Mukanda wa Mbadi wa Gudilanduluila

27 Yotama wakhalele nu ivo 25 habuile muene fumu, wahinyine ivo 16 gu Yelusalema. Jina dia gin’enji diakhalele Yelusha mun’a Zadoke. 2 Yotama wakhalele mukalagala ndaga jiabonga gu meso a Yehowa gifua sh’enji Oziase, muene ganginyinego mu tempelo ya Yehowa ha fundo mukhuala wakhalele mutunyisa. Uvi athu alanduile gawo gutshita ndaga jiabola. 3 Yotama walondele mufulo wa gu thunda wa inzo ya Yehowa, watshitshile midimo yavula ya gutunga gu gibayi gia Ofele. 4 Watungile membo gu khanda ya milundu ya Yuda, nu mafundo akhalele nu ibayi yakola, nu jinzo jialeha mu mafundo akhalele nu ishitu. 5 Waluile ita nu fumu wa enya Amona, gungima waabingile. Gishina giene mu givo giene, enya Amona amuhanele batalanta* 100 a utadi wa siliva, nu bakore* 10 000 a ble, nu bakore 10 000 a orje. Enya Amona amuhanele nji ima yene mu givo gia mbadi nu mu givo gia thathu. 6 Yotama wakhalele mubua nu ngolo jiavula, handaga watshitshile yagasue ha gutumagela Yehowa Nzambi wenji.

7 Ndaga jiko jiakalegele Yotama nu ita yagasue yaluile muene, nu makalegelo enji, jidi jia gusonega mu Mukanda wa Mafumu a gu Isalele nu a gu Yuda. 8 Wakhalele nu ivo 25 habuile muene fumu, wahinyine ivo 16 gu Yelusalema. 9 Gungima Yotama wafuile gifua muafile akhakh’enji, amufundjile mu Dimbo dia Davidi. Mun’enji Ahaza wabuile fumu ha fundo dienji.