Yelemiya
41 Mu mbeji ya 7, Ishemayele mun’a Netania, mujigulu wa Elishama munu wakhalele mu fami ya ufumu,* wajile nu mala 10 gudi Gedaliya mun’a Ahikama gu Mispa. Tangua akhalele mudia hamoshi gu Mispa, 2 Ishemayele mun’a Netania nu mala 10 akhalele n’enji azugile, ashiyile Gedaliya mun’a Ahikama mun’a Shafane nu phogo ya khusa. Ngenyi ashiyile muthu munu fumu wa gu Babilona watombele ha guhinyina gifutshi. 3 Ishemayele washiyile nji enya Yuda agasue anyi akhalele nu Gedaliya gu Mispa, nu masuta a enya Kaldea anyi akhalele guene.
4 Mu lusugu lua mbadi, gungima dia gushiyiwa gua Gedaliya, hakhalele nga muthu khenji gajiya galego ndaga yene, 5 mala 80 akatugile gu Shikeme nu gu Shilo nu gu Samaliya ha guza. Muevu wawo wakhalele wa gukulula, milele yawo yakhalele ya gutawula, adibatuile jiphuta mu muila, akhalele nu milambu ya mbuto nu uhafu ulaphe ha mago ha gubata mu inzo ya Yehowa. 6 Ishemayele mun’a Netania wazogele gu Mispa haguya guatagana, wakhalele muya nu gudila. Tangua diataganele muene nawo wawambelele egi: “Zenu gudi Gedaliya mun’a Ahikama.” 7 Uvi tangua ahetele mu dimbo, Ishemayele mun’a Netania nu athu enji, a ashiyile a abishidile mu wina dia meya.
8 Uvi mukatshi dia athu ene guakhalele nu mala kumi, awambelele Ishemayele egi: “Utushiyigo handaga tuasuegi mbuto jia ble nu jia orje nu maji nu wigi mu temu.” Hene Ishemayele gaashiyilego hamoshi nu aphangi’awo. 9 Ishemayele wabishidile imbi yagasue ya athu ashiyile muene mu wina diakoma dia meya dinyi fumu Asa walondele mukunda nu fumu Basha wa gu Isalele. Ishemayele mun’a Netania wazalesele wina diene nu imbi ya athu.
10 Ishemayele wakuatele athu agasue anyi asalele gu Mispa, nu ana a fumu a akhetu nu athu agasue abembewe gu Mispa anyi Nebuzaladana fumu wa masuta akhalele mubamba fumu wabembele ha mago a Gedaliya mun’a Ahikama ha gutala. Ishemayele mun’a Netania wakuatele athu ene, ha guya nawo gudi enya Amona.
11 Tangua Yohanana mun’a Kaleya nu mafumu agasue a masuta anyi akhalele n’enji, avuile ndaga jiagasue jiabola jiakalegele Ishemayele mun’a Netania, 12 azudile athu agasue, ayile ha guluisa Ishemayele mun’a Netania, amusangele hehi nu ito yakoma ya mita* ya gu Gibeona.
13 Athu agasue akhalele nu Ishemayele asuangulugile tangua amonele Yohanana mun’a Kaleya nu mafumu agasue a masuta akhalele n’enji. 14 Hene athu agasue anyi Ishemayele wakuatele gu Mispa, abalumugile, avutugile nu Yohanana mun’a Kaleya. 15 Uvi Ishemayele mun’a Netania nu athu 8 akhalele n’enji alengele Yohanana, ayile gudi enya Amona.
16 Yohanana mun’a Kaleya nu mafumu agasue a masuta anyi akhalele n’enji, azudile athu agasue asalele gu Mispa anyi ahulugile ha mago a Ishemayele mun’a Netania tangua diashiyile muene Gedaliya mun’a Ahikama. Akatugile gu Gibeona nu mala nu masuta nu akhetu nu ana nu athu akhalele mutshita mudimo gu inzo ya fumu. 17 Ayile, gungima amaganele gu Kimehame ha fundo dia gukhala mukunda nu athu ana tshita vuayaje hehi nu Beteleheme; akhalele mutshigina guya gu Ejipitu 18 mukunda nu enya Kaldea. Akhalele guavuila woma handaga Ishemayele mun’a Netania washiyile Gedaliya mun’a Ahikama munu fumu wa gu Babilona watombele ha gutuameza gifutshi.