Gula Malamba Amibuila

Muajiya gukalagala luholo luagasue hagusuanguluga mu ulo nga mufami yenu, uvi jiyenu egi malamba ajiya gumibuila. Mutangua diene yajiya gukhala lamba hagusuanguluga. (Ishima 9:11) Nzambi wana gutukuatesa nu guzumba guagasue tangua malamba ana gutubuila. Gila walandula mikhuala ya Biblia, aye nu fami yaye mba mujiya luholo lua guluisa malamba.

1 SHILENU YEHOWA MUTSHIMA

BIBLIA YAZUELA EGI: “Mumuwambele ndaga jiagasue jidi mumisagesa mu mitshima yenu, ndaga ya muene wanabata ginemo gienu.” (1 Phetelo 5:7) Mujimbilako egi Nzambi ashiko shagishina giamalamba enu. (Yakoba 1:13) Gula muasuena hehi nu Yehowa, mba umikuatesa mu luholo luabonga. (Yeshaya 41:10) “Mumujiyise phashi jienu jiagasue.”​—Ngimbo 62:9.

Gila masugu agasue mudi mutanga nu gulonguga(kulonga) Biblia mba muheta guhuima. Mba mumona luholo Yehowa ana ‘gutuwalagana mu malamba etu agasue.’ (2 Kolinto 1:3, 4; Lomo 15:4) Wamilaya gumihana “guhuima gua Nzambi gudi mubalega ndunge jiagasue.”​—Filiphi 4:6, 7, 13.

GIMA WAJIYA GUKALAGALA:

• Kombelelenu Yehowa amikuatese mukhale nu guhuiminyina hagutangiza muabonga

• Tombenu luholo luabonga lua gumanesela milonga mudi naye

2 DIBAMBE AYE NU FAMI YAYE

BIBLIA YAZUELA EGI: “Muenya ndunge wanatshigina guvua nu gujiya jindaga.” (Ishima 18:15) Talela milonga yagasue. Kalagala ngolo hagujiya matangi amuthu nu muthu mu fami yaye. Zuela nawo. Ategelele.​—Ishima 20:5.

Gila muthu wana guzumba muavula wafua? Monesa luholo udi gudivua. Wunguluga egi “Yesu wadidile.” (Yone 11:35; Mulongeshi 3:4) Guhuima nu gubanda tulo muavula gudi nu ndando. (Mulongeshi 4:6) Guajiya gugukuatesa mutangua diamalamba.

GIMA WAJIYA GUKALAGALA:

• Tangua diagasue khala nu khadilo diaguta mene nu enya fami yaye. Gula malamba amibuila, mba asuanguluga gugutela mene jiawo

• Ta mene nu athu ako ataganene nu malamba a luholo luene

3 KAMBA UKUATESHI WATAGANA

BIBLIA YAZUELA EGI: ‘Mafuta anaditshigina masugu agasue, aphanji anadikuatesa mu makumbi a malamba.’ (Ishima 17:17) Mafut’aye ajiya gutshigina gugukuatesa uvi tangua diko ashiko mujiya luholo lua gukalagala. Uviko sonyi jiagualeza gima udi nagio funu. (Ishima 12:25) Kamba ukuateshi gua athu ana gujiya Biblia muabonga. Malongo a Biblia mba aguhana, ajiya gugukuatesa muavula.​—Yakoba 5:14.

Gila udi nu ufuta nu athu adi nu gutshigina guakola gudi Nzambi nu malaji enji, mba uheta ukuateshi watagana. Gila udi mukuatesa athu ako adi nu malamba aluholo luene, mba uheta guhuima guavula. Amonese gusuanguluga guaye gudi Yehowa nu malaji enji. Kuatesa athu ako adi mulamba, udikhalelako, khala mukatshi dia athu ana guguzumba.​—Ishima 18:1; 1 Kolinto 15:58.

GIMA WAJIYA GUKALAGALA:

• Tela futa diaye mumoshi wa mutshima lumene, hagula agukuatese

• Muleze matangi aye haphelo