zake. Ukonze mkombero wa golide kuzungulira guwa yose mwiyo. 4 Ukonze vizerenga m’nyantsi mwa mkombero kumbali ziwiri zonyang’anana kuti ambangenesemo tumiti tonyamulira guwa mwiyo. 5 Ukonze tumiti tonyamulira twa muti wa akasiya ndipo utupalangire golide. 6 Guwa mwiyo uiikhe kutsogolo kwa nguwo yogwatisa yomwe iri pafupi na likasa ya Umboni. Ikhale patsogolo pa chobwinikirira chomwe chiri padzulu pa Umboni, pomwe nidzaonekere kwa iwepo.

7 Aroni ambashoke vofukiza vonunkhira kuti paguwa mwapo pambakhale utsi machibese yaliyose akambasamalira kandyero. 8 Komasoti Aroni akambagasa kandyero maulo, ambashoke vofukiza mwivo. Vimwevi ni vofukiza vofunika kuperekewa kwa Yahova nthawe zose m’mibadwo yanu yose. 9 Paguwa mweyi ayi kuperekerapo ntsembe zofukiza zosabvumizika, ntsembe yoshoka panango ntsembe yambewu, ndipo ayi kuthirapo ntsembe yachakumwa. 10 Aroni ambapereke yanango mwa magazi yanyama ya ntsembe yamachimo panyanga za guwa mwiyo kuti apsyimphirize machimo ya nyanga mwizo. Ambachite vimwevi kabodzi pagole mibadwo yanu yose. Kwa Yahova guwa mwiyo ni yopatulika maninge.”

11 Patsogolo pake Yahova adauza Mose kuti: 12 “Ukambachita kanembera wa wana wa Aizirayeli, aliyese ambapereke malipiro yowombola moyo wake kwa Yahova panthawe yomwe unkuwawerenga. Umbachite vimwevi kuti muliri osati uwagwere pakuchita kanembera muyo. 13 Wanthu wose omwe awerengewa ambapereke vinthu ivi: Hafu ya sekeli* yolingana na sekeli ya kumalo yochena.* Magera* 20 yokwana sekeli ibodzi. Hafu ya sekeli ni chopereka kwa Yahova. 14 Aliyese yemwe wawerengewa, kuyambira wa magole 20 kuyenda kutsogolo ambapereke chopereka kwa Yahova. 15 Mukambapereka kwa Yahova chopereka chopsyimphirizira machimo kuti muwombole moyo wanu, wanthu olemera ayi kuti ambapereke vizinji, ndipo wosauka ayi kuti ambapereke vosakwana hafu ya sekeli.* 16 Umbatambire kobiri za siliva zopsyimphirizira machimo kwa Aizirayeli nkuzipereka kuti zikaphatisiwe basa pa utumiki wa pachihema chogumanako. Kobiri mwizi zidzathandize kuti Yahova ambawakumbukire Aizirayeli komasoti zidzapsyimphirize machimo yanu kuti muwombole moyo wanu.”

17 Yahova adapitiriza kuyankhula na Mose kuti: 18 “Ukonze basiya yosambira yakobre na choikhapo chake. Ukachita teno uiikhe pakati pa chihema chogumanako na guwa yantsembe ndipo uthiremo madzi. 19 Pamwapo Aroni na wana wake ambasambirepo m’manja na m’mendo mwawo. 20 Akambangena mu chihema chogumanako, panango akambayenda kukatumikira paguwa yantsembe, kukapereka ntsembe kwa Yahova yowotcha pamoto, ambasambe kuti osati afe. 21 Ambasambe m’manja na m’mendo mwawo kuti osati afe. Mweyi ni lamulo kwa iwo mpakana kalekale, ikhale lamulo kwa Aroni na wana wake ku mibadwo yawo yose.”

22 Yahova adapitiriza kuyankhula na Mose kuti: 23 “Patsogolo pake utenge mafuta yonunkhira yabwino maninge aya: Mule* wophatana wokwana masekeli 500, sinamoni wonunkhira bwino, hafu ya mpimo wa mule, panango kuti masekeli 250, na kalamasi wonunkhira wokwana masekeli 250. 24 Utenge pomwe kasiya* masekeli 500 yolingana na masekeli ya kumalo yochena* komasoti hini* ibodzi ya mafuta ya maolivi. 25 Vinthu vimwevi ukonzere mafuta yophatisa basa pa kudzodza kopatulika, mafuta yonunkhira yosanganisiwa mwaluso.* Yakhale mafuta yophatisa basa pakudzodza kopatulika.

26 Mafuta mwaya udzodzere chihema chogumanako, likasa ya Umboni, 27 meza na vombo vake vose, choikhapo kandyero na vombo vake vose, guwa ya ntsembe zofukiza, 28 guwa yantsembe zoshoka na vombo vake vose, komasoti basiya na choikhapo chake. 29 Uvichenese kuti vikhale vochena maninge. Aliyese wophata vinthu vimwevi ambakhale wochena. 30 Patsogolo pake udzodze Aroni na wana wake ndipo uwachenese kuti atumikire ninge antsembe wangu.

31 Uuze Aizirayeli kuti: ‘Mafuta aya yakhale mafuta yangu yophatisa basa pakudzodza kopatulika m’mibadwo yanu yose. 32 Ayi kumbapakasira mafuta mwaya pathupi pa munthu aliyese, ndipo ayi kukonza mafuta yolingana na mwaya pakuphatisa basa vinthu vokonzera mafuta mwaya. Mafuta mwaya ni yopatulika. Yapitirize kukhala yopatulika kwa imwepo. 33 Aliyese wokonza mafuta yolingana na mwaya, komasoti yemwe angapakasire munthu wosabvumiziwa mafuta mwaya, afunika kuphewa kuti osati akhale pomwe pakati pa wanthu wa khaindi yake.’”

34 Patsogolo pake Yahova adauza Mose kuti: “Utenge mpimo wolingana wa vinthu vonunkhira ivi: Madontho ya sitakate,* onika, mafuta yonunkhira ya galibanamu na lubani* chaiye. 35 Vinthu vimwevi ukonzere vofukiza. Usanganise vonunkhirisa vimwevi mwaluso,* uikhe munyu, vikhale vochena na vopatulika. 36 Patsogolo pake vinango pa vofukiza vimwevi uvipeye kuti vikhale ufa wonyodoka maninge. Utengeko ufa unango pa ufa muyo nkuikha patsogolo pa Umboni mu chihema chogumanako, komwe nidzaonekere kwa iwepo. Vofukiza vimwevi vikhale vopatulika maninge kwa imwepo. 37 Ayi kukonza vofukiza vanuvanu pakuphatisa basa vinthu vokonzera vofukiza vimwevi. Mumbawone kuti vofukiza vimwevi ni vopatulika kwa Yahova. 38 Aliyese wokonza vofukiza volingana na vimwevi pakufuna kukondwa na kapfungo kake, ambaphewe kuti osati akhale pomwe pakati pa wanthu wa khaindi yake.”