Kon pa Keda ku un Bon Amistat ku Nos Rumannan

1. Unda nos por haña bon amigu?

BO TA kòrda letra di e kantika “Un Amigu Fiel”? Na komienso e ta bisa: “Bida por ta yen di difikultat, sin un amigu fiel. Yehova sa ku nos mester di sera bon amistat.” Kiko bo ta pensa di e palabranan ei? Sin duda bo ta kontentu ku bo por haña bon amigu den Yehova su pueblo. (Sal. 119:63) Sí, ta un privilegio pa forma parti di un famia di hende ku ta sirbi Yehova i ku ta stima otro.

2. Kon nos amistat ku nos rumannan mester ta?

² Nos no mester tin un amistat superfisial ku nos rumannan. Mas bien, nos ke ta fiel na nan i será ku nan. Nos tur ta stima Yehova i Hesus i esei ta loke ta uni nos. (Huan 13:35) Pero nos tin ku hasi esfuerso pa nos por tin un amistat será ku nos rumannan. Dikon? Pasobra debí ku nos ta imperfekto, tin biaha problema por presentá ku por pone nos hala for di otro.

3. Dikon no semper ta fásil pa keda ku un bon amistat ku nos rumannan?

³ Pa nos ta sinsero, ta fásil pa nos tin amistat ku rumannan ku ta gusta e mesun kosnan ku nos òf ku tin mesun karakter ku nos. Pero esei no ta mesun fásil ku tur ruman. Dikon? Pasobra tin biaha nos por haña nos ku desakuerdo ku por pone ku nos ta hala pia for di otro. Òf kisas debí ku nos karakter ta diferente, nos por pensa ku nos no por bai bon ku otro. Anto tin biaha debí ku un ruman tin un malesa grave òf doló emoshonal, nos por haña ku ta difísil pa keda ku un amistat kuné. Den e artíkulo akí nos lo wak kiko lo yuda nos sigui ta amigu ku nos rumannan. Promé, nos lo wak algun kualidat ku nos mester tin. Anto despues nos lo wak kon nos por imitá ehèmpel di Hesus den vários situashon.

KUALIDATNAN KU LO YUDA NOS KEDA AMIGU KU NOS RUMANNAN

4. Kon nos por fortalesé nos amistat ku nos rumannan?

⁴ Pa fortalesé nos amistat ku nos rumannan, nos mester hasi esfuerso pa mira nan bon kualidatnan. I pa logra esei nos tin ku pasa tempu ku nan. Apòstel Pablo a bisa e rumannan na Tesalónika: “Nos tabatin asina tantu gana di mira boso en persona ku nos a hasi tur loke nos tabata por pa logra esei.” (1 Tes. 2:17) Hopi hende ta haña ku ora nan kòmbersá ku nan amigunan en persona, nan amistat ta bira mas fuerte. Nos tin vários oportunidat pa hasi esei ora nos ta den sirbishi, na reunion, asamblea i kongreso. Pero djis pasobra nos ta huntu ku nos rumannan no ta kita ku situashonnan por presentá ku por afektá nos amistat.

5. Kiko por yuda nos ora un situashon presentá ku por afektá nos amistat ku nos rumannan? Ilustrá esaki. (Kolosensenan 3:12)

⁵ Ora un situashon presentá ku por afektá nos amistat ku nos rumannan, kualidatnan manera humildat, pasenshi, bondat i kompashon por yuda nos. (Lesa Kolosensenan 3:12.) Meskos ku zeta ta pone ku tur kos den un motor ta sigui traha bon, asina e kualidatnan ei ta yuda nos sigui bai bon ku nos rumannan. Awor ban wak tres situashon ku por afektá nos amistat ku otro. Nos lo wak kon nos por imitá e humildat, pasenshi, bondat i kompashon di Hesus pa asina nos sigui ta bon amigu di nos rumannan.

DIFERENSIA DI OPINION

6. Kon diferensia di opinion por afektá un amistat?

⁶ Dikon esei ta un reto? Mayoria di biaha, ora dos hende tin diferensia di opinion, kada un ta pensa ku ta nan tin rason. Suponé ku dos ruman hòmber tin diferente opinion tokante kon pa organisá e salida pa nan grupo di sirbishi. Kada un tin sigur ku su manera ta esun mihó. Kiko por pasa si nan sigui para riba nan punto? Fásilmente e situashon chikitu akí por eskalá bira algu grandi i afektá nan amistat ku otro. Orguyo por pone ku nan no ta papia pa resolvé e situashon i por bin tenshon den e amistat. Segun tempu ta pasa, tin chèns ku nan ta kuminsá alehá for di otro te na e punto ku nan no ta amigu di otro mas. Tur esei djis pa un kos chikitu.

7. Kiko Hesus a hasi pa siña su disipelnan ku nan mester tabata humilde pa resolvé desakuerdo?

⁷ Hesus su ehèmpel di humildat. Hesus a siña su disipelnan ku nan mester tabata humilde pa nan por a resolvé desakuerdo. Pa un tempu kaba, e disipelnan tabata pleita tokante ken tabata esun di mas importante entre nan. Pa yuda nan kambia nan aktitut, Hesus a splika nan ku nan mester a mira otro hende superior na nan. (Mat. 20:​25-28) Sí, Hesus tabata siñando nan ku nan mester tabata humilde. I e mes a pone un ehèmpel den esei pa nan. Riba e anochi promé ku el a muri, el a laba nan pia. Esei tabata un trabou ku normalmente un kriá tabata hasi. (Huan 13:​3-5, 12-16) Hasiendo esei, Hesus a mustra nan kon nan por a keda bon amigu ku otro. Si nan a siña mira otro komo superior na nan, lo tabata mas fásil pa nan aseptá opinion di otro na lugá di keda para riba nan mes opinion ora desakuerdo presentá. Asina nan lo a evitá ku nan amistat lo a kibra.

8. Kon humildat por yuda bo keda bon amigu ku bo rumannan ora tin diferensia di opinion? (Kolosensenan 3:13) (Wak e plachi.)

⁸ Kon pa keda bon amigu di otro. Ora bo ta humilde, ta mas fásil pa bo laga un diferensia di opinion chikitu pasa i pa ta kla pa pordoná. (Lesa Kolosensenan 3:13.) Tambe lo e yuda bo pa no reakshoná riba tur kos i pa keda bon amigu di otro. (Sal. 4:4) Asta si e ruman a bisa algu ku a hùrt bo, kòrda ku nos tur sa bisa kos ku ta duel nos despues. (Ekl. 7:​21, 22) Puntra bo mes: ‘Ki ta mas importante, pa mi mustra ku mi tin rason òf pa nos keda bon amigu di otro?’ Kisas bo por djis aseptá e otro hende su opinion, i no keda pensa riba e asuntu òf bolbe tres’é bèk riba mesa. Esei lo yuda bo sinti trankil tokante loke a pasa.

9. Kon humildat lo yuda bo si te ainda bo no a logra resolvé un desakuerdo? (Proverbionan 17:9)

⁹ Awor kiko si ainda bo no a logra resolvé e desakuerdo? Sigui mustra humildat. No bai diskutí pa mustra ku bo tin rason. (Lesa Proverbionan 17:9; 1 Kor. 6:7) Bo meta mester ta pa keda amigu di otro. Hopi a logra esei ora nan a aserká e ruman i papia amabel kuné pa drecha e asuntu. (Sal. 34:14) Bo por bisa: “Nos ta amigu pa basta tempu kaba. Nos por papia un ratu tokante loke a pasa?” Sea humilde pa atmití ku bo tambe a hasi fout. Anto bis’é ku bo sa ku bo a hùrt e i pidié despensa. I si e pidi bo despensa, sea humilde i pordon’é. (Lúk. 17:​3, 4) Keda kòrda ku bo meta no ta pa proba ken tabatin rason òf nò, pero pa drecha e asuntu i keda amigu di otro.—Pro. 18:24.

DIFERENSIA DEN KARAKTER

10. Kiko por pone ku ta difísil pa nos keda amigu ku un ruman?

¹⁰ Dikon esei ta un reto? Kisas nos ta haña difísil pa sera ku un ruman i keda amigu kuné si su karakter ta diferente for di esun di nos. Kisas tin sierto kos di su karakter ku ta iritá nos. Òf kisas bo ta haña e manera ku e ta komportá su mes un poko straño. Podisé e ta asina debí na e manera ku el a lanta òf debí na mal eksperensianan di pasado. Òf debí na su kultura e ta mas reservá òf e ta yùist gusta papia. Òf kisas e ta kompletamente diferente for di bo pasobra un di boso ta gusta ta den hende i e otro nò.

11. Kiko a yuda Hesus keda ku amistat ku hende ku tabatin karakter diferente for di dje?

¹¹ Hesus su ehèmpel di pasenshi. Hesus tabatin amistat ku hende ku tabatin karakter diferente for di dje. Por ehèmpel, Apòstel Santiago i Apòstel Huan tabata ke pa hende mira nan komo hende importante. P’esei, nan a pidi Hesus pa nan sinta na su man drechi i na su man robes den e Reino. (Mar. 10:​35-37) Kontrali na nan, Hesus sí tabata humilde. El a entregá su puesto i tur privilegio ku e tabatin den shelu pa e bini na tera. (Flp. 2:​5-8) Wak kon diferente nan aktitutnan tabata! Pero tòg Hesus tabatin pasenshi ku Santiago i Huan i ku otro hende.

12. Kiko a yuda Hesus tene pasenshi ku su amigunan?

¹² Hesus tabata realístiko den loke el a ferwagt di su amigunan. E tabata sa ku hopi di su disipelnan, inkluso Santiago i Huan, tabata enfoká hopi riba posishon. (Mar. 9:34) Hesus a lanta den e mesun kultura ku nan. Den e tempu ei, e lidernan religioso tabata duna masha importansia na posishon i prominensia. Pues, Hesus por a komprondé dikon su disipelnan tabata pensa asina. P’esei, e tabatin pasenshi ku nan. E tabata sa ku ta pa años nan tabatin e manera di pensa ei i e no a ferwagt ku ta mesora nan lo a kambia.—Mar. 10:​42-45.

13. Kon pasenshi por yuda nos keda amigu ku nos rumannan? (Efesionan 4:2)

¹³ Kon pa keda bon amigu di otro. Sigui tene pasenshi ku bo rumannan ora nan tin sierto kosnan ta hasi ku ta iritá bo. (Pro. 14:29) Nos tur tin nos kosnan ku ta hasi nos úniko i diferente. Anto no nesesariamente e kosnan ei ta malu; nan ta djis hasi nos e persona ku nos ta. P’esei nos ta keda kontentu ora hende ta aseptá e partinan ei di nos. (Lesa Efesionan 4:2.) Nos tambe di nos banda mester ta realístiko i laga nos rumannan ta nan mes. Por ehèmpel, si un ruman ta tímido, kòrda kuantu esfuerso e ta hasi pa pasa tempu ku otro hende i papia ku nan. Òf si un ruman ta gusta papia hopi i ta yen di zjeitu, hasi esfuerso pa no pèrdè pasenshi kuné. Ta lógiko ku nos lo no por ta será será ku tur ruman. Pero nos tin ku kòrda ku asta ora nos karakter ta diferente for di otro, tòg nos por traha bon huntu sirbiendo Yehova.

14. Si nos tin pasenshi, riba kiko nos lo enfoká?

¹⁴ Ora nos tin pasenshi, esei por yuda nos enfoká riba e bon kualidatnan di nos rumannan. Ora nos hasi esei, nos no ta laga diferensia di karakter stroba nos di bira amigu. Pensa bèk riba e ehèmpel di Santiago i Huan. Bèrdat nan tabata ke pa otro hende mira nan komo importante. Pero e echo ku nan a pidi Hesus pa kada un sinta na su banda den e Reino a mustra ku e Reino tabata real pa nan. Pues, Hesus a mira ku nan tabatin fe, i el a balorá esei. P’esei, ora nos ta wak e bon kualidatnan di nos amigunan, nos ta imitando tantu Hesus komo Yehova.

15. Ken por yuda nos pa keda amigu ku rumannan ku no tin e mesun karakter ku nos?

¹⁵ Pa bo keda amigu ku rumannan ku no tin e mesun karakter ku bo, ta masha importante pa bo pidi Yehova yudansa. Pensa delantá ki situashon por pone bo bira iritá ku un ruman i pidi Yehova yuda bo keda kalmu. Kòrda ku Yehova a krea nos i e sa ku kada un di nos ta diferente. Debí na esei, bo por tin sigur ku ora bo hasi orashon, Yehova lo duna bo presis loke bo tin mester pa dil ku e situashon. Anto ora bo sinti ku e situashon ta kabando ku bo pasenshi, pidi Yehova pa spiritu santu pa asina bo no reakshoná na un manera robes.—Lúk. 11:13; Gal. 5:​22, 23.

ORA NOS RUMANNAN TA PASA DEN SITUASHON DIFÍSIL

16. Ora nos rumannan ta malu òf tin doló emoshonal, ki reto esei por trese kuné?

¹⁶ Dikon esei ta un reto? Ora nos rumannan ta malu òf tin doló emoshonal, nan por bisa òf hasi kos ku por iritá nos òf pone nos rabia. Por ehèmpel, kisas nan ta isolá nan mes, nan ta rabia pa kos chikitu òf nan ta hasi algu ku normalmente nan lo no a hasi. Kisas nan por asta bisa òf hasi kos ku por hasi nos doló. (Yòb 6:​2, 3) Tin biaha, debí ku nos no sa kiko nos rumannan ta pasando den dje, nos por ferwagt demasiado di nan.

17. Ki bo ta siña for di e manera ku Hesus a trata Bartimeo?

¹⁷ Hesus su ehèmpel di bondat i kompashon. Hesus tabata bondadoso i tabatin kompashon pa hende ku tabata sufri, asta pa esnan ku e no tabata konosé. Por ehèmpel, wak kon el a trata Bartimeo, un hòmber siegu. Ora el a haña sa ku Hesus tabata pasando ei banda, el a kuminsá grita pa hala Hesus su atenshon. Algun hende den e multitut a bis’é pa keda ketu. Pero komo ku e tabatin asina tantu gana pa Hesus kur’é, el a kuminsá grita asta mas. Kisas e situashon ei lo a iritá algun hende den e multitut. Pero Hesus sí no a sinti asina. Beibel ta bisa ku el a haña duele di Bartimeo i tabatin gana di kur’é. (Mat. 20:34; Mar. 10:​46-52) Hesus a papia na un manera amabel ku Bartimeo i a elogi’é pa su fe. Despues Hesus a hasi un milager i a duna Bartimeo su bista bèk.

18. Kon bo tin ku trata bo amigunan ku ta pasa den tempu difísil? (1 Tesalonisensenan 5:14)

¹⁸ Kon pa keda bon amigu di otro. Ora nos ta bondadoso i kompasivo, esei lo yuda nos pa “papia palabra di konsuelo” ku nos rumannan ku ta malu òf ku tin doló emoshonal. (Lesa 1 Tesalonisensenan 5:14.) Kòrda ku un berdadero amigu semper ta kla pa yuda, anto foral “den tempu difísil.” (Pro. 17:17) Pues, un berdadero amigu no ta sinti duele so di su amigu ku ta sufriendo. E ta hasi tur loke e por pa laga su amigu sintié bon, pa anim’é i pa yud’é den maneranan práktiko.

19. Kon nos por mustra bondat i kompashon? (Wak e plachinan.)

¹⁹ Kon ta algun manera ku nos por mustra bondat i kompashon? Tin vários manera ku nos por hasi esaki. Aunke nos sa ku nos no por kita nos ruman su doló, loke sí nos por hasi ta purba di komprondé su situashon i kon e ta sintié. (Mat. 7:12; 1 Ped. 3:8) Skuch’é segun ku e ta konta bo kiko e ta pasando den dje. Anto si ta un bon momento, purba di bisa algun palabra pa konsol’é. (Pro. 12:25) Paga tinu pa bo no bula saka konklushon. (Pro. 18:13) Anto tene pasenshi kuné, asta ora e bisa òf hasi algu robes.—Efe. 4:32.

20. Ki klase di amigu abo ke ta?

²⁰ Nos tur ta disfrutá di e amistatnan ku nos tin ku nos rumannan. Pero debí ku nos ta imperfekto òf kisas a pasa den un mal eksperensia, nos tur tin biaha por bisa òf hasi algu ku por hùrt nos rumannan. P’esei nos ta keda kontentu ora nos rumannan ta humilde i ta mustra pasenshi, bondat i kompashon na nos. Pues laga nos tambe hasi esfuerso pa mustra e kualidatnan ei i asina mustra ku nos ta un bon amigu pa nos rumannan.