PREGUNTA DI LEKTOR

Ki ta e dos paktonan ku Pablo tabata papia di dje na Galationan 4:24?

Despues ku Apòstel Pablo a papia tokante e konekshon entre Ábraham ku Sara i Ábraham ku Hágar, el a bisa: “E susesonan ei tin un nifikashon simbóliko, pasobra kada un di e muhénan ei ta representá un pakto entre Dios i hende.” (Gal. 4:​22-24) Nos tabata pensa ku e dos paktonan ei ku Pablo tabata papia di dje a referí na e pakto di Lei i na e pakto nobo. Pero despues di a analisá loke Pablo a bisa mas aleu, nos a mira ku nos mester hasi un ahuste na nos komprondementu. Ta parse ku e no tabata papiando di e pakto nobo, sino di e pakto ku Dios a sera ku Ábraham. Ban wak dikon.a

Pablo a bisa ku e pakto di Lei ku Yehova a sera ku e pueblo di Israel na seru Sinaí na aña 1513 P.K., a representá e kriá Hágar. (Éks. 19:​5, 6; Gal. 4:25) Komo hende imperfekto, e israelitanan no por a kumpli ku e Lei ei perfektamente. I esei lo a kòrda nan ku nan tabata esklabo di piká. E pakto di Lei lo a yuda nan identifiká e Mesías, pasobra ta e so lo por a kumpli ku e Lei ei perfektamente. Anto ora e Mesías a duna su bida perfekto komo sakrifisio, esei a hasi posibel ku hende imperfekto lo por a ser librá di piká i morto. (Gal. 3:​19, 24, 25) Despues ku Hesus a kumpli ku e propósito ei di Dios, hende no tabatin mester di kumpli ku Lei mas.—Rom. 10:4.

Pablo a bisa ku, kontrali na Hágar, Sara, kende tabata un “muhé liber,” a haña un yu “danki na un promesa di Dios.” (Gal. 4:23) E promesa ei tabata e pakto ku Dios a sera ku Ábraham. (Gal. 3:29; 4:​28, 30) Na Génesis 22:18 Yehova a duna detaye di e pakto akí. El a bisa Ábraham: “Pa medio di bo desendiente tur nashon riba tera lo ser bendishoná pasobra bo a obedesé mi bos.”

E pakto ku Yehova a sera ku Ábraham a duna mas informashon tokante e promesa ku Yehova a hasi den hòfi di Éden. (Gén. 3:15) E pakto ei a revelá ku e “desendiente” primintí lo a bini for di Ábraham. Pablo a splika ku Hesus tabata e parti prinsipal di e “desendiente” ei. Anto e 144.000 personanan ungí ku lo goberná huntu ku Hesus den su Reino tambe ta forma parti di e “desendiente” ei. (Gal. 3:​16, 29; Rev. 14:​1-3) Den futuro, ora ku e promesa ku Yehova a hasi na Ábraham kumpli, tur hende ku a aseptá i obedesé Hesus lo risibí hopi bendishon.

Pero dikon Pablo a papia tokante e kosnan akí? E kier a mustra ku si e hudiunan a keda insistí ku nan mester a sigui e Lei, nan lo tabata esklabo meskos ku Hágar. Pero si nan lo a aseptá Hesus, e parti prinsipal di e “desendiente” di Ábraham, nan lo a bira liber meskos ku Sara. Sí, nan lo a bira liber di piká i morto. (Huan 8:​32-34) Si nan lo no a aseptá Hesus, esei lo a nifiká ku nan no a komprondé e propósito di e pakto di Lei, ku tabata pa hiba nan na Kristu.

Hopi di e rumannan na Galasia na kendenan Pablo a skirbi su karta, no tabata hudiu ni nunka no tabata bou di Lei. Pero algun hudiu ku a bira kristian tabata insistí pa e rumannan no hudiu kumpli ku e Lei, inkluso sirkunsishon. Pablo a splika ku lo no tabatin sentido pa e rumannan no hudiu bira esklabo di e Lei pasobra ya nan tabatin “libertat” pa medio di Kristu.—Gal. 5:​1, 10-14.