Udi Wagudilondega Mukunda nu Ndaga Wajiya Gutagana Najio Gungima dia Gubatijiwa Guaye Ba?

1-2. Itshi tuajiya gukalagala ha gudilondega mukunda nu ndaga jiajiya gutubuila gungima dia gubatijiwa? Hana gifezegeselo.

LUHOLO tudi ha mavu awa a Satana, tuana jiya egi mbatutagana nu malamba. Yesu wakhalele mujiya ndaga yene muabonga, wawambelele alandudi enji egi: “Ndaga jidi mubuisa athu mu gubola mbajikhala guene.” (Mat. 18:7) Gishina giene, tudi naye gudilondega mukunda nu ndaga jia lamba tuajiya gutagana najio gifua gukhala nu milonga nu aphangi ako a mu hungu.

² Tutadilenu gifezegeselo gimoshi gidi mumonesa ndaga yene. Akombeledi a Yehowa ana heta malongo avula ana guawunguluisa ha gudilondega mukunda nu malamba ajiya guabuila mu gisagumuisa. Luholo lutshi tuana gudilondega? Thomo, tuana kamba gujiya lamba diajiya gutubuila mu gisagumuisa ha fundo tudi. Gutshita ngenyi guana khala nu ndando yavula gula tudi ngenji ha fundo diene. Ya mbadi, tuana tshita yagasue ha gujiya ndaga mbatukalagala ha gukhala mu ubambi nga fundo mbatulengela, tuana kamba nji gujiya ima mbatukhala nayo funu gula lamba diene diatubuila. (Ish. 21:5) Luholo lumoshi nji, tudi naye gujiya ndaga jiajiya gutubuila gungima dia gubatijiwa nu gudilondega sendese mangino mukunda ndaga jiene. Ngenyi, gula jiatubuila, mbajishigo gutusagesa muavula nga gubolesa ufuta wetu nu Yehowa. (Ngi. 17:5) Henyaha tutadilenu ndaga thathu tuajiya gutagana najio nu luholo tuajiya gudilondega mukunda nu ndaga yagasue.a

PHANGI MUMOSHI WAGUKALEGELA NDAGA YA GUSAGESA

3. Milonga itshi wajiya gutagana nayo mu hungu?

³ Udi muwunguluga luko luholo wadivuile tangua wayile mu gudibungisa mu mbala ya thomo nu wamonele guzumba guakhala nago akombeledi a Yehowa ba? Ndaga yene yagutshiginyishile egi waheta gikombelelo gia giamatshidia ba? (Yone 13:35; Kol. 3:12) Phangi wa mukhetu Blancab wadivuile nji ngenyi. Uvi gungima dia gubatijiwa guenji, watagenele nu ndaga imoshi gakhalelego mutangiza egi yajiya gumubuila. Udi muzuela egi: “Phangi mumoshi wa mukhetu wangukalegele ndaga imoshi yangusagesele diago. Ngakotelesele nji egi phangi muene wakhalele nu khadilo dia gufeta aphangi ako. Ngadihudile diago mukunda nu ndaga yene handaga tangua ngakhalele mulonguga Biblia, anguwambelele egi Matemue a Yehowa ana gudizumba nu ana khala mu guhuima mukatshi diawo.” Idi yadiago egi aphangi aye a mala nu a akhetu ana tshita yagasue ha gukhala nu makalegelo abonga, uvi ujimbilago egi ashigo athu atagana. (Ef. 4:23, 24; 1 Yone 1:8) Matangua ako, phangi mumoshi wajiya guguwambela nga gugukalegala ndaga imoshi yajiya gugusagesa. (Yak. 3:8) Ndaga ya gikenene idi egi ndaga jia luholo elu jiatumile gale athu ako ha gubemba gukombelela Yehowa.

4. Itshi yajiya gugukuatesa ha gujiya ndaga mbawukalagala gula phangi mumoshi wagukalegela ndaga yagusagesa? (Efeso 4:32)

⁴ Itshi yajiya gugukuatesa ha gujiya ndaga wajiya gutshita gula phangi mumoshi wagukalegela ndaga yagusagesa? Khala mukalegela malongo adi mu Efeso 4:32. (Tanga.) Gula watshita yagasue ha gukhala nu gisemo nu guvuila athu ako khenda, mbayigukuatesa ha gutuna gulaba gudinana nu athu ako. Khala nji nu khadilo dia gutotesela athu ako gubola guawo. Itshi yajiya gugukuatesa ha gutshita ngenyi? Khala muzula tangua dia gutangiza guvula gua iphungu wana toga Yehowa ha gugutotesela gubola guaye nu luholo wana khala nu gusuanguluga gula wagutotesela nu mutshima wagasue. (Mat. 6:12) Gutshita ngenyi mbagugukuatesa ha gutotesela nji athu ako gubola guawo.

5. Longo ditshi dia Biblia diajiya gugukuatesa gula muthu wagukalegela ndaga yagusagesa? (Ishima 19:11) (Tala nji ifuanesa.)

⁵ Tanga Ishima 19:11. Biblia yana zuela egi gula tudi nu ndungec nu tudi mutshita yagasue ha gukotelesa athu ako, mbayitukuatesa ha gukhala nu guhuiminyina nu gutuna guvua khabu muphushi gula muthu watukalegela ndaga yabola. Longo didi mu verse yene diana kuatesa nji phangi wa mukhetu Rima, udi nu ivo yazonda mu giamatshidia. Udi muzuela egi: “Gula phangi wa yala nga wa mukhetu wangukalegela ndaga imoshi yangusagesa, ngana tshita yagasue ha guwunguluga verse ya Ishima 19:11. Ngana kamba gujiya ndaga jiamubuidile mu masugu abalega nga malamba adi mutagana nawo muene, ngana kamba nji gujiya ndaga yamutumi ha gutshita ngenyi. Ngana tshita nji yagasue ha guya n’enji mu mudimo wa gulongesa. Ndaga jiene jiagasue jiana gungukuatesa ha gumujiya muabonga.” Ndaga jiazuela phangi Rima jidi longo diabonga diago tuajiya nji gukalegela. Aye nji kamba gujiya aphangi’aye a mala nu a akhetu mangino. Gula udi guakotelesa muabonga, mbayikhala yaleba gudi aye ha guatotesela gula agukalegela ndaga yabola nga yagusagesa.

6. Itshi yajiya gugukuatesa ha gukhala nu ufuta wabonga nu aphangi a mu hungu?

⁶ Itshi wajiya gukalagala ha gukhala nu ufuta wabonga nu aphangi a mu hungu? Tangua udi mukamba gujiya aphangi’aye muabonga, tshita yagasue ha gutadila phamba makalegelo awo abonga. (Fuanesa nu Ishima 10:12; Roma 12:10; Fili. 2:2, 3) Ndaga yene yakuatesele nji phangi Mark wakatuga gubatijiwa. Hasendesele muene gubalegesa tangua nu aphangi a mu hungu diawo, wasendesele nji gumona makalegelo awo ako anyi akhalelego gumusuanguluisa. Itshi yakuatesele phangi Mark ha gutuna gukhakhuga mukunda nu ndaga yene? Udi muzuela egi: “Ngakotelesele egi makalegelo a aphangi anyi ngakhalelego musuanguluga nawo, akhalelego luholo lumoshi nu makalegelo abola akhala nawo athu a ha mavu awa. Ndaga yene yangukuatesele ha gutuna gutadila phamba gubola gua aphangi’ami a mu hungu, uvi ha gutadila nji makalegelo awo abonga.” Gula aye nji wakalagala ndaga gifua phangi Mark, mbawukuata ufuta wabonga nu aphangi avula mu hungu.

WAJIYA GUSENDESA GUTANGIZA NDAGA WABEMBELE

7. Itshi yajiya gutuma muthu ha gusendesa gutangiza ndaga jiabembele muene?

⁷ Tangua wasendesele gulonguga giamatshidia, idi yadiago egi wakhalele nu gusuanguluga ha gubemba ndaga jiabola jia ha mavu awa a Satana. Wajiya nji gudihula egi: ‘Itshi yajiya gutuma muthu ha guwunguluga luko ndaga jiene?’ Uvi ndaga ya giamatshidia idi egi, gula watagana nu lamba, wajiya guwunguluga ndaga jiko wabembele ha gubua mukombeledi wa Yehowa nu gukamba gujivutugila luko. (Fuanesa nu Lutango 11:4-6.) Ha gufezegesa, yajiya gukhala egi aphangi ako akhalele mukalagala midimo yabonga uvi ayibembele handaga yakhalele guazula tangua diavula. Ako nji atotesele mafuta avula hasendesele ene gulonguga Biblia. Ako nji abembele khadilo dimoshi ngenyi diabola ikhale khadilo diene diakhalele guasuanguluisa muavula. Idi ndaga ya gikenene gula Muklisto wabemba egi ndaga jiakhalele muene mutshita gutuama dia gujiya giamatshidia jimutume ha gubemba gukombelela Yehowa! Itshi wajiya gukalagala mangino inyi yajiya gugukuatesa ha gutuna guvutugila luko ndaga wabembele ha gubua Muklisto ikhale watagana nu lamba dia luholo lutshi?

8. Gifezegeselo gia Abalahama nu Sara gidi gutulongesa itshi?

⁸ Biblia yana khala nu ifezegeselo yavula ya akombeledi a Nzambi agujinginyina anyi nga akhalelego nu gutema, nga asendesele gutangiza ima yabembele ene. Ha gufezegesa, Abalahama nu Sara atumagele Yehowa, abembele dimbo dia Ure diakhalele nu ibayi yakola ha guya mukhala mu tenta. (Heb. 11:8, 9) Yajiya gukhala egi matangua ako akhalele muwunguluga ima yabonga akhalele nayo gu Ure. Uvi ‘nga akhalele mutangiza ima yene tangua diagasue’ nga gukamba gukhala luko nayo, nga yaatumile ha guvutuga luko gu Ure. Uvi Abalahama nu Sara akalegelego ngenyi, alanduile gusha matangi awo mu ndaga jiaalayele Yehowa.​—Heb. 11:15, 16.

9. Luholo lutshi mupostolo Phaula wakhalele mutadila ima yabembele muene? (Filiphi 3:7, 8, 13)

⁹ Mupostolo Phaula wabembele nji ndaga jiko mu monyo wenji ha gukombelela Yehowa. Gutuama dia gubua Muklisto, walongugile mikhuala ya enya Yuda gudi mulongeshi wakoma Gamaliele. (Makal. 22:3) Wakhalele nji nu luendu lua gubua muthu wakoma mu gikombelelo gia enya Yuda. (Gal. 1:13, 14) Uvi hatshiginyile muene lukuma luabonga, wabembele ima yene yagasue. Na gungima dia gubua Muklisto, ndaga jiagasue jiakhalele muyila muabonga mu monyo wenji ba? Ndo sha. Watagenele nu malamba avula gifua gubetewa, gumbiwa mu bologo nu gutunyiwa gudi enya Yuda ako. (2 Kol. 11:23-26) Nga Phaula wakhalele mutadila phamba malamba ene nga gutangiza egi wakhalele nu lujingu luabonga gutuama dia gubua Muklisto, nga watangijile egi wakalegele ndaga yabola luholo luabuile muene mulandudi wa Yesu. Uvi Phaula gakalegelego ngenyi, walanduile gusha matangi enji mu ginemo gia ndando giakhalele nagio muene gia gukhala mulandudi wa Yesu Klisto nu mu ndaga jiabonga jiakhalele naye muene guheta mu masugu adi muza. Wakhalele nji mujiya egi desizio diazudile muene dia gubua Muklisto diakhalele nu ndando yavula gubalega ima yagasue yabembele muene!​—Tanga Filiphi 3:7, 8, 13.

10. Mu ndaga itshi udi naye gutangiza muavula? (Mako 10:29, 30) (Tala nji ifuanesa.)

¹⁰ Longo ditshi wajiya guzula? Gula matangi a ndaga wabembele ha gubua Muklisto adi gugujila, zula nji tangua dia gutangiza gishina wajitunyile. (Mulo. 7:10) Khala mufuanesa ndaga wabembele nu gubonga udi nago mangino luholo udi mu giamatshidia. Ha gufezegesa, udi nu ufuta wakola nu Mufugi wa ima yagasue. (Ish. 3:32) Udi nji mukatshi dia fami ya aphangi ana guguzumba muavula. (Tanga Mako 10:29, 30.) Udi nji nu felela diabonga mukunda nu masugu adi muza! (Yesh. 65:21-23) Gula udi muzula tangua dia gutangiza muavula ishimbigo yavula udi nayo luholo wana kombelela Yehowa, mbawushigo mukhala gudisagesa mukunda nu ndaga wabembele.

11. Malongo atshi wajiya guzula mu lumene lua phangi Rosemary?

¹¹ Phangi Rosemary wabatijiwe hakhalele muene nu ivo 50 nu ndambu. Tala ndaga yakalegele muene ha gutuna gutangiza ndaga jiabembele muene. Udi muzuela egi: “Tangua ngabuile Temue wa Yehowa, ngakhalele muvua gikenene giavula mu sungi ya Nowele handaga yene sungi ngakhalele mubalegesa tangua diabonga nu enya fami yami. Ngakhalele musuanguluga ha guhana athu ngana zumba bakado. Ngakhalele nji musuanguluga gumona luholo ana akhalele mukhala gu mutshi wa Nowele nu luholo akhalele musuanguluga ha gukangula bakado awo.” Itshi yakuatesele Phangi Rosemary? Udi muzuela egi: “Ngakambele maluholo ako ngajiya gubalegesa tangua nu enya fami yami. Givo nu givo, ngana tomba lusugu lua gudisha, ngutamega enya fami yami, nguahanyi bakado, nguawambela nji egi ngana guazumba.” Phangi Rosemary watagenele nji nu lamba diko. Udi muzuela egi: “Tangua ngabuile Temue wa Yehowa, mafuta ami angutunyile. Matangua ako, ngakhalele muvua giheho giawo, ngakhalele nji gudivua hakhami.”d Itshi yamukuatesele? Phangi Rosemary wakhalele gudivua nu aphangi a akhetu agudisha ha guzoga nawo mu mudimo wa gulongesa. Udi muzuela egi: “Gutshita ngenyi guangukuatesele ha guheta mafuta ahe-ahe anyi ngana zumba nu ngana zula nu ndando yavula.” Longo ditshi wajiya guzula mu lumene luenji? Ikhale wajiya guvua giheho gia ndaga imoshi ngenyi wakhalele musuanguluga nayo gutuama dia gujiya giamatshidia, uvi jiya egi wajiya nji gutshita ndaga jiko jiabonga mangino jiajiya nji gugusuanguluisa. (Fili. 4:8, 9) Jiya nji egi: Yehowa mbawugukuatesa ha guheta ima yavula gubalega inyi wabembele.

ATHU AKO ABEMBA GUKOMBELELA YEHOWA

12. Ndaga itshi yajiya gubua mu hungu inyi yajiya gugusagesa?

¹² Tangua wabuile Temue wa Yehowa, idi yadiago egi wakhalele nu gusuanguluga ha gubemba ndaga jiabola jia ha mavu awa nu ha gungina mu fami yakoma ya athu ana tshita yagasue ha gulongesa giamatshidia nu ha gutshita ndaga jiabonga. (Yesh. 65:14) Uvi gungima wasendesele guvua egi athu ako a mu hungu akalagala ndaga jiabola. Yajiya nji gukhala egi athu ako azolewe mu hungu. (1 Kol. 5:13) Tala luholo luadivuile phangi wa mukhetu Samar hamonele muene ndaga ya luholo elu. Udi muzuela egi: “Matangua azonda gungima dia gubatijiwa guami, mukulu mumoshi wakalegele gubola guakoma nu wazolewe mu hungu. Ngadihudile diago mukunda nu ndaga yene handaga ngakhalelego mutangiza egi mukulu wajiya gukalagala gubola guakoma ngenyi mukunda nu Yehowa nu gusagesa aphangi a mu hungu.” Idi yadiago egi tudi naye gusha mutshima egi aphangi’etu ana zumba Yehowa nu ana tshigina gusala agujinginyina gudi muene. (1 Kol. 13:4, 7) Uvi ndaga ya gikenene idi egi givo nu givo, athu ako ana zolewa mu hungu. Ndaga ya luholo elu yajiya gukhala lamba mukunda nu aye gula muthu muene wazolewa mu hungu udi muenya fami yaye, futa diaye nga muthu wana zula nu ndando yavula.

13. Itshi wajiya gukalagala mangino inyi mbayigukuatesa ha gutuna gukhakhuga gula muthu wana zumba wabemba gukombelela Yehowa?

¹³ Itshi wajiya gukalagala mangino inyi mbayigukuatesa ha gutuna gukhakhuga gula muthu wana zumba wabemba gukombelela Yehowa? Khala mukolesa ufuta waye nu Yehowa. (Yak. 4:8) Ubembigo egi ufuta waye nu Yehowa ukhale ha mago a muthu muko handaga tangua wadihanele gudi muene, wazuelele egi mbawumukombelela ikhale athu ako amutuna. Ha gufezegesa, tuana khala nu gusuanguluga ha gukombelela Yehowa hamoshi mu hungu nga mu fami, uvi muthu wagasue mukatshi dietu udi naye gukhala nu programe yenji hakhenji ya gutanga Biblia nu ya gukombelela Yehowa.​—Ngi. 1:2; 62:8.

14. Malongo atshi tuajiya guzula mu gifezegeselo gia mupostolo Phetelo? (Yone 6:66-68)

¹⁴ Tuajiya nji guzula malongo ako mu ndaga yakalegele mupostolo Phetelo tangua alandudi ako abembele gulandula Yesu. Yajiya gukhala egi Phetelo nji gakoteleselego ndaga jiazuelele Yesu mu tangua diene. Uvi tala ndaga jiazuelele muene mu Yone 6:66-68. (Tanga.) Ha fundo dia gulandula ndaga jiakalegele athu ako, Phetelo washile mutshima mu mbimbi jia giamatshidia Yesu wakhalele mulongesa. Ndaga yene yamukuatesele ha gutuna gukhakhuga. Luholo lumoshi nji mangino, makalegelo a athu ako ajiyilego gusombegesa giamatshidia gia ndando tuajiyile mu ukuateshi wa ulondegi wa Nzambi. Hene, sala bobobo gu giamatshidia giene! Phangi Samar tuazuelela gu thunda udi muzuela egi: “Ngana tshita yagasue ha guwunguluga egi, makalegelo abola a muthu mumoshi ashigo mumonesa egi yene ndaga athu agasue a mu hungu nga a mu ulondegi ana kalagala. Yehowa mbawulandula gukhala Nzambi wabonga ikhale athu akalagala ndaga jiabola nga ndo.”

15. Longo ditshi wazula mu lumene lua phangi Emily?

¹⁵ Tutadilenu ndaga yabuidile phangi Emily. Phoso imoshi gungima dia gubatijiwa guenji, mama wenji wazolewe mu hungu, wakatugile nji gu inzo ha guya mukhala ha fundo diko. Emily udi muzuela egi: “Ngakhalelego mutangiza egi mama wajiya gukalagala ndaga ya luholo elu. Ndaga yene yana gungusagesa muavula, ngana guvua nji uhote wa mama muavula.” Itshi yakuatesele phangi Emily? Udi muzuela egi: “Ngushigo hakhami. Tata wana gungukuatesa muavula, aphangi a mu hungu nji ana gungukuatesa handaga abuile gale gifua enya fami yami. Ngudi nji mujiya egi mukut’etu agasue tuana tagana nu malamba. Gishina giene tudi naye gukuata ufuta wakola nu aphangi’etu nu gudihana gikhesa.” (1 Phet. 5:9) Ushigo naye gunengena uu nu tangua lamba mbadigubuila hagula ukolese giwa ufuta waye nu aphangi. Sendesa guyitshita mangino. Ngenyi gula lamba diagubuila, mbawushigo gudivua hakhaye.

16. Ndaga itshi ushigo naye gujimbila? (Tala nji gifuanesa.)

¹⁶ Ndaga iko ushigo naye gujimbila idi egi, Yehowa wana hana ndola gudi athu ana zumba muene. (Heb. 12:6) Wana tshigina egi athu agasue azolewe gale mu hungu avutuge luko gudi muene. (2 Phet. 3:9) Hene, gula muthu wana zumba wazolewa mu hungu, jiya egi akulu mbaatshita yagasue ha gumukuatesa ha guvutuga luko gudi Yehowa.​—2 Tim. 2:24, 25.

17. Ndaga itshi ushigo naye gubuita mutshima?

¹⁷ Mu longo edi tuazuelela phamba malamba azonda wajiya gutagana nawo gungima dia gubatijiwa guaye. Ako mukatshi diawo ajiya guguhana woma, uvi ulebigo muila. Gudi nu ndaga jiavula wajiya gutshita ha gudilondega sendese mangino mukunda nu malamba ene. Ubuitshigo nji mutshima egi Yehowa Nzambi udi guene ha gugukuatesa. Wana gugukuatesa gale nu mbawulandula gugukuatesa mayilago! (1 Phet. 5:10) Muene mbawuguhana ngolo jia gukolesela lamba diagasue mbawutagana nadio. Gula watshigina ukuateshi wa Yehowa, gushigo nga nu lamba diajiya gugukaphumuna n’enji!​—Ngi. 119:165; Roma 8:38, 39.