Genezesi
35 Pavidateno, Mulungu adauza Yakobo kuti: “Nyamuka, yenda ku Beteli ukakhale kumuko. Ukanimangire guwa yantsembe. Ndine Mulungu chaiye, yemwe adaonekera kwa iwepo pomwe umbathawa m’bale wako Esau.”
2 Manje Yakobo adauza wanthu wa m’banja yake na wose omwe ambakhala naye kuti: “Chosani milungu yachilendo yomwe muli nayo. Dzicheneseni ndipo chinjani vovala vanu. 3 Mukachitateno, tinyamuke tiyende ku Beteli. Kumuko nikamangire guwa yantsembe Mulungu chaiye, yemwe adanidawira pantsiku ya kubonera kwangu, ndipo wakhala na inepano kulikose komwe nayenda.” 4 Pamwapo wanthu mwawo adapereka kwa Yakobo milungu yose yomwe enze nayo, na mphete zose zomwe enze adavala kumatu. Patsogolo pake Yakobo adafuchira* vinthu vimwivo pasi pa muti ukulu womwe wenze pafupi na ku Sekemu.
5 Padanyamuka, Mulungu adachitisa kuti wanthu wa m’mathaundi yowazungulira achite mantha, mwakuti alibe kulondola wana wa Yakobo kuti amenyane nawo. 6 Patsogolo pake Yakobo adafika ku Luzi, komwe ni ku Beteli, mudziko ya Kanani. Iye adafika kumuko na wanthu wose omwe enze naye. 7 Kumuko adamanga guwa yantsembe nkupasa malo mwayo dzina yakuti Eli-beteli.* Malo mwaya adayapasa dzina mwiyi ndawa Mulungu chaiye adaonekera kwa iye kumuko panthawe yomwe ambathawa m’bale wake. 8 Patsogolo pake Debora, makayaya wa Rabeka adamwalira, ndipo adamuikha ku Beteli m’nyantsi mwa phiri pasi pa muti ukulu. Pamwapo muti muyu adaupasa dzina yakuti Aloni-bakuti.*
9 Mulungu adaonekera pomwe kwa Yakobo pomwe ambabwerera kwawo kuchokera ku Padani-aramu, ndipo adamudalisa. 10 Mulungu adamuuza kuti: “Dzina yako ndiwe Yakobo. Kuyambira lero, dzina yako ikhalelini pomwe Yakobo, koma ikhale Izirayeli.” Kundoyambira pamwapo adayamba kuchemerewa kuti Izirayeli. 11 Mulungu adamuuza pomwe kuti: “Inepano ndine Mulungu wa mphanvu zose. Ubereke ndipo ukhale na wana azinji. Mitundu na madzinza yazinji yadzachoke mwa iwepo, ndipo mbadwa zako zinango zidzakhale* mafumu. 12 Dziko yomwe nidaipereka kwa Abulahamu na Isaki, nidzaipereke kwa iwepo na kwa mbadwa* zako.” 13 Patsogolo pake Mulungu adachoka pa malo pomwe ambayankhula na Yakobo.
14 Pavidakhala teno, Yakobo adaimisa mwala wachikumbuso pamalo yomwe ambayankhula naye, ndipo pa mwala muyo adathirapo ntsembe ya chakumwa na mafuta. 15 Manje Yakobo adapasa pomwe dzina malo yomwe Mulungu adayankhula naye kuti Beteli.
16 Pamwapo adachoka ku Beteli muko. Pakudasala nsenga ukulu kuti afike ku Efurata, nthawe yakuti Rakele abereke idakwana, koma pakubereka adashupika maninge. 17 Pomwe ambashupika maninge kuti abereke, wobazika* adamuuza kuti: “Ayi kugopa, ndawa ubereke mwana munango mwamuna.” 18 Panthawe yomwe moyo wake umbachoka (ndawa ambamwalira), adapasa dzina mwana muyo yakuti Beni-oni.* Koma ababa wake adamupasa dzina yakuti Benjamim.* 19 Pamwapo Rakele adamwalira, ndipo adamuikha m’manda m’mphepete mwa njira yoyenda ku Efurata, komwe ni ku Betelehemu. 20 Yakobo adaikha mwala pa manda mwapo. Mwala muyo ulipo mpakana lero pamanda ya Rakele.
21 Patsogolo pake Izirayeli adanyamuka nkukamanga tenti yake patsogolo pa ntsanja ya Ederi. 22 Nthawe inango pomwe Izirayeli ambakhala mudziko mwiyo, Rubeni adagona na Biliha nkazi mng’ono* wa ababa wake, ndipo Izirayeli adabva vomwe vidachitika.
Yakobo wenze na wana amuna 12. 23 Wana amuna omwe Leya adaberekera Yakobo enze Rubeni mwana woyamba, Simiyoni, Levi, Yuda, Isakara na Zebuloni. 24 Wana omwe Rakele adaberekera Yakobo enze Yosefe na Benjamim. 25 Wana omwe Biliha kapolo wa Rakele adaberekera Yakobo enze Dani na Nafitali. 26 Wana omwe Zilipa kapolo wa Leya adaberekera Yakobo enze Gadi na Aseri. Wana amuna omwe Yakobo adabereka ku Padani-aramu enze mwawa.
27 Pakumalizira pake Yakobo adafika kwa ababa wake ku Mamure, mudera ya Kiriyati-ariba, komwe ni ku Heburoni. Kumuko ni komwe Abulahamu na Isaki adakhalako ninge alendo. 28 Isaki adakhala na moyo kwa magole 180. 29 Patsogolo pake Isaki adamwalira, ndipo adaikhiwa m’manda ninge momwe adachitira na azibereki wake.* Adamwalira padati wakhala na moyo utali nkukhutira na ntsiku za moyo wake ndipo wana wake, Esau na Yakobo, adamuikha m’manda.