Ekisodo
19 M’mwezi wachitatu kuchokera pomwe Aizirayeli adabula mudziko ya Iguputo, ntsiku mwiyo* iwo adangena muchipululu cha Sinai. 2 Adanyamuka ku Refidimu nkungena muchipululu cha Sinai ndipo adamanga nsasa wawo muchipululu mumo. Aizirayeli adamanga nsasa wawo pafupi na phiri ya Sinai.
3 Patsogolo pake Mose adakwira m’phiri mumo nkukaonekera kwa Mulungu chaiye. Ndipo Yahova adayankhula naye m’phiri mumo kuti: “Ukanene mawu aya ku nyumba ya Yakobo panango kuti kwa Aizirayeli. 4 ‘Imwepo mudaona mwekha vomwe nidachitira Aiguputo, kuti nikunyamuleni pa maphaphiro ya mphungu nkukubweresani kwa inepano. 5 Manje mukadzabvera mawu yangu na kusunga pangano yangu mosamala, mudzakhaledi chuma changu chofunika maninge pa wanthu wose, ndawa dziko yose yapasi ni yangu. 6 Imwepo mudzakhale ufumu wangu wa antsembe na ntundu wangu wochena.’ Ukanene mawu mwaya kwa Aizirayeli.”
7 Pamwapo Mose adabuluka ndipo adachemeresa akulu wose wa wanthu nkuwauza mawu yose yomwe Yahova adawalamula. 8 Pamwapo adadawirira pabodzi kuti: “Tidzachite vose vomwe Yahova wanena.” Nthawe mwiyoletu Mose adabwerera kwa Yahova nkukamuuza vomwe wanthu mwawo adadawira. 9 Manje Yahova adauza Mose kuti: “Bvesera! Nibwere kwa iwepo mu ntambo upsyipa kuti wanthu ambabve nikambayankhula nawe nakuti ambakukhulupirire nthawe zose.” Pamwapa nkuti Mose wanena kale mawu ya wanthu mwawa kwa Yahova.
10 Patsogolo pake Yahova adauza Mose kuti: “Yenda kwa wanthu, ukawachenese lero na mangwana ndipo awatche vovala vawo. 11 Pantsiku yachitatu adzakhale wokonzeka, ndawa pantsiku yachitatu mwiyo Yahova adzabwere pa phiri ya Sinai pamaso pa wanthu wose. 12 Wanthu mwawo uwaikhire malire kuzungulira phiri yose nkuwauza kuti: ‘Samalani kuti osati mukwire phiri panango kugumirira m’nyantsi mwake. Aliyese wogumirira phiri mwiyi, shuwadi adzaphewe. 13 Munthu aliyese osati adzagumirire wophonya muyo, koma adzaphwanyiwe na minyala panango kulasiwa.* Peno ni nyama panango munthu, adzaphewe.’ Koma lupenga ya nyanga ya nkhosa ikadzalira, wanthu wose adzafenderere phiri mwiyo.”
14 Manje Mose adabuluka m’phiri mumo nkuyenda kwa wanthu nkuyamba kuwachenesa ndipo iwo adawatcha vovala vawo. 15 Iye adauza wanthu mwawo kuti: “Pakufika ntsiku yachitatu mukhale okonzeka. Amuna osati agone na akazi wawo.”*
16 Pantsiku yachitatu machibese kumbagunda na kuchita tukaphaliwali ndipo ntambo upsyipa udabisa phiri. Kudabveka pomwe kulira kwamphanvu maninge kwa lupenga ya nyanga ya nkhosa, mwakuti wanthu wose mu nsasa muyo adayamba kunjenjemera. 17 Pavidateno Mose adabulisa wanthu mwawo munsasa kuti akaime pamaso pa Mulungu chaiye, ndipo adaima m’nyantsi mwa phiri mwiyo. 18 Phiri ya Sinai imbalotoka utsi palipose, ndawa yakuti Yahova adabwera paphiri mwapo m’moto. Utsi wake muyo umbakwira kudzulu ninge utsi wa uvuni ndipo phiri yose imbanjenjemera maninge. 19 Pomwe kulira kwa lupenga ya nyanga ya nkhosa kumbapitiriza kukuwa maninge, Mose adayankhula ndipo Mulungu chaiye adamudawira.
20 Pamwapo Yahova adafika pa phiri ya Sinai. Patsogolo pake Yahova adachemera Mose kuti akwire padzulu pa phiri mwiyo ndipo Mose adakwiradi. 21 Manje Yahova adauza Mose kuti: “Buluka ukachenjeze wanthu mwawo kuti osati ayese kulumpha malire nkufika kwa Yahova kuti amuwone, ndawa wose ochita vimwevi adzafe. 22 Ndipo antsembe omwe afenderera kwa Yahova kawirikawiri adzichenese, kuti Yahova osati awaphe. 23 Patsogolo pake Mose adauza Yahova kuti: “Wanthu mwawa angafikelini paphiri ya Sinai, ndawa imwepo mudawachenjeza kale pomwe mudaniuza kuti: ‘Ugwate malire kuzungulira phiri ndipo mumbaiwone kuti ni yopatulika.’” 24 Koma Yahova adamuuza kuti: “Buluka, ndipo ukabwere pabodzi na Aroni. Koma antsembe na wanthu osati alumphe malire nkukwira kwa Yahova kuti aleke kuwapha.” 25 Pamwapo Mose adabuluka nkuyenda kwa wanthu mwawo ndipo adawauza vose vimwevi.