Dise Jeschicht wiest, waut jiedrem eenen von Jehowa siene Deena passieren kaun. Irjenteena kaun eene groote Sind begonen un lota denkjen: “Daut wia aules soo haustich; ekj kjeem to nuscht reed.” Oba wan dee doa lota äwa nodenkjt, woat hee veleicht en, daut hee ea aul miere schlajchte Entscheidungen jemoakt haud, waut am bat doa brochten. Doa kaun met en sennen, daut dee schlajchte Frind ooda schlajchten Tietvedrief haud ooda daut dee opp Städen wia, wua dee nich hanjehieed, ooda sikj met schlajchte Websieden aufjeef. Veleicht haft dee uk oppjehieet to bäden, de Bibel to läsen, bie de Toopkomes to sennen ooda em Deenst mettomoaken. Soo aus de junga Maun en Spricha haft dee veleicht ea aul schlajchte Entscheidungen jemoakt, waut am bat de Sind brochten. Waut kjenn wie von dit lieren? Wie sellen nich bloos eene groote Sind utem Stich gonen, oba uk daut, waut ons bat doa brinjt. Salomo muak dise Sach sea kloa (Mat. 5:​29-30). w24.07 16 V. 10-11

Waut es “dit Wieetvolle”? Daut Prädichtwoakj von daut Kjennichrikj, waut Läwes rat (2. Kor. 4:1). Waut bedieden de ieedne Jefässa? Dee stalen Gott siene Deena väa, waut aundre de goode Norecht prädjen. En Paulus siene Tiet brukten de Schachaschmana ieedne Krucken toom wieetvolle Sachen opp un dol fieren, soo aus Äten, Wien un Jelt. Krakjt soo haft Jehowa ons de wieetvolle Norecht von daut Kjennichrikj aunvetrut. Met Jehowa siene Help hab wie de Krauft, wieda de goode Norecht to prädjen. Veleicht hab wie eenjemol Menschenforcht. Waut kaun ons halpen, doamet foadich to woaren? See wie mol, om waut de Apostel bäden deeden, aus äant daut aufjesajcht wort to prädjen. Enne Städ sikj enenjsten to loten, bäden see Jehowa doarom, daut see wieda sea driest räden kunnen. Jehowa beauntwuad dee äa Jebäd fuaz (Apj. 4:​18, 29, 31). Wan du eenjemol Menschenforcht hast, dan froag Jehowa doano, daut diene Leew fa de Menschen stoakja sennen kaun aus diene Angst fa dee. w24.04 16 V. 8-9

Onse Leew fa Jehowa brinjt ons bat doa, sienen Nomen heilich to hoolen. Wie wellen ons Poat doatoo doonen, daut dän sien Nomen kaun von aule Läajes reinjemoakt woaren, waut de Soton opp dän jebrocht haft (1. Mo. 3:​1-5; Hiob 2:4; Joh. 8:44). Wan wie em Deenst sent, well wie jieren fa Gott sienen Nomen enstonen un deejanje de Woarheit von Gott vetalen, waut doano horchen wellen. Wie wellen aulem sajen, daut de Leew Jehowa siene jratste Ieejenschoft es, daut hee de basta Harscha es un daut sien Kjennichrikj boolt woat met aulet Lieden een Enj moaken un doano seenen, daut aule Menschen Fräd haben un schaftich sent (Psa. 37:​10-11, 29; 1. Joh. 4:8). Wan wie de Menschen aul dit von Jehowa sajen, dan hool wie sienen Nomen heilich. Wie sent uk schaftich, wiels wie doaderch daut nokomen, waut wie aus Jehowa siene Zeijen doonen sellen. w24.05 18 V. 12