Khala nu Gutema, Khala nji Muzula Badesizio adi Musuanguluisa Yehowa

1-2. Gutema gudi itshi? Luholo lutshi guajiya gutukuatesa?

YAJIYA gukhala egi muthu mumoshi wagukalegele gale ndaga mu luholo lunu watangijile egi gagunemeselego. Nga ndo yajiya gukhala egi wamonele egi muthu mumoshi udi gugutangijila ndaga yabola nga ndo wagukalegela ndaga yaguhana khabu. Yajiya nji gukhala egi watagenele gale nu ndaga imoshi yaguhanele woma wavula. Gula idi ngenyi, udi mujiya egi yajiya gukhala lamba ha guzuela nga gutshita ndaga yabonga. Uvi Biblia yana monesa egi gutema gudi khadilo dia ndando diajiya gutukuatesa mu ndaga jia luholo elu.

² Gula tudi nu gutema, mbatushigo muzula desizio ha gutadila ndaga tudi mumona, uvi mbatukamba gujiya ndaga jiavula jiatadila mulonga wetu. Gutema guana gutukuatesa ha gukotelesa gishina ndaga imoshi ngenyi yakalegewa nga ndaga yatumi muthu ha gukalagala ndaga. Guana gutukuatesa nji ha gukalagala ndaga mu luholo luabonga. Ha gufezegesa, guajiya gutukuatesa ha gukanda “mbimbi” jietu nu gujiya tangua tuajiya ‘guhena tedie.’ (Ish. 10:19; Ngi. 4:4) Guajiya gutukuatesa ha gudikanda gula tuavua khabu nu gutotesela athu ako. Guana gutukuatesa nji ha gutshigina malongo. (Ish. 19:20) Gula tudi nu gutema, ndaga tudi muzuela nu tudi mutshita mbajisuanguluisa Yehowa nu athu ako; lujingu luetu nji mbalukhala luabonga. Gula atukalegela ndaga yatuhana khabu, gutema mbagutukuatesa ha gutuna gutshita ndaga jiabola. Tutadilenu ifezegeselo ya athu thathu idi mu Biblia idi mumonesa luholo gutema guajiya gutukuatesa ha gumonesa khadilo dia gudibulumuisa, gutuna gudisagesa muavula nu gushila Yehowa mutshima.

KHALA NU GUDIBULUMUISA UVI UKHADIGO NU LULENDO

3. Namana wakhalele nanyi?

³ Gula tudi mutshigina gukalagala ndaga mu luholo luabonga, tudi naye gutuna khadilo dia lulendo. (1 Phet. 5:5) Gutema nji guajiya gutukuatesa mu ndaga yene. Luholo lutshi? Tutadilenu gifezegeselo gia Namana. Wakhalele mujinga gu Siliya; gifutshi giene giakhalele gu khanda ya nord ya gifutshi gia Isalele. Namana wakhalele fumu wa masuta a enya Siliya. Uvi wakhalele mukata misongo ya hute.​—2 Maf. 5:1.

4. Ndaga itshi yakalegele Namana yamonesele egi wakhalele nu gutema?

⁴ Mon’a mukhetu mumoshi wazonda wa gu Isalele wakhalele muenya mudimo wa mukaji’a Namana. Mona muene wamuwambelele egi gudi nu profete mumoshi gu Isalele wajiya gusaga mulumi’enji. (2 Maf. 5:2, 3) Namana wakhalele naye guzuela egi: ‘Mona owu wazonda wa mu gifutshi gia mbalagaji jietu wajiya diago gunguwambela ndaga yajiya gungukuatesa ba?’ Uvi Namana gazuelelego ngenyi, wazudile tangua dia gutangigiza ndaga jiazuelele mona muene. Ha fundo dia gujilelula nu lulendo luagasue, wadibulumuishile nu wajitegelele. Watogele fumu wa gu Siliya njila ha guya gu Isalele hagula wajiya gusagewa.​—2 Maf. 5:4, 5.

5. Ndaga itshi yakalegewe hahetele Namana gu Isalele?

⁵ Hahetele Namana gu Isalele, wayile gumbo dia fumu Yolama, wakhalele gudifelela egi mbaamusaga misongo yenji ya hute. Uvi fumu Yolama watangijile egi fumu wa gu Siliya wamutumile handaga wakhalele mutshigina gumukambela milonga. Havuile profete Elisha ndaga yene, watumidile fumu Yolama mbimbi ha gumutumila Namana gumbo dienji. (2 Maf. 5:6-9) Namana wakhalele mutangiza egi Elisha mbawuza gumutagana nu mbawumukalegela ndaga ya gushimana gifua luholo luakhalele gudifelela muene. Uvi Elisha gakalegelego ngenyi, gazogelego nji ha guta n’enji maga. Wamutumidile muthu ha gumuwambela ndaga yakhalele naye gutshita muene ha gusagewa.​—2 Maf. 5:10.

6. a) Yajiya gukhala egi itshi yatumile Namana ha gutuna nu lulendo luagasue malongo amuhanele? b) Luholo lutshi enya mudimo enji amonesele gutema? Itshi yabuile gungima? (2 Mafumu 5:13, 14)

⁶ Thomo, Namana gasuangulugilego nu malongo amuhanele Elisha. “Wavuile khabu,” gungima “wabalumugile, wavutugile nu khabu jiakola.” (2 Maf. 5:11, 12) Mukunda natshi? Yajiya gukhala egi watangijile egi amukalegelego ndaga nu ginemua giagasue handaga wakhalele fumu wakoma wa masuta. Yajiya nji gukhala egi Namana watangijile egi ndaga jiamuwambelele Elisha jiakhalele musegulula gifutshi gia Siliya. Ikhale ngenyi nga ndo, Namana watunyile gutshita ndaga amuwambelele ha gusagewa nu wakhalele mutshigina guvutuga gumbo dienji. Uvi enya mudimo enji amonesele gutema, amububidile ha gusombegesa matangi enji. Namana wadibulumuishile, watshiginyile malongo amuhanele Elisha. Gungima dienji wasagewe!​—Tanga 2 Mafumu 5:13, 14.

7. Lumene lua Namana ludi gutulongesa itshi? (Ishima 22:4) (Tala nji ifuanesa.)

⁷ Lumene elu ludi gutulongesa itshi? Tuana monesa gutema tangua tuanago gubemba egi luholo tudi gudivua lututume ha guzula badesizio. Gutema guana gutukuatesa nji ha gukhala nu gudibulumuisa. Muthu wa gudibulumuisa wana tshigina egi gashigo mujiya ndaga jiagasue. Wakhala nji hehi ha gutshigina malongo a athu ako, ikhale malongo ene akatuga gudi muthu mutshi. Mukut’etu agasue tuana khala nu funu ya ukuateshi wa athu ako nu wa Yehowa. Namana gakhalelego mukombeledi wa Yehowa, uvi wamonesele gutema luholo luategelele muene nu gudibulumuisa guagasue malongo amuhanele mon’a mukhetu wazonda wa gu Isalele, enya mudimo enji nu a Elisha mumoneshi wa Yehowa. Wabembele nji khadilo dienji dia lulendo. Gungima wazudile desizio diabonga diamubatele gubonga. Esue nji gutuama dia guzula nga desizio ditshi, tudi naye guzula tangua dia gutangigiza muabonga. Yajiya gukhala egi muthu watuhana longo dimoshi diakatuga mu Biblia, uvi tushigo musuanguluga nadio nga ndo tuaheta usombegeshi uhe-uhe mu ulondegi wetu uvi tushigo mukotelesa ndaga yene muabonga. Gutuama dia gutuna nga gutshigina ndaga yene, tudi naye guzula tangua dia gutangigiza muabonga, ngenyi mbatumonesa egi tudi athu a gudibulumuisa.​—Tanga Ishima 22:4.

KHALA NU GUHUIMINYINA, UTSHITSHIGO NDAGA NU KHABU

8. Mu tangua ditshi yajiya gukhala lamba ha gumonesa khadilo dia guhuiminyina?

⁸ Gutema guajiya gutukuatesa ha gukhala nu guhuiminyina nu gutuna gutshita ndaga nu khabu jiagasue gula atukalegela ndaga yabola. Uvi mu guzuela guabonga, yakhalago yaleba ha gumonesa khadilo edi gula muthu wazuela nga watukalegela ndaga yabola. (Ef. 4:26) Tutadilenu luholo Davidi nu Abigayile amonesele gutema tangua ndaga ya luholo elu yaabuidile.

9. Luholo lutshi Nabale wakalegele Davidi ndaga?

⁹ Tangiza gale ndaga eyi: Davidi nu athu enji adi mulenga fumu Saula, aya mukhala mu mavu a luselenga a Parane. (1 Sam. 25:1) Hadi ene guene, akuatesa abambi a imeme a muthu mumoshi ngenyi wakhalele nu umonyi wavula, jina dienji Nabale ha gubamba shitu jienji. (1 Sam. 25:15, 16) Tangua diasendesa sungi a gukoka imeme uvuji, Davidi watuma athu gudi Nabale, wamutumila lumene nu wamutoga nu gudibulumuisa guagasue ha guahana ima ya gudia. (1 Sam. 25:6-8) Uvi Nabale watuna guhana Davidi nu athu enji mersi mukunda nu ndaga yabonga amukalegela. Wahana Davidi mvutu mu luholo luabola, wamushinga, washinga nji athu enji.​—1 Sam. 25:10, 11.

10. Luholo lutshi Davidi nu Abigayile amonesele gutema? (1 Samuele 25:32, 33) (Tala nji gifuanesa.)

¹⁰ Nga wakhalele ha fundo dia Davidi, luholo lutshi wakhalele naye gudivua? Davidi wavuile khabu jiakola. Yajiya gukhala egi aye nji wakhalele naye guvua khabu handaga ndaga jiazuelele Nabale jiakhalele jiabola. Gishina giene, mu tangua diene Davidi wakalegele ndaga yakhalele mu matangi enji, wayile ha gushiya Nabale! (1 Sam. 25:13, 21, 22) Uvi hakhalele muene mu njila, watagenele nu Abigayile mukaji’a Nabale. Luholo lutshi Abigayile wamonesele gutema? Wakotelesele egi ikhale Davidi wakhalele nu khabu, uvi wakhalele muthu wabonga. Hene, wakalegele yagasue ha gumukuatesa ha gubemba guvua khabu. Wamubatele ima yavula, wamuhanele nji malongo abonga nu gudibulumuisa guagasue. (1 Sam. 25:18, 23-31) Davidi nji wamonesele gutema luholo luatshiginyile muene malongo a Abigayile, wakotelesele egi mbimbi jienji jiakhalele gudivua nu matangi a Yehowa mu mulonga wene. Hene, Davidi watuluile mutshima nu gayilego luko ha gushiya Nabale.​—Tanga 1 Samuele 25:32, 33.

11. Luholo lutshi gutema guajiya gutukuatesa gula atukalegela ndaga yabola? (Ishima 19:11)

¹¹ Lumene elu ludi gutulongesa itshi? Gutema guajiya gutukuatesa ha gukhala nu guhuiminyina ikhale tudi nu ndaga idi gututuma ha guvua khabu. Guajiya nji gutukuatesa ha gutangiza gutuama malamba ajiya gutubuila gula tuatshita ndaga nu khabu. (Tanga Ishima 19:11.) Tangua Abigayile wawunguluishile Davidi malongo a Yehowa, Davidi wasombegesele matangi enji. Gula agukalegela ndaga yabola ya guhana khabu, ukalagalago ndaga gutangiza ndo. (Yak 1:19) Kombelela Yehowa nu kamba gujiya matangi enji mu mulonga wene; gutshita ngenyi mbagugukuatesa ha gubemba guvua khabu nu ha gukhala nu guhuiminyina.

12. Luholo lutshi athu ako ajiya gutukuatesa ha gumonesa gutema nu ha gukhala nu guhuiminyina?

¹² Yehowa wakalegele Abigayile ha gukuatesa Davidi ha gutulula mutshima nu gujiya matangi a Nzambi mu mulonga wenji. Mangino nji, wajiya gukalegela aphangi ako ha gutukuatesa ha gukotelesa matangi enji mu mulonga wetu. Gula agukalegela ndaga imoshi ya guhana khabu, ta maga nu phangi wa gukula mu nyuma wajiya gugukuatesa ha gukotelesa matangi a Yehowa mu mulonga waye. (Ish. 12:15; 20:18) Nga ndo, gula aye udi mutshigina gukuatesa muthu udi mutagana nu ndaga ya luholo lunu, wajiya gulandula gifezegeselo gia Abigayile. Wajiya gumukuatesa ha gukotelesa matangi a Yehowa mu mulonga wenji. Yehowa mbawugukuatesa mu ndaga jiagasue udi mutshita ha gukuatesa athu ako ha gumonesa gutema nu ha gukhala nu guhuiminyina.

KHALA MUSHILA YEHOWA MUTSHIMA GULA UDI MUVUA WOMA

13. Luholo lutshi gutema guajiya gutukuatesa gula tudi muvua woma?

¹³ Matangua ako tuajiya gutagana nu ndaga jiajiya gutuhana woma. Gutema guajiya gutukuatesa ha gutuna gusha matangi etu mu ndaga jidi gutuhana woma, uvi ha guwunguluga egi Yehowa Nzambi wa ngolo jiagasue udi wakoma gubalega ndaga jiene jiagasue. (Ngi. 27:1) Yehowa wajiya gutukuatesa mu ndaga jiagasue nu mu ndaga tudi mutangiza egi jiajiyilego gusombegesa. Yene ndaga yabuidile profete Yona. Wakhalele genji muzumba Yehowa uvi wavuile woma tangua diamuhanele muene ginemo gimoshi ngenyi giakoma.

14. Mukunda natshi Yona wavuile woma mukunda nu ginemo giamuhanele Yehowa?

¹⁴ Yehowa wahanele Yona ginemo gimoshi giakoma: Yona wakhalele naye guya gu Ninive ha guwambela athu egi Yehowa wakhalele naye guashiya. (Yona 1:1, 2) Luholo lutshi wakhalele naye gudivua gula nga aye wahetele ginemo giene? Yona wakhalele naye guwenda ha malu mbeji imoshi ha guheta gu dimbo dia Ninive dia enya Asiliya. Enya Asiliya akhalele ajiyiwa muavula mukunda nu umbundudi nu ndaga jia khuta. Akhalele nji mutamega dimbo dia Ninive egi ‘dimbo diana shiya athu.’ (Nah. 3:1, 7) Ha fundo dia gutshita ndaga jiamuwambelele Yehowa, Yona walengele.​—Yona 1:3.

15. Itshi yakuatesele Yona ha gushila Yehowa mutshima? (Yona 2:6-9)

¹⁵ Yona wanginyile mu masuwa ha guya mu dimbo diko ha gulenga ginemo giamuhanele Yehowa gia guya gu Ninive. Uvi gungima amubishidile mu kianga. Hene, Yehowa wamuhuluishile mu luholo lua gushimana diago. Ndaga yene yawunguluishile Yona egi Yehowa wakhala Nzambi wa ngolo jiagasue. (Yona 1:15, 17) Ndaga yamubuidile yamulongesele nji malongo a ndando. Wakotelesele egi gakhalelego naye guvua woma ha guya gu Ninive handaga Yehowa wakhalele naye gumubamba gu ndaga jiagasue jiakhalele naye gumubuila. (Tanga Yona 2:6-9.) Tangua Yehowa wamutogele mu mbala ya mbadi ha guya gu Ninive, Yona watshiginyile mbala imoshi. Wayile guene, athu atshiginyile nji ndaga jiaalongesele muene nu ahulugile.​—Yona 3:5.

16. Luholo lutshi gutema guajiya gutukuatesa gula tudi muvua woma? (Ishima 29:25) (Tala nji ifuanesa.)

¹⁶ Lumene elu ludi gutulongesa itshi? Tushigo naye gubemba egi woma wa athu nga gima giko gitukange njila ha gukombelela Yehowa. (Tanga Ishima 29:25.) Gutema guakuatesele Yona ha gutuna guvua woma nu ha gusha mutshima mu ukuateshi wa Yehowa. Esue nji tushigo naye guvua woma, uvi tudi naye gutangigiza luholo Yehowa watubambele nu watukuatesele mu masugu abalega. Tuajiya gutangigiza ifezegeselo ya aphangi a mala nu a akhetu anyi abingile ndaga jiakhalele guahana woma nu atagenesele inemo yakoma mu mudimo wa Yehowa handaga akhalele gumushila mutshima.a (Heb. 13:6) Tuajiya nji gumonesa gutema gula tudi mushila diago Yehowa mutshima nu tudi mukuatesa athu ako ha gutshita nji ngenyi.

LANDULA GUTANGIZA GIFUA YEHOWA

17. Itshi yajiya gutukuatesa ha gutangiza gifua Yehowa?

¹⁷ Gifua luholo tuayimona mu longo edi, gutema guajiya gutukuatesa ha gutshita ndaga mu luholo luabonga. Itshi yajiya gutukuatesa ha gukhala athu atema diago? Yehowa udi watagana ha gutukuatesa. Gishina giene, watuhanele Mbimbi yenji nu nyuma yenji. (Neh. 9:20; Ngi. 32:8) Wana gutuhana malongo ana gututuameza nu ana gutukuatesa ha gudikanda gula tuatagana nu ndaga imoshi yatusagesa. (Ngi. 119:97-101) Hene, tudi naye gutangigiza muabonga ndaga jiana zuela Biblia nu gutoga Yehowa ha gutuhana nyuma yenji. Gutshita ngenyi mbagutukuatesa ha gukotelesa matangi a Yehowa mu mulonga wetu nu ha gujiya ndaga ya guzuela nu ya gutshita ha gumonesa egi tuana tangiza gifua Yehowa.​—Ish. 21:11 nu mbimbi goshi’a diyiji.

18. Desizio ditshi wazula?

¹⁸ Tudi naye gulandula gutoga Yehowa ha gutuhana ndunge nu gutema. (Ngi. 14:2) Gula tuatshita ngenyi, mbatulandula guwenda mu “njila ya ndunge.” (Ish. 21:16) Tudi naye guzula desizio dia gumonesa gutema tangua diagasue nu mu ndaga jiagasue. Ngenyi ‘mbatubinga’ diago.