Genezesi

38 Panthawe mwiyi, Yuda adasiyana na abale wake, ndipo adamanga tenti yake pafupi na munthu munango wa Chiadulamu, dzina yake Hira. 2 Kumuko Yuda adawona mwana nkazi wa munthu munango wa Chikanani ndipo adamulowola. Munthu muyo dzina yake wenze Sua. 3 Nkazi muyo adakhala na mimba. Patsogolo pake, adabereka mwana mwamuna, ndipo Yuda adamupasa dzina yakuti Ere. 4 Adakhala pomwe na mimba nkubereka mwana mwamuna ndipo adamupasa dzina yakuti Onani. 5 Adabereka pomwe mwana munango mwamuna nkumupasa dzina yakuti Shela. Panthawe yomwe mwana moyu ambabadwa, Yuda wenze ku Akizibu.

6 Paidapita nthawe, Yuda adagumanira nkazi Ere, mwana wake woyamba. Nkazi muyo dzina yake wenze Tamara. 7 Koma makhalidwe ya Ere, mwana woyamba wa Yuda, yalibe kukondweresa Yahova ndipo Yahova adamupha. 8 Yuda padawona vimwevi adauza Onani kuti: “Gona na nkazi wa m’bale wako ndipo ungene chokolo,* kuti umuberekere wana m’bale wako.” 9 Koma Onani adadziwa kuti wana mwawo adzakhalelini wake. Ndipomwapa, nthawe zose akagona na nkazi wa m’bale wake muyo, ambataya pasi umuna wake kuti osati amuberekere wana m’bale wake muyo. 10 Vomwe iye ambachita vidamuipira maninge Yahova, ndipomwapa adamuphambo. 11 Yuda adauza Tamara mulowola wake kuti: “Yenda kumuyi kwa ababa wako, ukakhale kumuko ninge nkazi wamasiye mpakana mwana wangu Shela adzakule.” Adachita teno ndawa muntima mwake adati: “Nayembo Shela angamwalire ninge abale wake wale.” Pamwapo Tamara adayenda kukakhala kumuyi kwa ababa wake.

12 Paidapita nthawe, nkazi wa Yuda, yemwe wenze mwana wa Sua, adamwalira. Nthawe yolira maliro paidamala, Yuda adayenda ku Timuna, komwe alumbwana wake ambagera ukuse wa nkhosa zake. Adayenda pabodzi na munzake Hira wa Chiadulamu ule. 13 Manje munthu munango adauza Tamara kuti: “Apongozi wako ankuyenda ku Timuna kukagera nkhosa zawo.” 14 Tamara padabva vimwevi, adavula vovala vaumasiye nkudzikukutidza na nguwo. Patsogolo pake adabisa nkhope yake na nguwo inango. Padateno adayenda kukakhala pasi pansuwo wa mpanda wa thaundi ya Enaimu m’mphepete mwa nsewu woyenda ku Timuna. Tamara adachita vimwevi ndawa yakuti adawona kuti Shela wakula koma apongozi wake ankubweralini kudzamutenga kuti akakhale nkazi wa Shela.

15 Yuda padamuwona nkazi muyo, adaganiza kuti ni hule ndawa wenze adabisa nkhope yake. 16 Pamwapo Yuda adapatuka nkuyenda pomwe penze nkazi muyo m’mphepete mwa nsewu nkumuuza kuti: “Ninkufuna nigone nawe.” Adamuuza vimwevi ndawa ambadziwalini kuti ni mulowola wake. Koma nkazi muyo adadawira kuti: “Munipase chani kuti mugone nane?” 17 Iye adadawira kuti: “Nidzakutumizire mbuzi.” Koma nkazi muyo adati: “Munipase chiphato chakuti nisunge mpakana nthawe yomwe mudzaitumize.” 18 Iye adati: “Unkufuna nikupase chiphato chakhaindi yanyi?” Nkazi muyo adapitiriza kuti: “Munipase aneri ya udindo wanu, chingwe chake komasoti mpsyimbo yanu iyo.” Pamwapo iye adapereka vinthu mwivo kwa nkazi muyo, nkugona naye ndipo nkazi muyo adakhala na mimba. 19 Padagona naye, nkazi muyo adanyamuka nkubwerera kwawo. Padafika adavula nguwo yomwe wenze adadzikukutidza nayo ire nkuvala vovala vake vaumasiye.

20 Yuda adatumiza mbuzi kupitira mwa munzake wa Chiadulamu ule na cholinga chakuti akamutengere chiphato chake kwa nkazi ule, koma alibe kumugumana. 21 Patsogolo pake adabvunza amuna wa kudera mwiyo kuti: “Ko hule yapakachisi ire, yomwe iimirira m’mphepete mwa nsewu kuno ku Enaimu iri kuponi?” Koma amuna mwawo adadawira kuti: “Kuno kukalibe kwakhalako hule yapakachisi.” 22 Pakumalizira pake, munzake muyo adabwerera kwa Yuda nkumuuza kuti: “Nkazi ule niribe kumugumana. Ndipo amuna wa kumuko anena kuti: ‘Kuno kukalibe kwakhalako hule yapakachisi.’” 23 Pamwapo Yuda adati: “Mulekeni andotenga vinthu mwivo vikhale vake, kuchitira kuti wanthu angatiseke. Ndipo nenze nayesako kutumiza mwana wambuzi, koma nkazi muyo ulibe kumugumana.”

24 Payadapita minyezi yatatu, Yuda adauziwa kuti: “Tamara mulowola wako wayamba uhule, ndipo anamimba.” Yuda padabva vimwivo adati: “Mubuliseni ndipo mumuphe, patsogolo pake mumushoke.” 25 Pomwe ambamubulisa, Tamara muyo adatumiza mawu kwa apongozi wake yakuti: “Munichiro wa vinthu ivi ndiye adanipasa mimba iyi.” Adanena pomwe kuti: “Pulizi vinyang’anisiseni, muwone kuti aneri mwiyo, chingwe chake na mpsyimbo mwiyo ni vambani.” 26 Manje Yuda padanyang’anisisa vinthu mwivo, adanena kuti: “Nkazi muyu ni wolungama kuposha inepano, ndawa niribe kumupasa mwana wangu Shela.” Pavidateno, Yuda alibe kugona naye pomwe.

27 Nthawe yakuti Tamara abereke paidakwana, adagumanika kuti wenze na wana awiri m’mimba mwake. 28 Pomwe ambabereka, mwana m’bodzi adabulisa djanja yake. Nthawe mwiyoletu wobazika adatenga kachingwe kafuwira nkumanga djanja mwiyo, ndipo adanena kuti: “Uyu ndiye wayamba kubadwa.” 29 Koma mwana muyo adabwezera djanja yake. Nthawe mwiyoletu m’bale wake adabadwa, mwakuti wobazika muyo adakuwa kuti: “Ndawa chani unkuchita kung’amba njira?” Ndipomwapa adamupasa dzina yakuti Perezi.* 30 Patsogolo pake, m’bale wake yemwe wenze na kachingwe kafuwira padjanja yake ule adabadwa, ndipo adamupasa dzina yakuti Zera.