Yelemiya
31 Yehowa wazuela egi: “Mu tangua diene, mbangubua Nzambi wa fami jiagasue jia Isalele, ene mbaabua athu ami.”
2 Yehowa wazuela egi:
“Tangua Isalele wakhalele muya ha fundo dienji dia guhululuga,
athu anyi ahulugile gu phogo ya khusa, ahetele gikhesa mu mavu a luselenga.”
3 Yehowa wamonegele gudi ame, ngatshima wakhalele gualeha, wazuelele egi:
“Ngaguzumbile, mbangulandula guguzumba mayilago.
Gishina giene ngagunanele gudi ame nu guzumba gua giamatshidia.*
4 Mbangugutunga luko, aye mbawutungiwa luko.
Oo gandongo ga gu Isalele, mbawuzula luko tungoma tuaye tuazonda,
mbawuya nu gukina nu gusuanguluga guagasue.*
5 Mbamudima ilanga ya vinyo gu milundu ya gu Samaliya;
athu nji mbaakuna mitshi, mbaadia mabundu ayo.
6 Handaga gudi nu lusugu mutaledi mbawukaluluga gu milundu ya gu Efrayime egi:
‘Zugenu, tuyenu gu Siona, gudi Yehowa Nzambi wetu.’”
7 Handaga Yehowa wazuela egi:
“Mbenu milolo ya gusuanguluga mukunda nu Yakoba.
Kalulugenu nu gusuanguluga handaga mudi holu dia ifutshi.
Longesenu ndaga yene; tumbuisenu Nzambi, zuelenu egi,
‘Oo Yehowa, huluisa athu aye, enya Isalele anyi asalele nu monyo.’
8 Mbanguakatula mu gifutshi gia gu khanda ya nord ha guavutula.
Mbanguakatula mu mafundo a gualeha a ha mavu, mbanguabungisa hamoshi.
Mukatshi diawo mbagukhala nu gifofo nu gikata,
nu mukhetu udi gu vumo nu mukhetu udi mutshigina guvuala, mbanguabungisa khungi’awo agasue.
Mbaavutuga haha, mbakhala athu avula diago.
9 Ene mbaaza nu gudila.
Mbanguatuameza tangua mbaangububila ha guavila khenda.
Mbanguatuameza mu mafundo adi nu meya,*
mu njila yabonga inyi ajiyilego gukhakhuga.
Handaga ame ngudi tata mukunda nu Isalele, Efrayime udi mun’ami wa somi.
10 Enue ifutshi, tegelelenu mbimbi ya Yehowa,
ilongesenu mu mahongo a gualeha:
“Muthu wamuangele enya Isalele, mbawaabungisa luko.
Muene mbawaabamba gifua muana tshita mubambi wa imeme.
11 Handaga Yehowa mbawusumba luko Yakoba,
mbawumuhuluisa* ha mago a muthu udi nu ngolo jiavula gumubalega.
12 Ene mbaaza, mbaamba milolo ya gusuanguluga gu mulundu wa Siona,
mbaasuanguluga muavula mukunda nu ima yabonga mbayaahana Yehowa,*
mukunda nu mbuto, nu matombe ahe-ahe nu maji,
nu mitumba ya shitu jiawo nu ngombe.
Ene mbaabua gifua gilanga gidi mumiangewa meya muabonga,
mbaashigo luko mumona lamba nga hazonda.”
13 “Mu tangua diene gandongo mbagakina nu gusuanguluga,
hamoshi nu mavuala a mala nu makota a mala.
Mbangusombegesa gudila guawo, mbagubua gusuanguluga.
Mbanguahana gikhesa nu gusuanguluga ha fundo dia gikenene.
14 Mbanguhana nganga-nzambi ima yavula ya gudia,
mbanguhana athu ami ima yavula yabonga, Yehowa wazuela.
15 Yehowa wazuela egi:
‘Isenzele nu matululu akola a gudila, adi muvuiwa gu Rama:
Idi Rashele udi mudila an’enji a mala.*
Gashigo mutshigina egi athu amuwalagane,
handaga an’enji a mala afua.’”
16 Yehowa wazuela egi:
“‘Bemba gudila, kukumuna masoji,
handaga mbawuheta lufuto mukunda nu mudimo waye,’ Yehowa wazuela.
‘Ene mbaakatuga mu gifutshi gia mbalagaji, mbaavutuga.’
17 ‘Felela didi guene mukunda nu enue,’ Yehowa wazuela.
‘An’enu mbaavutuga mu mavu awo.’”
18 “Ngavile Efrayime mudila egi:
‘Wanguhanele ndola, ngazudile malongo,
gifua mutumba wa ngombe ya mulume unu walongesewego.
Nguvutule, ngudi hehi ha guvutuga,
handaga aye udi Yehowa Nzambi wami.
19 Gungima dia gusombegesa, ngadibelele muavula;
tangua ngakotelesele ndaga ngatshitshile, ngavile gikenene giavula diago.*
Ngavuishiwe musonyi, ngaseguluishiwe
mukunda nu gubola ngatshitshile mu ulenge wami.’”
20 “Efrayime udi diago nu ndando yavula, udi mona ngana zumba muavula.
Ngana wunguluga ndaga jienji tangua diagasue ngana gumubalela.
Gishina giene ngudi muvua diago lamba mu mutshima.
Mbangumuvuila khenda,” Yehowa wazuela.
21 “Hagenu ijiyishilo mu njila yenu,
hagenu makunji a maseso gifua ijiyishilo mudi naye gulandula.
Landulenu muabonga njila yakoma mudi naye guyila.
Oo gandongo ga gu Isalele, vutuga, vutuga mu membo aye.
22 Oo aye mona mukhetu walumbuga, uu nu tangua ditshi mbawukhala tunga-tunga?
Handaga Yehowa wafuga gima gihe-gihe ha mavu:
Mukhetu mbawuya nu gukamba yala.”
23 Yehowa Nzambi wa masuta, Nzambi wa Isalele wazuela egi: “Tangua mbanguvutula athu ayile mu uhiga mu mavu awo, athu mbaazuela gu Yuda nu mu membo enji egi: ‘Oo aye fundo diabonga dia gukhala, aye mulundu wa gijila, Yehowa agushimbige.’ 24 Adimi a mahia nu abambi a imeme mbajinga hamoshi gu Yuda nu mu membo enji agasue. 25 Handaga mbanguhana ngolo gudi athu adi aguhuila, mbangutagenesa nzala jia athu adi aguleba.”
26 Gungima ngaphaphumugile, ngakanguile meso. Ngabandele tulo tuabonga diago.
27 Yehowa wazuela egi: “Talenu! Mu masugu adi muza, mbanguvudisa enya gu Isalele nu enya gu Yuda, mbanguvudisa nji shitu jiawo jia hembo.”
28 Yehowa wazuela egi: “Thomo ngaatalele ha guvuza, ha gubuisa, ha gushiya, ha gumuanga nu ha gusagesa. Uvi henyaha mbanguatala ha gutunga nu ha gukuna.” 29 “Mu masugu ene, athu mbazuedigo luko egi: ‘Atata adile mabundu a vinyo a gibisu, hene an’awo ana vua mazo lege-lege.’* 30 Uvi mu tangua diene, muthu wagasue mbawufua mukunda nu gubola guenji. Muthu wagasue mbawudia mabundu a vinyo a gibisu, muene hakhenji mbawuvua mazo lege-lege.”
31 Yehowa wazuela luko egi: “Talenu! Mu masugu adi muza, mbangukota gikotelo gihe-gihe nu enya Isalele nu enya Yuda. 32 Gikotelo giene mbagishigo mukhala gifua ginyi ngakotele nu akhakh’awo lusugu ngaakuatele gu koko ha guazola gu Ejipitu, ‘handaga ene ashiyile gikotelo giami ngatshima ame ngakhalele diago fumi’awo.’* Yehowa wazuela.”
33 “Gikotelo mbangukota nu enya Isalele gungima dia masugu giene egi: Mbangumba mukhuala wami mukatshi diawo, mbanguwusonega mu mitshima yawo. Ame mbangubua Nzambi wawo, ene mbaabua athu ami.” Yehowa wazuela.
34 “Gushigo nga nu muthu mungoshi mbawulongesa muthu atunga n’enji nga phangi’enji egi: ‘Jiya Yehowa!’ Handaga mukut’awo agasue mbaangujiya sendese gudi athu a githuhu uu nu gudi enya lukuma. Handaga mbangutotesa gubola guawo, mbangushigo luko muwunguluga gubola guene.” Yehowa wazuela.
35 Yehowa yago wahagele kumbi ha guzola muanya mu lusugu,
nu wahanele ngonda nu themua mukhuala ha guzola kiajiji mu phipha;
munu wana nyigisa kianga nu wana tuma matshipha-tshipha enji ha gusha matululu,
jina dienji Yehowa Nzambi wa masuta;
muene wazuela egi:
36 “‘Ajigulu a Isalele mbaalandula gukhala gifutshi gutuama diami,
gifua luholo mikhuala eyi mbayilandula gukhala guene.’ Yehowa wazuela.”
37 Yehowa wazuela luko egi : “‘Gula gudi nu muthu wajiya guthesa dilu, nu gutala fondasio jiagasue jia mavu, ngenyi ngajiya giwa gutuna ajigulu agasue a Isalele mukunda nu ndaga jiagasue akalagala.’ Yehowa wazuela.”
38 Yehowa wazuela egi: “Tala! Mu masugu adi muza, dimbo mbaditungiwa mukunda nu Yehowa sendese gu inzo yaleha ya Hananele uu nu gu Mufulo wa Khomo. 39 Shinga ya guthesela mbayiya tananaa uu nu gu gamulundu ga Galebe, gungima mbayikondomoga gu khanda ya Goa. 40 Baba diagasue dia imbi, nu dia uto,* nu mahia agasue uu nu gu baba dia Kidelona, nu gu khomo ya Mufulo wa Tubalu gu khanda ya mazogelo a kumbi, mbaabua gima gia gijila mukunda nu Yehowa. Mbaashigo muvujiwa luko nga gumuangewa.”