Yelemiya
14 Mbimbi Yehowa wawambelele Yelemiya mukunda nu gikalala jiene eji:
2 Enya gu Yuda adi mudila, mifulo ya membo awo yabolele.
Idi ya gubua mu mavu ya guleba,
matululu a gudila adi muvuiwa gu Yelusalema.
3 Mafumu awo atuma enya mudimo wawo ha guya mukamba meya.
Enya mudimo ene aya mu mawina a meya, uvi nu gusanga ndo meya.
Avutuga nu mabungu a githuhu.
Avua musonyi, aleba nji muila,
atshuiga mito yawo.
4 Adimi a mahia adi nu gikenene giakola, atshuiga mito yawo,
handaga mavu abua mianji-mianji
luholo mvula ishigo munoga mu gifutshi.
5 Nu gene gabaji gadi mu temu, gabemba mun’enji wakatuga guvualewa
handaga muangu ushigo guene.
6 Phunda jia mu foto jiamagana holu dia tumilundu tushigo nu mitshi.
Jidi munana muhehe gifua makombe;
meso ajio ahola handaga jishigo muheta muangu.
7 Oo Yehowa tshita ndaga mukunda nu jina diaye,
ngatshima gubola guetu gudi gutufuisa milonga.
Handaga ndaga jiabola tuatshitshile jidi jiavula,
tuagukalegele gubola.
8 Oo aye felela dia Isalele, aye muthu wana gumuhuluisa mu tangua dia lamba,
mukunda natshi udi gifua ngenji mu gifutshi?
Mukunda natshi udi gifua muthu wana tshita vuayaje udi mumagana phamba mukunda nu gubanda?
9 Mukunda natshi wabua gifua muthu gihuga-huga giamukuata?
Gifua muenya ngolo gajiyilego guhuluisa athu enji?
Oo Yehowa, aye udi mukatshi dietu,
tuatamegewe mu jina diaye,
utubembigo.
10 Ndaga Yehowa wazuela mukunda nu athu awa yen’eyi: “Ene ana zumba guya nu guwungagana, ashigo mukanda malu awo; gishina giene Yehowa gashigo musuanguluga nawo. Henyaha muene mbawuwunguluga gubola guawo, mbawaahana ndola mukunda nu gubola guene.”
11 Yehowa wanguwambelele egi: “Ukombelelago mukunda nu gubonga gua athu awa. 12 Tangua adi mutuna gudia ha gungukombelela ngushigo mutegelela gububa guawo, tangua adi muhana milambu yawo yagasue ya guwotshia nu milambu ya mbuto, ngushigo musuanguluga nayo, mbanguashiya nu phogo ya khusa nu nzala nu misongo.”*
13 Ngazuelele egi: “Oo Yehowa Fumu Wabalega Gukoma! Gugu baprofete adi guawambela egi ‘mbamushigo mumona phogo ya khusa, nzala nji mbayishigo gumisagesa, uvi mbangumihana guhuima gua giamatshidia ha fundo edi.’”
14 Gungima Yehowa wanguwambelele egi: “Baprofete adi muzuela profesi jia mambo mu jina diami. Ngaatuminego, ngaawambelelego nga gima, ngatelego nawo maga. Ndaga adi gumiwambela jidi vizio jia mambo, ndaga jia mambo jiatadila masugu adi muza, adi matangi awo hakhawo.* 15 Mukunda nu baprofete adi muzuela mu jina diami, ngatshima ame ngaatumilego nu adi muzuela egi phogo ya khusa nu nzala mbayishigo musagesa gifutshi, ame Yehowa ngudi muzuela egi: ‘Baprofete ene mbaafua gu phogo ya khusa nu nzala. 16 Athu adi ene muwambela ndaga yene, mbaafua mu mabala-bala a gu Yelusalema mukunda nu nzala nu phogo ya khusa; mbagukhadigo nga nu muthu wa guafunda, nu ene nu akaji’awo nu an’awo a mala nu an’awo a akhetu. Handaga mbanguabatela malamba adi atagana mukunda nu ene.
17 “Udi naye guawambela mbimbi eji:
‘Meso ami azole masoji avula phipha nu muanya ene abatuga ndo,
handaga mona mukhetu wa gandongo wa akuaku’ami watshiongononewe, waboguewe,
phuta yenji idi yakoma diago.
18 Gula ngaya mutala mu temu,
ngudi mumona athu a shiyiwa gu phogo ya khusa!
Uvi gula ngangina mu dimbo,
ngudi mumona athu adi mulehumuga gu nzala!
Handaga baprofete nu nganga-nzambi adi mulaba guwenda mu gifutshi ashigo mujiya.’”
19 Aye watunyile diago Yuda ba? Walushile Siona ba?
Mukunda natshi watuwasa hagula tukhadigo luko nu luholo lua gusagewa!
Tuakhalele gudifelela guhuima, uvi tuamonelego nga gima giabonga,
tuakhalele gudifelela ha gusagewa, uvi henyaha tudi muvua woma wakola!
20 Oo Yehowa, esue mujiya gubola guetu
nu gubola gua akhakh’etu,
handaga tuagutshitshile gubola.
21 Ututunyigo mukunda nu jina diaye;
usegululago nguasa yaye ya ufumu ya lutumbu.
Wunguluga gikotelo giaye nu esue, ugishiyigo.
22 Isongo ya githuhu ya enya ifutshi yajiya gunogesa mvula ba?
Nga ndo, dilu diajiya gunogesa mvula diene hakhenji ba?
Phamba aye wajiya guyitshita, Oo Yehowa Nzambi wetu.
Tuana gudifelela gudi aye,
handaga aye wafugile ima yene yagasue.