Udi Mujiya Luko Ba?

Watangele muabonga Inzo Yaleha ya Mutaledi ya 2025 ba? Gula idi ngenyi, wajiya guhana mvutu gu mihu eyi yalandula:

Itshi yana gututuma ha gutumbuisa Yehowa?

Guzumba guana gututuma ha gutumbuisa Yehowa nu ha gumunemesa diago. Tuana tshita nji ngenyi handaga tuana tshigina egi athu ako amujiye.​—w25.01, diyiji 3.

Itshi yajiya gutukuatesa ha gutotesela muthu watukalegela ndaga yabola?

Tushigo naye gutshita gifua gushigo nu mulonga; uvi tuajiya gumutotesela hagula ndaga yene itusagesago muavula.​—w25.02, diyiji 15-16.

Mukunda natshi mulandudi Mako udi gifezegeselo giabonga mukunda nu aphangi a mala adi mavuala?

Mako watshiginyile nu mutshima umoshi mudimo amuhanele ha gutshita. Ikhale mu tangua dimoshi ngenyi Mako wakhalele nu gikenene nu walebele muila mukunda nu ndaga imoshi yakalegewe, uvi gabembelego mudimo wenji. Wakuatele ufuta wakola nu Phaula nu Aklisto a gukula mu nyuma.​—w25.04, diyiji 27.

Yesu watshiginyile guzuela itshi hawambelele muene Yehowa mu gisambu egi: “Ngaajiyishile jina diaye”? (Yone 17:26)

Alandudi enji akhalele mujiya muabonga jina dia Nzambi. Uvi Yesu waawambelele ndaga jiavula jiatadila Nzambi, gifua ndaga jialayele muene, midimo yenji nu makalegelo enji.​—w25.05, diyiji 20-21.

Gula tudi nu khadilo dia gudibulumuisa, ndaga itshi tudi naye gujiya?

Tudi naye gujiya egi gudi nu ndaga jiko tushigo mujiya. Ha gufezegesa, tushigo mujiya lusugu gisugishilo mbagiza nu luholo Yehowa mbawukalagala ndaga mu tangua diene. Tushigo nji mujiya ndaga mbajibua hamene nga luholo Yehowa wana gutujiya.​—w25.06, diyiji 15-18.

Itshi yajiya gutukuatesa ha guzula malongo mu longo dimoshi nga mu diskur dimoshi ngenyi?

Tuajiya gudihula egi: ‘Bametode atshi adi mukalegela ha gukuata mitshima ya athu? Akalegela gifezegeselo nga gifuanesa giabonga ngajiya gukalegela mu mudimo wa gulongesa ba? Akuatshi ajiya gusuanguluga nu ndaga jidi mu longo edi nga mu diskur edi?’​—w25.07, diyiji 19.

Malongo atshi tuajiya guzula mu luholo Yehowa watotesele Davidi?

Davidi wakalegele gubola guakoma; uvi tangua diabalumuine diago muene mutshima, Yehowa wamutotesele. (1 Maf. 9:4, 5) Gula Nzambi watotesela muthu gubola guenji, ganago luko gutangiza gubola guene nu ganago gugubamba mu mutshima ha gumuwunguluisa nago mu masugu adi muza.​—w25.08, diyiji 17.

Itshi wajiya gutshita gula muthu wana longesa Biblia gashigo mukotelesa ndaga imoshi ngenyi?

Gula wamukotelesela ndaga imoshi ngenyi mbala jiavula uvi muene nu gukotelesa ndo, muajiya gubalega fundo diene, mulonguga ndaga iko. Gungima muajiya giwa guyivutugila.​—w25.09, diyiji 24.

Biblia yana zuela egi “ngolo jia masumu jiana huiga.” (Heb. 3:13) Luholo lutshi?

Gubola guajiya gututuma ha gutshita nda jiabola. Guajiya nji gututuma ha gukhala nu badute nu gutangiza egi Yehowa gajiyilego gutuzumba.​—w25.10, diyiji 16.

Ndaga jitshi thathu jiajiya gutukuatesa ha gutshita isambu yabonga?

1) Gutangigiza makalegelo a Yehowa. 2) Guzula tangua dia gutangiza ndaga tudi mutshigina guwambela Yehowa gifua gumutoga ha gutuhana ngolo jia gutotesela muthu. 3) Gutshita isambu yaleha. Gutshita ngenyi mbagutukuatesa ha guwambela Yehowa ndaga jiagasue jidi mu mutshima wetu.​—w25.10, diyiji 19-20.

Luholo lutshi tuajiya gukuatesa aphangi agukola?

Tuajiya guatamega gu telefone nga guya guatala. Tuajiya guatuala gu opitale. Tuajiya nji gulongesa nawo mu maluholo avula.​—w25.11, diyiji 6-7.

Luholo lutshi Aklisto ajiya gutshita egi ulo wawo utumbuise Yehowa?

Adi naye gunemesa mikhuala ya leta mukunda nu ulo. Adi naye gutshita egi ndaga mbajikalegewa gu ulo wawo jitumbuise Yehowa nu jimonesa makalegelo a Aklisto. Adi naye gusudiga mu luholo ludi mumonesa egi adi nu khadilo dia gudibulumuisa, adi naye nji gutuna kutime jiagasue jishigo gudivua nu malongo a Biblia. Adi naye nji guta maga muabonga hadi ene mulondega ulo wawo.​—w25.12, diyiji 21-24.