Kamba Gujiya Ukoteleshi wa Gubatijiwa

1. Itshi idi mumonesa egi gubatijiwa gudi longo dia ndando mu Biblia?

TUANA khala nu gusuanguluga guavula tangua aphangi ana batijiwa! Aklisto a mu siekle ya thomo akhalele nji nu gusuanguluga gua luholo elu tangua diamonele ene athu avula abatijiwe gu Pantekote ya givo 33 Gungima dia Guvualewa gua Yesu. Mu lusugu luene, mupostolo Phetelo wakalegele diskur diakhalele mumonesa egi gubatijiwa gudi nu ndando. (Makal. 2:38, 40, 41) Mupostolo Phaula wasonegele egi mukatshi dia “malongo a thomo atadila Klisto” gudi nji nu “malongo a gubatijiwa.” (Heb. 6:1, 2) Gubatijiwa gudi mukatshi dia malongo a thomo a Biblia tuana longuga, gishina giene tudi naye gujiya muabonga ukoteleshi wa gubatijiwa guene. Mukunda natshi?

2. Mukunda natshi tudi naye gujiya ukoteleshi wa gubatijiwa?

² Gifua luholo fondasio yana kuatesa inzo ha gukhala tenyi, luholo lumoshi nji gula muthu wajiya ukoteleshi wa gubatijiwa yajiya gumukuatesa ha gukhala nu gutshigina guakola. Ikhale tuabatijiwe gale sendese mualeha nga ndo tudi mutshigina gubatijiwa, mukut’etu agasue tudi naye gukotelesa muabonga ndando ya gubatijiwa. Mu longo edi tuza muhana mvutu gu mihu eyi: Gubatijiwa gudi mukotelesa itshi? Luholo lutshi gubatijiwa gudi naye gukalegewa? Mukunda natshi tuana batijiwa mu jina dia Tata nu dia Mona nu dia nyuma ya Nzambi?

GUBATIJIWA GUDI MUKOTELESA ITSHI?

3. Ndaga itshi tuana monesa tangua tuana batijiwa?

³ Tangua tuana batijiwa ha meso a athu agasue, tuana monesa egi tuatshigina giamatshidia giatadila Yehowa Nzambi nu mun’enji Yesu Klisto. Tuana monesa nji egi tuabalumuna mutshima mu gubola guetu nu tuasombegesa makalegelo etu ha gukombelela Yehowa. Tuana monesa nji egi tuatshigina egi phamba mulambu wa Yesu wajiya gutuhuluisa. Tuana monesa nji egi tuadilogi gudi Nzambi mu gisambu egi mbatutshita gutshigina guenji hamoshi nu ulondegi wenji. Tangua tuana gudihana gudi Yehowa mu gisambu nu tuana batijiwa, tuana sendesa guwenda mu njila idi mubata gu monyo wa ivo nu ivo.

4. Guvuwa muthu mu meya guana monesa itshi? (Tala nji gifuanesa.)

⁴ Gula muthu wabatijiwa, ana gumuvuwa mu meya, gungima ana gumuzola;a ndaga yene yana khala gifua amufunda nu amufuzumuna. (Fuanesa nu Kolosai 2:12.) Gula muthu wabatijiwa, wana monesa egi wakalagala usombegeshi wakoma mu monyo wenji. Mu luholo lutshi? Tangua ana guvuwa muthu mu meya, yana monesa egi wabemba lujingu luakhalele nalo muene thomo. Uvi tangua ana gumuzola mu meya, yana monesa egi wasendesa lujingu luhe-luhe, yakotelesa egi gutshita gutshigina gua Nzambi guabua ndaga yabalega ndando mu monyo wenji.

5. Mukunda natshi tuajiya gufuanesa ndaga udi mutshita ha gubatijiwa nu mudimo wa gutunga masuwa wakalegele Nowa? (1 Phetelo 3:18-21)

⁵ Tanga 1 Phetelo 3:18-21. Tuajiya gufuanesa ndaga muthu wana tshita ha gubatijiwa nu mudimo wakalegele Nowa ha gutunga masuwa. Gula wasendesa gulonguga ndaga jiatadila Yehowa, wajiya gumona egi ndaga jiagasue udi naye gutshita ha gubatijiwa jidi lamba. Wajiya gutangiza egi udi mudimo wakola gifua unu wakhalele nawo Nowa wa gutunga masuwa. Gutshita ndaga jiene jiagasue gudi nu ndando ba? Ayi. Tangiza ndaga yakalegele Nowa. Nzambi wamuwambelele luholo luakhalele naye muene gutunga masuwa. Nowa wakhalele naye gutshita ndaga jiagasue gifua luholo luamuwambelele Yehowa ha guhuluishiwa gu mvula yakola. Nowa watungile masuwa ene handaga watumagele Yehowa, wakhalele nu gutshigina guakola, Nzambi wamukuatesele nji. Gifua Nowa, aye nji wajiya gutshita ‘ndaga jiagasue jidi guguwambela Nzambi.’​—Gis. 6:22.

6. Luholo lutshi gubatijiwa guajiya guguhuluisa?

⁶ Mu 1 Phetelo 3:21, mupostolo Phetelo wasonegele egi gubatijiwa gudi “gumihuluisa.” Mbimbi jiene jishigo mukotelesa egi guvuwiwa mu meya guene gudi guguhuluisa nga gukatula gubola guaye guagasue. Phamba mahatshi a Yesu ajiya guguphelegetesa mu gubola guaye guagasue. (1 Yone 1:7) Uvi gubatijiwa gudi nu ndando handaga yene ndaga idi gugutoga Nzambi ha gutshita; hene gula wabatijiwa idi gifua udi mutoga Nzambi ha guguhana “mutshima waphelegeta.” Yehowa mbawukhala nji nu gusuanguluga ha guguhana ndaga wamutogi. Hene, gubatijiwa gudi ‘guguhuluisa’ handaga gudi gugukuatesa ha guheta monyo wa mayilago.

LUHOLO LUTSHI GUBATIJIWA GUDI NAYE GUKALEGEWA?

7. Luholo lutshi gubatijiwa gudi naye gukalegewa?

⁷ Katula guvuwiwa wagasue mu meya, Biblia yanago gumonesa ndaga jiko jiatadila luholo gubatijiwa gudi naye gukalegewa. Uvi yana gutukuatesa ha gujiya luholo luabonga ndaga jidi naye gubalega. Ha gufezegesa, malongo a Biblia ana kuatesa athu adi mutshigina gubatijiwa ha gujiya luholo luabonga lua gusudiga, ana kuatesa nji athu adi mutala ha gujiya ndaga adi naye gutshita tangua athu ako adi mubatijiwa. (1 Kol. 14:40; 1 Tim. 2:9) Mbala jiavula, akulu akhala nu ginemo gia gubatiza athu, uvi tushigo naye guatumbuisa mukunda nu ginemo giene. (1 Kol. 1:14, 15) Guvula gua athu adi mutala luholo gubatijiwa gudi mukalegewa gushigo nji nu ndando.​—Makal. 8:36.

8. Mihu itshi ana hula athu adi mutshigina gubatijiwa? Mukunda natshi? (Makal. 2:38-42) (Tala nji gifuanesa.)

⁸ Biblia yana monesa egi gula tudi mutshigina guhuluishiwa, tudi naye ‘guzuelela gutshigina guetu ha meso a athu avula.’ (Roma 10:9, 10; tala note d’étude “déclares publiquement” mu Biblia ya français.) Tuanago guzuelela gutshigina guetu guene ha meso a athu phamba mu mudimo wa gulongesa, uvi tuana guyitshita nji mu lusugu lua gubatijiwa guetu! Gishina giene, ana guhula athu adi mutshigina gubatijiwa mihu mbadi. Wa thomo wakhala egi: “Wabalumuna diago mutshima mu gubola guaye nu wadihanyi gudi Yehowa nu watshigina uhuluishi wana guhana muene mu njila ya Yesu Klisto ba?” Muhu owu wana tadila muavula-muavula ndaga jiakalagala muthu ha gubatijiwa, wakhala luholo lumoshi nu ndaga mupostolo Phetelo wawambelele thundu ya athu gu Pantekote. Wa mbadi wakhala egi: “Udi mukotelesa egi gubatijiwa guaye gudi mumonesa egi wabua Temue wa Yehowa nu wangina mu organizasio wenji ba?” Muhu owu wana gutuwunguluisa egi gula tudi mulandula utuameji wana gutuhana Nzambi mu njila ya ulondegi wenji nu tudi gumukombelela hamoshi nu aphangi Aklisto gifua muatshitshile Aklisto a mu siekle ya thomo, mbatumonesa diago egi tudi mujinga mu gudivua nu ndaga tualayele Yehowa. (Tanga Makalegelo 2:38-42.) Athu ana hana mvutu nu mutshima wagasue egi “ayi” gu mihu yene, ene ana monesa egi adi hehi ha gubatijiwa.

9. Ndaga jitshi muthu wagasue mukatshi dietu udi naye gukalagala ha gukuata ufuta nu Nzambi?

⁹ Yajiya gukhala egi gutuama dia gujiya giamatshidia, wakhalele mutshita ndaga jiabonga nu khenji wakalegele nga gubola gumoshi guakoma. Nga ndo wakudile mu fami ya Matemue a Yehowa nu mvuaji jiaye jiagukuatesele ha guzumba Yehowa. Ikhale ngenyi, udi naye gubalumuna mutshima nu gubatijiwa hagula wajiya gukuata ufuta nu Yehowa. Mukunda natshi? Handaga mukut’etu agasue tuana vualewa tushigo athu atagana, ndaga yene yana gutukanga njila ha gukuata ufuta nu Nzambi. (Ngi. 51:5) Hene, tangua tuana longuga giamatshidia giatadila Yehowa, yana gututuma ha gusha gutshigina guenji ha fundo dia thomo mu monyo wetu. Ndaga yene yana gutukuatesa nji ha gubalumuna mutshima, yakotelesa egi gusombegesa lujingu tuakhalele nalo thomo ha gutshita ndaga jidi musuanguluisa sh’etu wa mu dilu. Gungima dia gukalagala ndaga jiene jiagasue, tuajiya giwa gubatijiwa.​—Makal. 3:19.

10. Itshi udi naye gutshita gula wabatijiwe mu gikombelelo giko?

¹⁰ Na gula wabatijiwe gale mu gikombelelo giko, udi naye luko gubatijiwa ha gubua Temue wa Yehowa ba? Ayi. Mukunda natshi? Handaga mu tangua diene, wakoteleselego diago giamatshidia giatadila Yehowa Nzambi nu Yesu. Ikhale wadihanele gudi muene mu gisambu, ndaga wamulayele jiakhalelego diago gudivua nu gutshigina guenji. Ha gufezegesa, mupostolo Phaula wasangela athu ako mu dimbo dia Efeso anyi abatijiwe uvi akhalelego mukotelesa giamatshidia giatadila Yesu. Hene, waakuatesele ha gukotelesa egi akhalele naye gubatijiwa luko.b (Makal. 19:1-5) Luholo lumoshi nji mangino, hagula Yehowa atshigine gubatijiwa gua muthu, muthu muene udi naye gukotelesa muabonga ndaga jidi gumulongesa Nzambi nu gujikalegela.

“MU JINA DIA TATA NU DIA MONA NU DIA NYUMA YA NZAMBI”

11. Gubatijiwa “mu jina dia Tata nu dia Mona nu dia nyuma ya Nzambi” gudi mukotelesa itshi? (Matayo 28:18-20)

¹¹ Yesu wazuelele egi alandudi enji adi naye gubatijiwa “mu jina dia Tata nu dia Mona nu dia nyuma ya Nzambi.” (Tanga Matayo 28:18-20.) Yakotelesa itshi? Mu Biblia, matangua avula “jina” diana gumonesa nji lukuma lua muthu. Diajiya nji gumonesa ginemo nga ufumu udi nawo muthu. Hene, gula tuakalagala ndaga “mu jina dia” muthu nga dia gima, tudi mumonesa egi tudi mutshigina ufumu udi nawo muthu muene nga gima giene. (Fuanesa nu Matayo 10:41; tala note d’étude “parce que c’est un prophète” mu Biblia ya français.) Tutadilenu luholo tuajiya gumonesa egi tudi mutshigina ufumu wakhala nawo Tata nu Mona nu nyuma ya Nzambi.

12. Mu luholo lutshi tuana batijiwa mu jina dia Tata? (Gumonesa 4:11) (Tala nji ifuanes.)

¹² Mu jina dia Tata. Tudi mujiya egi Yehowa wakhala sh’etu wa mu dilu, muene watuhanele monyo. Udi Nzambi wa ngolo jiagasue, muene nji mufugi wa ima yagasue. (Tanga Gumonesa 4:11.) Tudi mujiya nji egi muene wana guvua isambu yetu; tuana kalegela nji jina dienji nu ginemua giagasue tangua tuana gumukombelela nu tuana longesa athu ako ndaga jiamutadila. (Ngi. 65:2) Uvi gubatijiwa mu jina dia Tata gudi mukotelesa ndaga jiko jiavula. Athu akhalele mutegelela Phetelo gu Pantekote akhalele mujiya Yehowa, uvi henyaha akhalele naye gutshigina egi muene wana guhuluisa athu mu njila ya Yesu Klisto.​—Roma 5:8.

13. Mu luholo lutshi tuana batijiwa mu jina dia Mona? (Tala nji ifuanesa.)

¹³ Mu jina dia Mona. Tudi mujiya egi Yesu muene mun’a Nzambi mumoshi ha mumoshi. Yesu udi nji “njila,” handaga phamba muene wajiya gutukuatesa ha gukuata ufuta nu Yehowa. (Yone 14:6) Udi nji muhuluishi wetu handaga wafuile hagula esue tuajiya guheta monyo. Gishina giene tuana landula gifezegeselo gienji lusugu nu lusugu, uvi ishigo phamba mu lusugu tuabatijiwe. (1 Yone 2:6) Tuana longesa nji lukuma luabonga nu gikhesa giagasue gifua muayitshitshile muene nu tuana bembago egi nga gima gimoshi gitukange njila. (Yone 4:43) Tuakhala nji hehi ha gukolesela usageshi wagasue tuajiya gutagana nawo handaga tuana kombelela Nzambi nu gujinginyina guagasue. (2 Tim. 3:12) Tuana nemesa nji Yesu handaga muene udi “Fumu wa hungu,” gutshita ngenyi guana gututuma nji ha gutumagela athu ahanele muene ginemo gia gubamba nu gutuameza alandudi enji.​—Ef. 4:8, 11, 12; 5:23.

14. a) Mu luholo lutshi tuana batijiwa mu jina dia nyuma ya Nzambi? (Tala nji ifuanesa.) b) Mu maluholo atshi ako Aklisto ambiwe maji mu nyuma ana batijiwa luko? (Tala galuanda “Maluholo ako Aklisto Ambiwe Maji mu Nyuma ana Batijiwa.”)

¹⁴ Mu jina dia nyuma ya Nzambi. Tuana tshigina ndaga Biblia yana longesa mukunda nu nyuma ya Nzambi. Nyuma ya Nzambi ishigo nzambi nga muthu, uvi idi ngolo jia Nzambi jiana kalegela muene midimo. Tuana jiya nji egi Nzambi wahanele baprofete nu athu ako asonegele Biblia nyuma yenji. Gishina giene tuana guyitanga muavula nu tuana kalegela malongo adi muene. (2 Phet. 1:20, 21) Tuana tuna nji gukalagala gubola guakoma handaga ndaga yene yana gukanga nyuma ya Nzambi njila hagula yajiya gutuhetela nu yana lengesa nyuma ya Nzambi mu hungu.​—Ef. 4:30.

15. Desizio ditshi tudi naye guzula?

¹⁵ Gula wabatijiwe gale, landula gutshita yagasue ha gukotelesa “malongo a gubatijiwa”c nu gunemesa ndaga walayele Yehowa tangua wadihanele gudi muene nu wabatijiwe. Na itshi wajiya gutshita gula khenji ubatijiwa galego? Gudi nu ndaga idi gugukanga njila ba? Mu longo dialandula, mbatumona ndaga wajiya gukalagala hagula wajiya gubatijiwa.