Yelemiya
4 Yehowa wazuela egi: “Gula watshigina guvutuga, Oo Isalele,
gula wavutuga gudi ame,
wakatula gutuama diami isongo yaye ya usala,
ngenyi mbawushigo mulaba guya nu guwungagana.
2 Gula wadiloga
mu giamatshidia, mu luholo luabonga nu luatagana egi: ‘Ngudi guguwambela giamatshidia mu jina dia Yehowa Nzambi wa monyo!’
Ngenyi enya ifutshi yagasue mbaaheta gishimbigo mu njila yenji,
nu mbaadihala mukunda nu muene.”
3 Handaga Yehowa udi muwambela mala a gu Yuda nu a gu Yelusalema egi:
“Dimenu mu mavu a mbuto,
bembenu gukuna mukatshi dia miya.
4 Enue mala a gu Yuda nu enya gu Yelusalema,
dimbenu gu mukanda mukunda nu Yehowa,
phelegetesenu* mitshima yenu,
hagula khabu jiami jilemigo gifua tshuya
mukunda nu gubola guenu,
tshuya tunu nga muthu gajiyilego gujima.”
5 Zuelelenu ndaga yene gu Yuda, ilongesenu gu Yelusalema.
Mbenu milolo, shigenu phungi mu gifutshi giagasue.
Kalulugenu mu dijui diakola egi: “Dibungisenu,
hagula tulenge, tuye mu membo adi nu ibayi yakola.
6 Magenesenu gijiyishilo gidi mumonesa njila idi muya gu Siona.
Kambenu fundo dia gudisuega, mumagana ndo fundo dimoshi,”
handaga ngudi mubata malamba akola adi mukatuga gu khanda ya nord, malamba akola diago.
7 Mushiyi wa ifutshi wazoga;
wazoga gifua muana zoga khoshi moshi’a vunda.
Wakatuga ha fundo dienji ha gubuisa gifutshi gienu gifua gima gidi muhana woma.
Membo enu mbaabuishiwa makhulu, nga muthu mbagakhadigo guene.
8 Hene, sudigenu sagi jia ngombo,
handaga Yehowa yowu genji mulandula gutuvila khabu jiakola.
9 Yehowa wazuela egi: “Mu lusugu luene, fumu mbawuleba muila,*
manene nji mbaaleba muila;*
nganga-nzambi mbajivua woma wavula, baprofete mbaadihula.”
10 Gungima ngazuelele egi: “Mamaa! Yehowa Fumu Wabalega Gukoma, wahuigile diago athu wawa nu Yelusalema tangua wazuelele egi, ‘mbamukhala mu guhuima,’ hoho phogo ya khusa idi ha miminyo yetu.”
11 Mu tangua diene mbaawambela athu wawa nu Yelusalema egi:
“Funji ya mulugulugu wa tshuya mbayikatuga gu tumilundu tua mu mavu a luselenga tushigo nu mitshi,
mbayibunda gudi athu ami;*
mbayishigo muza ha gusuwa mbuto nga ha gujiphelegetesa.
12 Ame ngana tuma funji yakola, yana katuga mu mafundo ene.
Henyaha ngudi guasophesa.
13 Talenu! Muene mbawuza gifua matuta a mvula,
phusu-phusu jienji jidi gifua gikudi.
Phunda jienji jidi nu phushi jiabala gubalega njila jia khuyi.
Lamba dietu, handaga tuakuluga getu!
14 Oo Yelusalema, katulenu gubola gudi mu mitshima yenu hagula muhuluishiwe.
Uu nu tangua ditshi mbamulandula matangi enu abola?
15 Handaga dijui dimoshi didi muzuelela lumene luakatuga gu Dane,
didi muzuelela lamba diakatuga gu milundu ya Efrayime.
16 Ayi zuelenu ndaga yene gudi enya ifutshi;
longesenu ndaga yene gu Yelusalema.”
“Athu ana tala dimbo* akatuga mu gifutshi gia gualeha ha guza,
mbaazuela mu majui akola mu membo a gu Yuda.
17 Athu ene adi muza ha gujieta Yelusalema khanda jiagasue gifua abambi a dihia,
handaga dimbo dia Yelusalema diangulumbugile,” Yehowa wazuela.
18 “Aye mbawufuta mukunda nu makalegelo aye nu ndaga wana tshita.
Lamba diaye didi dilabua,
handaga didi gugungina uu nu mu mutshima!”
19 Oo lamba,* lamba diago!
Ngudi muvua gikenene giakola mu mutshima.
Mutshima udi gungubudiga.
20 Phamba mene jia lamba jidi muzuelewa,
handaga gifutshi gia mudidi giabolesewa.
Tenta jiami jiamuangewa mu gisagumuisa,
milele ya tenta yami yabolesewa mbala imoshi.
21 Uu nu tangua ditshi mbangulandula gumona gijiyishilo,*
nu gulandula guvua matululu a phungi?
22 “Handaga athu ami adi aheya;
angubuita mutshima.
Adi ana aheya, ashigo mukotelesa ndaga.
Gutema guawo gudi phamba ha gutshita ndaga jiabola,
uvi ashigo mujiya luholo lua gutshita ndaga jiabonga.”
23 Tangua ngatalele, ngamonele egi gifutshi giakhalele gia githuhu nu giabuile makhulu.
Ha ngatalele dilu, ngamonele egi kiajiji giakhalelego luko guene.
24 Ngatalele, ngamonele egi milundu yakhalele mudigita,
tumilundu tuakhalele munyigishiwa.
25 Tangua ngatalele, ngamonele egi guakhalelego nga nu muthu mumoshi,
tunjila tuagasue tua gosa tualengele.
26 Tangua ngatalele mavu akhalele nu mitshi ya mabundu, ngamonele abuile gifua mavu a luselenga,
membo enji agasue amuangewe.
Yakalegewe ngenyi mukunda nu Yehowa,
mukunda nu khabu jienji jiakola.
27 Handaga Yehowa wazuela egi: “Gifutshi gia mudidi mbagibua makhulu,
uvi mbangushigo gugishiya giagasue.
28 Handaga athu a mu gifutshi mbaadila,
dilu mbadibuita.
Idi handaga ame ngazuelele, ngazudile desizio,
mbangushigo musombegesa matangi’ami,* ndo mbangushigo guasombegesa nga hazonda.
29 Athu agasue mu dimbo adi mulenga
tangua adi muvua matululu a awendeshi a tubalu nu a athu ana sonona mifula.
Adi gudisuega moshi’a mavunda,
adi mukanduga mu maseso.
Membo agasue abembewa,
nga muthu mumoshi gashigo luko guene.”
30 Henyaha wabolesewa, na itshi uza mutshita?
Wakhalele musudiga mulele wabenga,
nu gudisembega tuzeya tua wolo,
wakhalele mukomesa meso aye nu mukubu wabuita.*
Uvi walabele gaye gudibongesa,
handaga athu akhalele muvua nzala yakola ya gubungisa naye muila agutuna;
henyaha adi mukamba ha gugushiya.
31 Handaga ngavui dijui gifua dia mukhetu udi mukata,
lamba gifua lamba dia mukhetu udi muvuala mun’enji wa thomo,
dijui dia mona mukhetu, yakotelesa egi Siona udi muhuima mu lamba.
Mona mukhetu muene wasununa mago enji udi muzuela egi:
“Lamba diami, ngahuila mukunda nu athu ana shiya athu ako!”