6-12 AVRIL 2026
LUNGIMBO 82 “Tukhale Gifua Muanya”
Wajiya Gukuatesa Enya Fami Yaye Ashigo Matemue a Yehowa
“Tubembigo gukalagala ndaga jiabonga.”—GAL. 6:9.
MU GUHIHIA
Tuza mumona ndaga tuajiya gutshita ha gukhala nu ufuta wabonga nu enya fami yetu ashigo Matemue a Yehowa nu luholo tuajiya guakuatesa mu nyuma gula luholo ludi guene.
1-2. Yajiya gukhala egi ndaga itshi yamibuidile nu enya fami yaye tangua wasendesele gulonguga Biblia?
YESU wawambelele muthu mumoshi wakhalele mutshigina gubua mulandudi wenji egi: “Vutuga gumbo diaye, mu fami yaye, wambela aphangi’aye ndaga jiagasue jiagukalegela Yehowa.” (Mako 5:19) Mbimbi eji jia Yesu jiakhalele mumonesa egi wakhalele mujiya egi athu akhala nu khadilo dia guwambela aphangi’awo nga mafuta awo ndaga jiabonga atagana najio.
2 Udi muwunguluga luko luholo wadivuile tangua wasendesele gulonguga giamatshidia ba? Idi yadiago egi wakhalele muvua mutshima zagu-zagu egi nga wawambela gale athu agasue wana zumba ndaga wakhalele mulonguga! Uvi yajiya gukhala egi athu ene asuangulugilego nu ndaga jiene. Nga ndo yajiya gukhala egi luholo waawambelele ndaga jiene luaahanele khabu. Gula idi ngenyi, itshi yajiya gugukuatesa ha gudivua luko nu enya fami yaye nu ha gukhala nu ufuta wakola nu Yehowa?
3. Itshi tuza mumona mu longo edi?
3 Mu longo edi tuza mumona: 1) Luholo khadilo dia khenda diajiya gutukuatesa ha gudisagesa mukunda nu enya fami yetu ashigo Matemue a Yehowa ikhale ashigo musuanguluga nu giamatshidia; 2) ndaga tuajiya gukalagala gula athu ene azuela nga atukalegela ndaga jiatusagesa; 3) luholo tuajiya guakuatesa gula tudi ahuiminyina nawo nu tudi gudifelela egi mbaasuanguluga nu giamatshidia; nu 4) luholo tuajiya guamonesa egi tuana guazumba.
KHALA GUAVUILA KHENDA
4. Ndaga itshi yakalegele Yesu mukunda nu athu akhalelego musuanguluga nu lukuma luabonga?
4 Yesu gabembelego mbala imoshi gulongesa athu akhalelego musuanguluga nu lukuma luabonga. Wadifuanesele nu muthu wakalegele yagasue ha gukuatesa mutshi wa figi unu wakhalelego muhaga mabundu ha gusendesa guhaga mabundu. (Luka 13:6-9) Hahanele Yesu gifezegeselo giene, wakhalele wabalegesa gale ivo thathu nu gutshita yagasue ha gukuatesa enya Yuda ha gusha gutshigina mu ndaga jiakhalele gualongesa muene. Na mukunda natshi Yesu gabembelego guakuatesa? Idi handaga wakhalele guavuila khenda; ndaga yene yamukuatesele ha gukhala nu guhuiminyina.
5. Itshi yatumile Yesu ha guvuile akuaku’enji a enya Yuda khenda?
5 Yesu wakhalele muvuila akuaku’enji a enya Yuda khenda handaga mafumu awo a ikombelelo a akuateselego ha gukolesa gutshigina guawo gudi Nzambi. Wamonele egi athu ene “akhalele gifua imeme ishigo nu mubambi.” (Mako 6:34) Matangua azonda gutuama dia gufua guenji, Yesu wadidile mukunda nu dimbo dia Yelusalema handaga wakhalele mujiya egi athu avula a mu dimbo diene mbaafua handaga akhalelego nu gutshigina. (Luka 19:41-44) Gula esue nji tudi muvuila enya fami yetu khenda jia luholo elu, mbatutshita yagasue ha guakuatesa.
6. Mukunda natshi tudi naye gukhala nu guhuiminyina mukunda nu enya fami yetu ashigo Matemue a Yehowa? (Galatiya 6:9)
6 Tanga Galatiya 6:9. Gula uu nu henyaha enya fami yetu ashigo musuanguluga nu giamatshidia, tudi naye gukhala nu guhuiminyina nu gulandula “gukalagala ndaga jiabonga.” Tudi mujiya egi yana toga tangua diavula hagula muthu asombegese matangi enji nu asendese gusha gutshigina gudi Yehowa. Aye nji mu tangua dimoshi ngenyi wakhalelego gifua athu anyi akhalago “nga nu felela nga nu Nzambi ha mavu awa” ba? (Ef. 2:12) Uvi udi muwunguluga egi guakhalele nu muthu wajile gugukuatesa ha gusombegesa nu ha gujiya ndaga jiavula jiatadila Yehowa. Gula udi muwunguluga ndaga yene, mbayigukuatesa ha guvuila enya fami yaye khenda nu ha guakuatesa ha gujiya Yehowa gula luholo ludi guene.
NDAGA WAJIYA GUKALAGALA GULA ENYA FAMI YAYE AZUELA NGA ATSHITA NDAGA JISHIGO GUGUSUANGULUISA
7. Yajiya gukhala egi itshi yakangele aphangi’a Yesu njila ha gusha gutshigina gudi muene?
7 Yajiya gukhala egi aphangi’a Yesu avuile nji lumene lua ndaga jiagushimana jiakalegele muene gu Galilea. (Luka 4:14, 22-24) Ikhale ngenyi, ashilego gutshigina gudi muene. (Yone 7:5) Mukunda natshi? Biblia yana zuelelago ndaga yene. Uvi yana monesa ndaga jiakangele enya Yuda ako njila ha gubua alandudi a Yesu. Yana zuela egi athu ako akhalele muvua woma egi gula abua alandudi a Yesu, enya Yuda ako mbaatuna. (Yone 9:18-22) Uvi ako akhalele mujiya Yesu sendese ulenge wenji, hene yakhalele lamba gudi ene ha gutshigina egi wakhalele mumoneshi wa Nzambi. (Mako 6:1-4) Yajiya gukhala egi aphangi’a Yesu akhalele nji nu matangi a luholo elu. Enya fami yaye nji akhala nu matangi a luholo elu ba?
8. Itshi yajiya gutuma enya fami yetu ashigo Matemue a Yehowa ha guzuela nga gutshita ndaga jishigo gutusuanguluisa?
8 Kamba gujiya gishina enya fami yaye adi muzuela nga mutshita ndaga jishigo gugusuanguluisa. Yajiya gukhala egi aphangi’a Yesu akhalele mukatshi dia enya fami a Yesu akhalele muzuela egi “wasaluga.” (Mako 3:21) Yajiya gukhala egi itshi yaatumila ha guzuela ndaga yabola ngenyi? Lumene ludi mu Biblia ludi mumonesa egi Yesu gakhalelego nu tangua dia gudia handaga wakhalele mulongesa nu gusaga athu avula. (Mako 3:20) Yajiya gukhala egi ndaga yene yatumile enya fami yenji ha gutangiza egi na Yesu wabalegesa diago. Enya fami yetu nji ajiya gutangiza egi tuana balegesa tangua diagasue mu mudimo wa Yehowa. Gula idi ngenyi, tudi naye gutshita yagasue ha guamonesa mu makalegelo etu egi tuana khala nji nu tangua dia gutshita ndaga jiko.
9. Itshi yajiya gukuatesa enya fami yetu ha gusombegesa matangi awo mukunda nu Matemue a Yehowa? (1 Phetelo 3:1, 2) (Tala nji ifuanesa.)
9 Monesa makalegelo ajiya gukuatesa enya fami yaye ha gusombegesa matangi awo. Mbimbi jietu jiabonga nu makalegelo etu abonga ajiya gutuma enya fami yetu ha gusombegesa matangi awo mukunda nu Matemue a Yehowa. (Tanga 1 Phetelo 3:1, 2.) Ha gufezegesa, yala munu gashigo Temue wa Yehowa wajiya guvua khabu nga gudivua hakhenji tangua mukaji’enji udi muya mu gudibungisa nga mu mudimo wa gulongesa. Gula phangi muene wa mukhetu gashigo mutshigina egi mulumi’enji adivue ngenyi, wajiya gulondega programe yenji hagula wajiya guheta luholo lua gubalegesa tangua diavula nu mulumi’enji. Ha gufezegesa, wajiya guya mu mudimo wa gulongesa gula mulumi’enji udi nu mudimo nga ndo gashigo gu inzo. Gula phangi wa mukhetu udi mutshita yagasue ha gusuanguluisa mulumi’enji, wajiya gumukuatesa ha gusombegesa matangi enji mukunda nu Matemue a Yehowa.
Mbimbi jiaye nu makalegelo aye abonga nu gisemo giaye yajiya gukuatesa mulumi’aye nga mukaji’aye gashigo Temue wa Yehowa ha gusombegesa matangi enji mukunda nu esue (Tala paragrafe 9)f
10. Luholo lutshi tuajiya gulandula gifezegeselo gia Yesu gula athu ako adi muzuela ndaga jiabola mukunda nu esue?
10 Ukhadigo muhana mvutu gu ndaga jiagasue jiabola enya fami yaye adi guguwambela. Tangua athu azuelele egi Yesu wafudila gudia nu wakhalele munui wa matombe, Yesu gavuilego khabu nu gakambelego nji gumana nu athu ene ha guamonesa egi ndaga jiene jiakhalele jia mambo. Uvi watshiginyile egi athu ene hakhawo atale makalegelo enji ha gujiya gula ndaga jiakhalele muzuela athu mukunda nu muene jiakhalele jia giamatshidia nga ndo. (Mat. 11:19) Wamonesele nji mu makalegelo enji egi gakhalelego muenya ndaga jiakola-kola. (Fuanesa nu Yone 2:2, 6-10.) Aye nji ukhadigo mukamba guhana mvutu nga gudibingisa mu ndaga jiagasue enya fami yaye adi muzuela mukunda nu aye. Uvi tshita yagasue hagula makalegelo aye amonese egi ushigo muenya ndaga jiakola nu wana khala nu gusuanguluga mu monyo waye. Ndaga yene yajiya guatuma ha gutuna gutegelela ndaga jiabola athu ana zuela mukunda nu Matemue a Yehowa.
KHALA NU GUHUIMINYINA, KHALA NJI GUDIFELELA EGI AJIYA GUSOMBEGESA
11. Luholo lutshi Yesu wakalegele aphangi’enji ndaga?
11 Biblia yana monesa egi Yesu walanduile gumonesela aphangi’enji khadilo dia guhuiminyina. Ha gufezegesa, ene nji akhalele hene tangua Yesu wakalegele ndaga yagushimana gu Kana mu mbala ya thomo. (Yone 2:11, 12) Uvi gifua luholo tuayimonyi gu thunda, aphangi’enji ene ashilego gutshigina gudi muene. Ikhale ngenyi, Yesu gaatunyilego. Biblia idi mumonesa egi Yesu watele luko maga nu aphangi’enji nu gisemo giagasue, yakhalele ivo thathu gungima dia ndaga yagushimana yakalegele muene gu Kana.—Yone 7:5-8.
12. Itshi yajiya gutukuatesa ha gulandula gudifelela egi enya fami yetu ako mbaatshigina gukombelela Yehowa?
12 Gula tudi mujiya muabonga egi Yehowa wakhala Nzambi wa khenda, yajiya gutukuatesa ha gulandula gudifelela egi enya fami yetu anyi ashigo Matemue a Yehowa mbazula nji desizio dia gumukombelela. Tangua ikombelelo ya mambo mbayishiyiwa, yajiya gukhala egi mu tangua diene enya fami yetu mbaawunguluga ndaga tuaawambelele mukunda nu ndaga yene.a (Gumo. 17:16) Yajiya nji gukhala egi mbaatshigina ha gukombelela Yehowa hamoshi nu esue gungima dia gusendesa gua lamba diakola. Uvi tangua tudi munengena ndaga jiene jiagasue, gula enya fami yetu adi mutagana nu lamba, tuajiya gutshita yagasue ha guakuatesa. Gula amona egi tudi guamonesela diago guzumba nu gisemo, yajiya guatuma ha gutshigina giamatshidia gia Biblia.
KHALA GUAZUMBA
13. Ndaga itshi tushigo naye gujimbila ikhale tuakhala nu ndaga jiavula jia gutshita mu mudimo wa Yehowa?
13 Tuana khala nu ndaga jiavula jia gukalagala mu mudimo wa Yehowa. Uvi tushigo naye gubemba egi ndaga yene itume enya fami yetu ha gutangiza egi tushigo nu tangua mukunda nu ene nga ndo tushigo luko guazumba. (Mat. 7:12) Tutadilenu maluholo tuajiya guamonesa egi tuana gudisagesa mukunda nu ene.
14-15. Ndaga itshi tuajiya gukalagala ha gumonesa enya fami yetu ashigo Matemue a Yehowa egi tuana guazumba? Hana gifezegeselo.
14 Khala muta nawo maga, khala nji guamonesa egi wana guazumba. Tuana monesa egi tuana zumba enya fami yetu tangua tuana guta nawo maga tangua diagasue. Ha gufezegesa, tuajiya guatamega gu telefone nga guatumila foto tuakuatshi tangua tuakhadi mu vuayaje nga gu wano nu mafuta. Tuajiya nji guahana bakado nga guasonegela mikanda ha guamonesa egi tuana gudisagesa mukunda nu ene. Ndaga eji jiagasue jiajiya guakuatesa ha gujiya egi tuana guazumba.
15 Tutadilenu lumene lua phangi Anna wa gu Arménie. Enya fami yenji akhala nu khadilo dia gubalegesa tangua hamoshi muavula mu sungi ya mawano a guvualewa nu mawano ako. Tangua Anna wabuile Temue wa Yehowa, enya fami yenji akhalele gudisagesa handaga akhalele mutangiza egi mbagashigo luko mukhala nu tangua dia gubalegesa nawo. Akhalele nji gudisagesa egi mbawutagana nu malamba avula gula wabua Temue. Ndaga itshi yakalegele phangi Anna ha guatulula mitshima? Udi muzuela egi: “Tangua ngana guya mutala enya fami yami, ngana guatela mene jiami nu ndaga ngakhadi mutshita. Ngana guatamega nji gumbo diami, ngana guadijiga nji mafuta ami. Ndaga yene yana guakuatesa ha gudijiya muabonga nu mafuta ami nu ha guta nawo maga muabonga.” Phangi Anna udi muzuela nji egi: “Enya fami yami avula anguwambelele egi mangino ngabuile gale nu gusuanguluga; anguwambelele nji egi ndaga yene yaatuluile gale mitshima, anago luko gudisagesa mukunda nu ame.”
16. Luholo lutshi Yesu wamonesele egi wakhalele muzula phangi’enji Yakoba nu ndando? (Tala nji mbimbi goshi’a diyiji.)
16 Khala guamonesa egi wana guazula nu ndando. Gungima dia gufuzumuga guenji, Yesu wamonegele gudi phangi’enji Yakoba ha gumonesa egi wakhalele gumuzula nu ndando. (1 Kol. 15:7) Tangiza gale luholo luadivuile Yakoba hakotelesele muene egi Yesu walanduile gudisagesa mukunda nu muene? Yajiya gukhala egi ndaga yene yamutshiginyishile nji egi Yesu wakhalele Masiya. Yajiya nji gukhale egi gungima dia gudimona nu Yesu, Yakoba wakuatesele enya fami yenji ako ha gutshigina egi Yesu wakhalele Masiya.b—Makal. 1:14.
17. Luholo lutshi tuajiya gukalegela longo didi mu Roma 12:15? (Tala nji gifuanesa.)
17 Tanga Roma 12:15. Gula tudi mumonesa enya fami yetu egi tuana gudisagesa mukunda nu ene ikhale mu tangua dia gusuanguluga nga dia lamba, tuajiya guakuatesa ha gusombegesa matangi awo mukunda nu Matemue a Yehowa.c Ha gufezegesa, tuajiya guashimana gula avuala mona nu guahana bakado ha guamonesa egi tudi musuanguluga nawo hamoshi. Gula afuisa muthu, tuajiya guahana gikhesa, guakuatesa nga guasonegela gamukanda ha guawalagana. Tudi naye nji guya guatala, guatamega gu telefone nga guasonegela mesaje tangua diagasue; tudi naye gutshita ngenyi muavula-muavula tangua didi ene mutagana nu lamba.
Gula wamonesa enya fami yaye egi wana guazumba nu wana gudisagesa mukunda nu ene mu tangua adi nu funu ya ukuateshi, yajiya guatuma ha gusombegesa matangi awo mukunda nu aye nu mukunda nu giamatshidia (Tala paragrafe 17)g
18. Luholo lutshi tuajiya gulandula gifezegeselo gia Andele?
18 Akuatese ha gudijiya nu aphangi ako a mu hungu. Tangua Andele wakotelesele egi Yesu wakhalele Masiya, wayile muphushi ha guwambela phangi’enji Phetelo ha guza gudimona n’enji. (Yone 1:40-42) Aye nji wajiya gutshita ngenyi mukunda nu enya fami yaye ba? Ha gufezegesa, gula waheta okazio, wajiya gutamega muenya fami waye ha guza mu gudibungisa nga ha gudia hamoshi nu mafuta aye. Gula wamukuatesa ha gudijiya nu aphangi ako, yajiya gumukuatesa ha gukotelesa egi Matemue a Yehowa akhala athu abonga nu akhala nu gisemo.
19. Luholo lutshi tudi naye gukalegela enya fami yetu ndaga ikhale matangua ako ashigo mukotelesa gishina tuana tunyila ndaga jiko? (1 Phetelo 3:15)
19 Tanga 1 Phetelo 3:15. Enya fami yetu ajiyilego gukotelesa tangua diagasue gishina tuana tunyila gutshita ndaga jiko, uvi mbaashigo mujimbila ndaga jiagasue tuana guakalegela nu gisemo nu ginemua giagasue. Idi yadiago egi tuanago gukalagala mawano ako nga ndaga jiko jia kutime hamoshi nawo, uvi ana suanguluga gula tudi mubalegesa nawo tangua. Ha gufezegesa, tuajiya guya guatala, gudia nawo nga guahana bakado mu ba okazio ako.
LANDULA GUKUATESA ENYA FAMI YAYE
20. Mukunda natshi gifezegeselo gia Yakoba gidi nu ndando mukunda nu esue?
20 Yakoba wadifudile okazio yabonga ya gutuala Yesu mu mudimo wa gulongesa, uvi idi yadiago egi gungima wabuile mulandudi wenji. (Gal. 1:18, 19; 2:9) Watumagele malongo a Yesu ikhale gakhalelego mukatshi dia alandudi a thomo a Yesu. Ha gufezegesa, nyuma ya Nzambi wamukuatesele ha gusonega mukunda wana khala nu ndaga jidi gudivua nu Diskur diakalegele Yesu holu dia mulundu.d
21. Mukunda natshi tushigo naye gubemba gukuatesa enya fami yetu ashigo Matemue a Yehowa?
21 Tuajiya getu gukalagala yagasue ha gumonesela enya fami yetu ashigo Matemue a Yehowa gisemo nu guamonesa egi tuana gudisagesa mukunda nu ene, uvi ikhale ngenyi ajiya gawo gutuna giamatshidia nu gulandula gutukalegela ndaga jiajiya gutusagesa. Na mukunda natshi tushigo naye gubemba guakuatesa? Handaga tangua diagasue tuana monesela enya fami yetu nga mafuta etu gisemo, tuana monesa nji egi tudi mulandula khadilo dia khenda dia Yehowa Nzambi nu dia mun’enji Yesu. (Luka 6:33, 36) Gula tualandula guazumba nu guamonesela gisemo, yajiya guatuma ha gusombegesa matangi awo mukunda nu Matemue a Yehowa. Yajiya nji guakuatesa ha guwunguluga ndaga tuaalongesele mu masugu abalega. Gula tualandula gukuatesa enya fami yetu ashigo Matemue a Yehowa, mbatukhala nu gusuanguluga ha gumona ako mukatshi diawo muzula desizio dia gukombelela Yehowa!
LUNGIMBO 60 Sauver leurs vies
a Tala longo “Itshi Tudi Naye Gujiya mu Luholo Yehowa Mbawusophesa Athu mu Masugu adi Muza?” mu Inzo Yaleha ya Mutaledi ya Mai 2024, diyiji 11, par. 11-13.
b Gungima dia gufua nu gufuzumuga gua Yesu, aphangi’enji mbadi a mala Yakoba nu Yuda abuile alandudi enji.
e Ha gujiya ndaga jiko jiajiya gugukuatesa ha guzula desizio diabonga, tala “Mihu Yana Guhula Athu Ana Gutanga Mikanda Yetu” mu Inzo Yaleha ya Mutaledi ya 15 Mai 2002 nu ya 15 Novembre 2007 ya français.
f UKOTELESHI WA GIFUANESA: Gutuama dia guya mu mudimo wa gulongesa, phangi wa mukhetu udi mulondela mulumi’enji ima ya gudia nu gisemo giagasue.
g UKOTELESHI WA GIFUANESA: Phangi muene wa mukhetu waya mutala giwaji gienji munu gashigo Temue wa Yehowa.