Yoshua
20 Gungima Yehowa wawambelele Yoshua egi: 2 “Wambela enya Isalele egi: ‘Tombenu membo a gulengela anyi ngamiwambelele mu njila ya Moize, 3 hagula muthu washiyi muthu uvi gakhalelego nu matangi a gumushiya wajiya gulenga guene. Membo ene mbaakhala fundo dia gudisuegela ha gulenga muthu udi naye guvutula gubola mukunda nu muthu wafui. 4 Muthu washiyi muthu udi naye gulenga mu dimbo dimoshi mukatshi dia membo ene; mbawumagana ha mufulo wa dimbo, gungima mbawuwambela akulu a mu dimbo diene mulonga wenji. Akulu mbaamunginyisa mu dimbo, amuhanyi fundo dia gukhala; muene mbawukhala mukatshi diawo. 5 Gula muthu udi naye guvutula gubola mukunda nu muthu wafui wamuhata, akulu ashigo naye gumuhana ha mago a muthu muene handaga gakhalelego nu matangi a gushiya muthu muene, gakhalelego nji n’enji nu umbalagaji. 6 Muthu muene udi naye gukhala mu dimbo diene uu nu tangua mbaamusophesa gutuama dia athu, mbawusala guene uu nu tangua mbadifua nganga-nzambi wakoma udi mutshita mudimo mu masugu ene. Gungima wajiya giwa guvutuga mu dimbo diakatugile muene, mbawungina mu inzo yenji mu dimbo diawo.’”
7 Hene, abuishile membo awa a gijila:* Kedeshe gu Galilea, gu khanda ya milundu ya Nefetali nu Shekeme, gu khanda ya milundu ya Efrayime, nu Kiriyate-Arba, yakotelesa egi Hebrone, gu khanda ya milundu ya Yuda. 8 Gu khanda ya Yordane gu khanda ya mazogelo a kumbi a Yeliko, atombele Besele mu mavu a luselenga, mu mafundo ashigo nu milundu mu mavu a giphuta gia Ribene, nu Ramote gu Gileade mu mavu a giphuta gia Gade, nu Golana gu Bashana mu mavu a giphuta gia Manase.
9 Ene membo atombewe mukunda nu enya Isalele agasue nu ngenji jiakhalele mukatshi diawo, hagula muthu washiyi muthu* uvi gakhalelego nu matangi a gumushiwa wajiya gulenga guene, nu hagula muthu udi naye guvutula gubola mukunda nu muthu wafui gamushiyigo gutuama egi amusophese gutuama dia athu.