Samueli wachiwiri
12 Yahova adatuma Natani kwa Davide. Padafika adamuuza kuti: “Penze amuna awiri omwe ambakhala muthaundi ibodzi. Munango wenze wolemera ndipo munango wenze wosauka. 2 Munthu wolemera muyo wenze na nkhosa komasoti ng’ombe zizinji. 3 Koma munthu wosauka ule wenze na kamwana ka nkhosa kabodzi basi kakazi komwe adagula. Iye ambasamalira kamwana ka nkhosa kamwako ndipo kambakulira pabodzi na wana wake. Kankhosa mwako kambadya pabodzi na munthu muyo chakudya chomwe wenze nacho komasoti kambamwa naye pabodzi. Kambagona m’manja mwake ndipo kambandokhala ninge mwana wake nkazi. 4 Pamwapo kwa munthu wolemera kudafika mulendo. Koma munthu wolemera uyo alibe kutenga nkhosa panango ng’ombe yake kuti akonzere chakudya mulendo muyo. M’malo mwa vimwivi, adatenga kamwana ka nkhosa ka munthu wosauka ule nkuphera mulendo ule.”
5 Davide padabva vimwivi adakalipa maninge na munthu muyo ndipo adauza Natani kuti: “Ninkulumbira mudzina ya Yahova Mulungu wamoyo, munthu yemwe adachita vimwivi afunika kufa! 6 Ndipo ankufunika kubwezera wana wa nkhosa 4 ndawa ya vomwe wachita ivi komasoti ndawa alibe kuwonesa chifundo.”
7 Pamwapo Natani adauza Davide kuti: “Munthu muyo ndiwepo. Yahova Mulungu wa Izirayeli wanena kuti: ‘Nidakudzodza* kuti ukhale mpfumu ya Izirayeli ndipo nidakupulumusa kwa Sauli. 8 Nidakupasa vinthu va Sauli ndipo azikazi wake nidawapereka kwa iwepo. Nidakuikha kuti umbatonge Izirayeli na Yuda. Vinthu vimwivi vidakakhala kuti viribe kukukwanira, nenze wokonzeka kukupasa vinango. 9 Ndawa chani udanyoza mawu ya Yahova pakuchita vinthu voipa pamaso pake? Udapha Uriya Muhiti na chibemba. Patsogolo pake udatenga nkazi wake kuti akhale nkazi wako patsogolo pakuti wapha Uriya uyo na chibemba cha Aamoni. 10 Ndipomwapa chibemba chidzachokelini pa muyi pako ndawa waninyoza potenga nkazi wa Uriya Muhiti nkukhala nkazi wako.’ 11 Yahova wanena kuti: ‘Nikugwesere tsoka kuchokera pamuyi pako chaipo komasoti iwepo unkuwona. Nidzatenge akazi wako nkuwapereka kwa mwamuna munango, ndipo iye adzagone na akazi mwawo masikati. 12 Iwepo udachita vimwivi mobisa, koma inepano nidzavichite masikati Aizirayeli wose ankuona.’”
13 Pavidateno, Davide adauza Natani kuti: “Nachimwira Yahova.” Natani adauza Davide kuti: “Yahova wakukhululukira chimo yako ndipo ufelini. 14 Koma ndawa yakuti wanyoza maninge Yahova pakuchita vimwivi, mwana wako mwamuna yemwe wabadwa manjemanje uyu, shuwadi ati afe.”
15 Patsogolo pake Natani adayenda kumuyi kwake.
Manje Yahova adachitisa kuti mwana yemwe nkazi wa Uriya adaberekera Davide ayambe kudwala. 16 Pavidateno Davide adagwigwirira Mulungu chaiye ndawa ya mwana muyo, ndipo adalekeratu kudya. Davide akangena m’nyumba usiku ambagona pasi. 17 Pamwapo akulu wa m’nyumba yake ambabwera pomwe wagona apo kuti amumuse. Koma iye ambalamba ndipo ambadyalini nawo chakudya. 18 Pantsiku yachi 7 mwana muyo adamwalira. Koma atumiki wa Davide ambagopa kumuuza kuti mwana muyo wamwalira. Iwo ambanena kuti: “Mwana uyu ali moyo tidayankhula naye Davide koma alibe kutibvera. Manje timuuze tani kuti mwana ule wamwalira? Tikamuuza angatichite chinthu choipa.”
19 Davide padawona kuti atumiki wake ankuwerewesana, adazindikira kuti mwana ule wamwalira. Pamwapo adabvunza atumiki wake mwawo kuti: “Ko mwana ule wamwalira?” Iwo adamudawira kuti: “Inde, wamwalira.” 20 Davide padabva vimwivi adamuka pomwe wenze gone pale ndipo adasamba nkudzola mafuta. Patsogolo pake adachinja vovala vake nkukangena m’nyumba ya Yahova kukatumikira.* Padachoka kumuko adayenda kukangena m’nyumba yake* nkukakumbira kuti amupase chakudya ndipo adadya. 21 Atumiki wake adamubvunza kuti: “Ndawa chani mwachita vimwivi? Mwana uyu ali moyo, mumbalamba kudya komasoti mumbalira. Koma pawandoti wamwalira, mwamuka nkuyamba kudya.” 22 Iye adadawira kuti: “Mwana ule ali moyo nimbadzimana kudya ndipo nimbalira ndawa nimbaganiza kuti: ‘Angadziwe nimbani? Panango Yahova anganichitire chifundo ndipo angabvume kuti mwana muyu akhale na moyo.’ 23 Manje pakuti wamwalira, nidzimane pomwe kudya ndawa chani? Ko ningamumukise? Inembo ntsiku inango nidzamwalire koma iye angabwererelini pomwe kwa ine.”
24 Manje Davide adanyamalisa nkazi wake Bati-seba. Patsogolo pake adagona naye ndipo paidapita nthawe, adabereka mwana mwamuna yemwe adamupasa dzina yakuti Solomo.* Yahova adamukonda mwana muyu, 25 ndipo adatuma mneneri Natani kuti akamupase mwana muyu dzina yakuti Yedediya,* ndawa Yahova ambamukonda.*
26 Yowabu adapitiriza kumenyana na wanthu wa muthaundi ya Raba ya Aamoni ndipo adatenga thaundi yachifumu. 27 Pamwapo Yowabu adatumiza wanthu kuti akauze Davide kuti: “Namenyana na thaundi ya Raba ndipo natenga thaundi ya madzi.* 28 Manje unganidzani masocha yomwe yakhala kuti yamenyane na wanthu wa mu thaundi mwiyi nkuitenga, ndawa mukaleka kuchita teno, niitenge ndine, ndipo dzina yangu ndiyo yati ibvekere.”
29 Pamwapo Davide adaunganidza masocha yose nkuyenda ku Raba ndipo adamenyana na wanthu wa muthaundi mwiyo nkuitenga. 30 Patsogolo pake adatenga chisote chachifumu chomwe chenze kunsolo kwa Malikamu* ndipo wanthu adavazika Davide chisote mwicho. Kulemera kwake kwenze kolingana na talente ibodzi* ya golide na minyala yodula maninge. Iye adatenga pomwe vinthu vizinji maninge muthaundi mwiyo. 31 Davide adatenga wanthu omwe enze mu thaundi mwiyi nkuyamba kuwaphatisa basa yocheka minyala, youmba vidina* komasoti basa zinango zophatisa basa visimbi vakuthwa na mbadzo zasimbi. Vimwivi ni vomwe adachitira wanthu wose wa mathaundi ya Aamoni. Patsogolo pake Davide na masocha yose adabwerera ku Yerusalemu.