Yelemiya
49 Mukunda nu enya Amona, Yehowa wazuela egi:
“Isalele gashigo nu ana ba?
Muene gashigo nu muthu wa guzula khapho dienji ba?
Mukunda natshi Malekame wazudile khapho dia Gade?
Mukunda natshi athu enji adi mujinga mu membo a gu Isalele?”
2 Yehowa wazuela egi: “‘Gishina giene, mu masugu adi muza,
mbangutshita egi matululu a gijiyishilo ha gulua ita* avuiwe gu Raba ya enya Amona.
Yene mbayibua gifua mulundu wasala wa githuhu,
membo enji a hehi* mbaakondewa tshuya.’
‘Isalele mbawuzula khapho dia athu azudile khapho dienji,’ Yehowa wazuela.
3 Oo Heshebona, dila handaga dimbo dia Ayiya diashiyiwe!
Enue membo adi hehi nu Raba, dilenu.
Sudigenu sagi jia ngombo.
Dilenu, ndenu nu guwenda mu dinda dialondewe nu maseso,*
handaga Malekame mbawuya mu uhiga,
hamoshi nu nganga-nzambi jienji nu manene enji.
4 Aye mona mukhetu gashigo ya gujinginyina,
mukunda natshi udi gudihala mukunda nu mababa,
mukunda nu mavu aye ashigo nu milundu anyi adi nu meya avula adi mubulumuga?
Udi musha mutshima mu umonyi waye, udi muzuela egi: “Nanyi mbawuza gunguluisa?”’”
5 “‘Ngudi gugutumila gima gimoshi ha guguhana woma wakola,
mbagikatuga gudi athu agasue adi mu khulo yenu,
mbamumuangana khanda jiagasue,
gushigo nga nu muthu mbawubungisa athu alengi.’” Yehowa Nzambi wa masuta, fumu wabalega gukoma wazuela.
6 “‘Uvi gungima mbangubungisa enya Amona ayile mu uhiga,’ Yehowa wazuela.”
7 Mukunda nu Edome, Yehowa Nzambi wa masuta wazuela egi:
“Ndunge jishigo luko gu Temana ba?
Malongo abonga atota gudi enya ndunge ba?
Ndunge jiawo jishigo luko nu ndando ba?
8 Enue enya gu Dedane!
Balumugenu, lengenu! Ndenu mudisuege moshi’a mababa aleha,
handaga mbangubatela Ezau malamba
tangua mbangutala mulonga wenji.
9 Gula athu ana katula mabundu a vinyo aza gudi aye,
ene mbaashigo mubemba mabundu ako ha gunona ba?
Gula nzangi jiaza mu phipha,
mbajibolesa phamba ima inyi jiatshigina gubolesa.
10 Mbangubemba Ezau thowa.
Mbanguzola mafundo enji a gudisuega haphelo,
hagula gadisuegigo luko.
An’enji nu aphangi’enji nu athu ana jinga n’enji hehi mbaashiyiwa,
muene nji mbagashigo mukhala luko.
11 Bemba an’aye a shiye,
mbanguhuluisa mionyo yawo,
akhetu aye a gafunda mbaangushila mutshima.”
12 Yehowa wazuela egi: “Tala! Gula athu anyi akhalelego naye gunua khopho dia khabu adi naye gudinua, na aye udi naye gubembewa ngenyi guhanewa ndola ndo ba? Ndo, ushigo naye gubembewa ngenyi, udi naye gunua khopho dia khabu.”
13 “Ame hakhami ngadiloga egi Bosela mbayibua gifua gima gidi mukuatesa woma, gima gia guseguluiwa, gima gidi mubolesewa, nu gima gidi mutewa mikumbu; membo enji agasue mbaabua makhulu mayilago,” Yehowa wazuela.
14 Ngavile lumene lumoshi luakatugile gudi Yehowa;
muthu mumoshi watumiwe mukatshi dia ifutshi, wazuelele egi:
“Dibungisenu hamoshi, zenu mumuluise;
dilondegenu mukunda nu ita.”
15 “Tala! Ngagubuisa gifua gima gia githuhu mukatshi dia ifutshi,
athu adi gugusegulula.
16 Oo aye wana khala moshi’a maseso akoma,
aye wana khala holu dia mulundu waleha,
woma wakhalele guguvila athu,
nu lulendo lua mutshima waye lua guhuigile.
Ngatshima watungile kianzu giaye gosa gualeha gifua njila ya khuyi,
mbangugutulula hashi,” Yehowa wazuela.
17 “Edome mbawubua gifua gima gidi mukuatesa woma. Athu agasue mbaabalega hehi n’enji mbaatala nu woma wagasue, mbaamulela* mukunda nu malamba enji agasue. 18 Mbayikhala gifua luholo Sodoma nu Gomola nu membo enji a hehi ashiyiwe, gushigo nga nu muthu mbawukhala guene nga gutunga guene.” Yehowa wazuela.
19 “Talenu! Muthu mumoshi mbawuzoga ha guluisa mafundo agudishila shitu a enya Edome, gifua khoshi yazoga moshi’a mavunda a gishitu adi mu khulo ya Yordane. Uvi mbangumukaya mu gifutshi giene mbala imoshi. Mbanguhaga muthu ngatombele ha guhinyina guene. Handaga nanyi udi gifua ame? Nanyi wajiya gunguluisa? Mubambi mutshi wa imeme wajiya gumagana gutuama diami? 20 Henyaha enue mala tegelelenu desizio diazudi Yehowa mukunda nu Edome nu ndaga jiatangiza muene mukunda nu enya gu Temana, egi:
Ana a imeme mbaabatewa gualeha.
Muene mbawutshita egi fundo diawo dia gukhala disale dia githuhu mukunda nu ene.
21 Matululu a gubua guawo adigitshishile mavu.
Athu adidile!
Matululu avuiwe uu nu gu Kianga Giabenga.
22 Mbalagaji mbawusununa mahambu enji holu dia Bosela,
gifua njila ya khuyi idi mukanduga nu idi mubulumuga muphushi hashi.
Mu lusugu luene masuta a ngolo a gu Edome mbaavua lamba
gifua lamba diana vua mukhetu mu tangua dia guvuala.”
23 Mukunda nu Damase:
“Hamate nu Alephada yahanewe musonyi,
handaga avile lumene luabola.
Adigitshile nu woma.
Kianga gidi nyiga-nyiga giajiyilego guhenesewa.
24 Damase walebele muila.
Wabalumugile ha gulenga, uvi woma wakola wamukuatele.
Wakhalele nu gikenene giavula nu lamba,
gifua mukhetu udi muvuala.
25 Mukunda natshi dimbo edi dia lutumbu,
dimbo dia athu akhalele nu gusuanguluga diabembewego?
26 Handaga mavuala enji a mala mbaabua mu mafundo enji a athu avula,
masuta agasue mbaafua mu lusugu luene,” Yehowa Nzambi wa masuta wazuela.
27 “Mbangukonda gibayi gia gu Damase tshuya,
tshuya tuene mbatukonda nji jinzo jialeha jia gu Bene-Hadada.”
28 Yehowa wazuela mukunda nu Kedale nu mawufumu a gu Hasole, anyi Nebukadenezale* fumu wa gu Babilona wabingile, egi:
“Zugenu, ndenu gu Kedale,
mushiye ana a mala a gu khanda ya mazogelo a kumbi.
29 Zulenu tenta jiawo nu shitu jiawo,
nu milele ya tenta jiawo nu ima yawo yagasue.
Zulenu nji shamo jiawo,
athu mbaadidila egi: ‘Woma udi muagasue.’”
30 “Enue enya gu Hasole, lengenu, ndenu gualeha!
Ndenu mudisuege moshi’a mababa aleha,
handaga Fumu Nebukadenezale* wa gu Babilona udi nu matangi abola mukunda nu enue,
wamiyila giphungi ha gumibatela malamba,” Yehowa wazuela.
31 “Zugenu, ndenu muluise gifutshi giana khala mu guhuima,
gifutshi giana khala mu ubambi!” Yehowa wazuela.
“Giana khala ndo nu mifulo nga nu ima ya gukangela mifulo; ene ana khala hakhawo.
32 Shamo jiawo mbajitambudiwa,
Shitu jiawo jiavula mbajitambudiwa nji.
Mbangumuanga athu ana bunga masanga gu tempelo
gu khanda jiagasue,*
mbanguabatela malamba gu khanda jiagasue,” Yehowa wazuela.
33 “Hasole mbayibua fundo dia gukhala mukunda nu makombe,
mbayibua makhulu mayilago.
Gushigo nga nu muthu mbawukhala guene,
gushigo nji nga nu muthu mbawutunga guene.”
34 Mu gisendeselo gia uhinyinyi wa Sedesiase fumu wa gu Yuda, Yehowa wawambelele profete Yelemiya mukunda nu Elama egi: 35 “Yehowa Nzambi wa masuta wazuela egi, ‘mbangubogola uta wa manana wa Elama, fundo* ngolo jienji jiana katuga. 36 Mbangubata mihehe nguana ya gu songi nguana jia mu dilu. Mbanguamuanga gu khanda jiagasue jidi mubunda mihehe yene. Enya gu Elama mbaamuangana mu ifutshi yagasue.’”
37 “Mbanguvuisa enya gu Elama woma gutuama dia mbalagaji jiawo nu gutuama dia athu adi mukamba guashiya; mbanguabatela malamba, mbanguavila khabu jiakola. Mbangutuma phogo ya khusa ha guahata uu nu tangua mbanguamanesela mukut’awo agasue.” Yehowa wazuela.
38 “Mbanguhaga nguasa yami ya ufumu gu Elama, mbangushiya fumu nu manene,” Yehowa wazuela.
39 “Uvi mu masugu a gisugishilo mbangubungisa enya Elama,” Yehowa wazuela.