Yelemiya
34 Yehowa watele maga nu Yelemiya tangua Nebukadenezale* fumu wa gu Babilona nu masuta enji agasue nu ma ufumu agasue a ha mavu anyi akhalele mu uhinyinyi wenji nu athu agasue akhalele muluisa Yelusalema nu membo agasue akhalele mu khulo yenji, wamuwambelele egi:
2 “Yehowa Nzambi wa Isalele wazuela egi, ‘nda uwambele Sedesiase fumu wa gu Yuda egi: “Yehowa udi muzuela egi, ‘henyaha ngudi muhana dimbo edi ha mago a fumu wa gu Babilona, muene mbawudikonda tshuya. 3 Aye, mbawushigo muhuluga ha mago enji, handaga mbaagukuata ha gugubata gudi muene. Mbawumona fumu wa gu Babilona nu meso aye, muene mbawuzuela diago nu aye phala nu phala, gungima mbawuya gu Babilona.’ 4 Oo! fumu Sedesiase wa gu Yuda, tegelela mbimbi ya Yehowa. ‘Yehowa udi guguwambela egi: “Mbawushigo mufua gu phogo ya khusa. 5 Mbawufua mu guhuima, mbaagukondela uhafu gifua luholo atshitshile mukunda nu ash’aye anyi adiangele guhinyina gutuama diaye, ene mbaagudila egi: ‘Mama fumu wetu wafua!’ Handaga ‘ame ngazuedi.’ Yehowa wazuela.”’”’”
6 Gungima profete Yelemiya wawambelele fumu Sedesiase wa gu Yuda gu Yelusalema mbimbi jiene jiagasue, 7 tangua masuta a fumu wa gu Babilona akhalele muluisa Yelusalema nu membo agasue a gu Yuda anyi asalele, dimbo dia Lakishe nu dia Azeka. Handaga phamba membo ene akhalele nu ibayi yakola asalele mukatshi dia membo a gu Yuda.
8 Yehowa watele maga nu Yelemiya mu tangua Sedesiase wakhalele wakotshi gale gikotelo nu athu agasue gu Yelusalema ha gubemba ahiga, 9 adivile egi athu agasue adi naye gubemba enya Hebelu anyi adi mu uhiga, mala nu akhetu, hagula nga muthu mumoshi gakuatshigo phangi’enji muenya Yuda mu uhiga. 10 Hene manene agasue nu athu agasue atumagele ndaga yene. Akotele gikotelo egi athu agasue adi naye gubemba ahiga awo a mala nu a akhetu, ashigo naye guakuata mu uhiga. Atumagele ndaga yene, a abembele ha guya. 11 Uvi gungima, avutudile luko ahiga ene a mala nu a akhetu, a ashinjigile gu ngolo ha guvutuga mu uhiga. 12 Hene mbimbi ya Yehowa yajile gudi Yelemiya, Yehowa wamuwambelele egi:
13 “Yehowa Nzambi wa Isalele wazuela egi, ‘ngakotele gikotelo nu akhakh’enu mu lusugu ngaazolele mu gifutshi gia Ejipitu, mu inzo ya uhiga, ngaawambelele egi: 14 “Gungima dia ivo 7, muthu wagasue mukatshi dienu udi naye gubemba phangi’enji muenya Hebelu munu wadigiwe gudi muene mu uhiga, nu wamukalegele mudimo ivo 6; udi naye gumubemba ha guya.” Uvi akhakh’enu anguvidilego. 15 Enue muakatuga gusombegesa gualeha ndo,* muatshitshi ndaga yabonga gu meso ami tangua muazuedi egi mbamukatula aphangi’enu mu uhiga, muakotshi gikotelo gutuama diami mu inzo idi nu jina diami. 16 Uvi henyaha muasombegesa luko, muasegulula jina diami luholo muavutula ahiga enu a mala nu a akhetu anyi muabembele ha guya gifua luholo akhalele mutshigina, muaashinjiga ha guvutuga luko mu uhiga.’
17 “Gishina giene Yehowa wazuela egi: ‘Muangutumagelego luholo muatunyi gubemba aphangi’enu nu akuaku’enu ha gukatuga mu uhiga.’ Yehowa wazuela egi: ‘Hene ame mbangumibemba ha gufua gu phogo ya khusa, nu gu misongo ya gisambugila* nu gu nzala, mbamubua gifua gima gidi mukuatesa ma ufumu agasue a ha mavu woma. 18 Eyi ndaga mbayibuila mala ashiyile gikotelo giami nu atunyile gunemesa mbimbi jia gikotelo adilogele gutuama diami tangua abatuile mutumba wa ngombe mu itshinyi mbadi nu abalegele hakatshi na katshi dia itshinyi yene.* 19 Yakotelesa egi manene a gu Yuda nu a gu Yelusalema, nu athu ana tshita mudimo mu inzo ya fumu, nu nganga-nzambi, nu athu agasue a mu gifutshi anyi abalegele hakatshi na katshi dia itshinyi yene ya mutumba wa ngombe: 20 Mbanguahana ha mago a mbalagaji jiawo nu ha mago a athu adi mukamba guashiya, imbi yawo mbayibua ima ya gudia mukunda nu tunjila tua gosa nu mukunda nu shitu jiabala jia ha mavu. 21 Mbanguhana fumu Sedesiase wa gu Yuda nu manene enji ha mago a mbalagaji jiawo nu ha mago a athu adi mukamba guashiya nu ha mago a masuta a fumu wa gu Babilona, anyi adi mubemba dimbo ha guvutuga gawo.’
22 Yehowa wazuela egi: “‘Henyaha ngudi guawambela ha guvutuga luko mu dimbo, ene mbaadiluisa, mbaaditambula nu mbaadikonda tshuya; mbaatshita nji ngenyi mu membo agasue a gu Yuda anyi ngabuishile gifua mavu a luselenga, nu ashigo nga nu muthu guene.’”