Kiko Por Stroba Bo di Pone Yehova na Promé Lugá?

1-2. Kon algu ku ta importante por stroba bo di enfoká riba e kosnan di mas importante?

IMAGINÁ ku bo ta koriendo outo i bo telefòn ta kuminsá rin. Kisas bo ta kuminsá puntra bo mes si ta algu urgente. Pero, bo sa ku na e momento ei ta mas importante pa bo presta atenshon na tráfiko. Asina, nos ta haña nos ku hopi situashon den bida kaminda, na e momento ei, nos tin ku disidí kiko ta e kos di mas importante pa hasi.

² Nos tur tin hopi kos importante ku nos tin ku kumpli kuné. Pero nos sa ku e kosnan di mas importante ku nos tin ku kumpli kuné ta nos aktividatnan spiritual.a (Mat. 6:33) P’esei, nos ta wak bon kiko ta e kosnan ku por stroba nos di pone Yehova na promé lugá den nos bida.—Pro. 4:25; Mat. 6:22.

3. Kiko nos lo trata den e artíkulo akí, i kon esei lo yuda nos?

³ Sin ku nos ke, nos tur ta haña nos ku kosnan ku fásilmente por distraí nos òf stroba nos. (Lúk. 21:​34-36) Pues, pa yuda nos keda enfoká riba nos sirbishi na Yehova, nos ta bai wak (1) kiko ta algun kos ku por stroba nos, (2) kon Hesus a lucha kontra e kosnan ku por a strob’é, i (3) kon nos awe por imitá Hesus.

KIKO TA ALGUN KOS KU POR STROBA NOS?

4-6. Kiko ta algun kos ku fásilmente por stroba nos di pone Yehova na promé lugá?

⁴ Nos tur tin hopi kos ku nos tin ku atendé, manera nos salú, kos ku tin di haber ku nos famia òf kos personal. Klaru ku e kosnan ei ta importante, i nos mester atendé nan. Pero e asuntunan ei por bira kos ku ta stroba nos? Sí, esei por sosodé ora nos kuminsá pensa muchu riba nan i dediká asina tantu tempu na nan ku nos no ta sobra tempu ni energia pa hasi otro kos.

⁵ Ademas, hopi di nos ta biba den área kaminda tin hopi problema polítiko, problema ekonómiko, brote di malesa i violensia. Tur esakinan ta rasgonan di e último dianan. (2 Tim. 3:1) Ora nos haña nos ku e kosnan ei, nos por bira asina anshá ku kasi nos no por pensa riba nada otro.

⁶ Kisas bo mes konosé hende ku a pasa den e problemanan ei i ku nan bida a kambia kompletamente. Ta di komprondé ku loke nan a pasa aden por laga nan sinti nan kansá emoshonalmente. Yehova no a krea hende pa nan sufri. P’esei, no ta nada straño ku e hendenan ei por sinti ku nan no ta disfrutando di bida mas. Komo resultado, nan ta purba di relahá i dibertí mas tantu posibel pa lubidá nan problemanan. Kiko si bo ripará ku bo tambe ta sinti asina? Hesus tambe por a ser distraí. P’esei laga nos wak kiko el a hasi pa pone Yehova na promé lugá.

KON HESUS A LUCHA KONTRA E KOSNAN KU POR A STROB’É?

7. Kiko por a stroba Hesus di pone Yehova na promé lugá?

⁷ Tabatin hopi kos ku por a stroba Hesus di pone Yehova na promé lugá, por ehèmpel, problema sosial i polítiko. Tempu ku e tabata riba tera, tabatin hopi hende pober i malu. (Mat. 14:14; Mar. 14:7) Ademas, e romanonan i e otro hudiunan a hasi bida di e hendenan ei difísil. Anto, ora e hendenan a mira ku Hesus por a hasi milager, nan kier a hasié nan rei. (Huan 6:​14, 15) Ademas, Satanas a purba di hinka Hesus den tentashon i a ofresé Hesus pa hasié gobernante di mundu promé ku Yehova su tempu. (Mat. 4:​8, 9) Apòstel Pedro, un di Hesus su mihó amigunan, a animá Hesus pa hasi su bida mas fásil. El a bis’é: “Sea bondadoso ku bo mes, Señor.”—Mat. 16:​21, 22.

8. Kon Hesus a lucha kontra e kosnan ku por a strob’é?

⁸ Kon Hesus a lucha kontra e kosnan ku por a strob’é? El a hasi esei den tres manera. Di promé, el a pensa manera Yehova ta pensa. (Huan 8:28; 14:9) Di dos, el a keda okupá ku aktividatnan spiritual. (Mat. 9:35) I di tres, e tabatin un punto di bista kla di loke di bèrdat tabata importante. (Huan 4:34) Na un manera firme, el a rechasá Satanas su oferta. Ademas, Hesus tabata sa ku Pedro tabatin bon intenshon, pero ku loke Pedro a bis’é no tabata Yehova su boluntat. (Mat. 4:10; 16:23) Hesus no a laga loke hende a pensa, bisa òf hasi strob’é di kumpli ku Dios su propósito. Ta bèrdat ku e kosnan ku por a stroba Hesus di pone Yehova na promé lugá no ta meskos ku e kosnan ku por stroba nos awe. Pero si nos hasi e tres kosnan ku Hesus a hasi, nos tambe por sigui pone Yehova na promé lugá.

KON NOS AWE POR IMITÁ HESUS?

9. Kiko ta enserá ‘komprondé loke Yehova ke pa bo hasi’? (Efesionan 5:17)

⁹ Siña pensa manera Yehova. Si bo hasi esei lo bo ‘komprondé loke Yehova ke pa bo hasi.’ (Lesa Efesionan 5:17.) Bo por haña sa loke ta hasi Yehova kontentu ora bo lesa su palabra i tuma tempu pa pensa riba loke bo ta lesa. Bo por logra esei asta si Beibel no ta papia spesífikamente tokante bo situashon. Kon? Dor di studia Beibel ku e meta pa komprondé kon Yehova ta pensa. I despues bo mester ta dispuesto pa apliká loke bo a siña.

10. Kon nos por haña sa kon Yehova ta pensa?

¹⁰ Pa nos por siña pensa manera Yehova ta pensa, nos tin ku studia Beibel i meditá riba e manera amoroso ku e ta trata ku hende. (Yer. 45:5) Segun ku nos ta lesa e relatonan den Beibel, nos por puntra nos mes: ‘Kiko e relato akí ta siña mi tokante Yehova? Ki kambio mi tin ku hasi pa mi por pensa manera Yehova ta pensa?’ Klaru ku su manera di pensa ta mihó ku esun di nos. (Isa. 55:9) P’esei, nos ta akudí na dje pa e siña nos kon pa hasi su boluntat. (Sal. 143:10) I ku konfiansa nos ta pidié den orashon pa yuda nos komprondé su manera di pensa i pa yuda nos imitá esaki.—1 Huan 5:14.

11. Kiko nos ta komprondé segun ku nos ta siña kon Yehova ta pensa?

¹¹ Segun ku nos ta siña kon Yehova ta pensa, nos ta komprondé ku e ke pa nos ta prepará pa ora e fin yega. P’esei, e no ke pa nos ser distraí i lubidá kiko ta realmente importante. (Mat. 24:44) E no ke pa nos preokupá demasiado. (Mat. 6:​31, 32) Pues, ora nos kuminsá preokupá demasiado ku nos salú, nos trabou, nos kas òf kualke otro asuntu personal òf di famia, Yehova ta duna nos bon konseho. Sí, ora nos pidié sabiduria i forsa pa trata ku e difikultatnan ku nos ta enfrentá, lo e duna nos esei.—Sal. 55:22; Pro. 3:​5-7.

12. Den ki manera nos por ta felis apesar di e kosnan malu ku ta tuma lugá den mundu? (Mateo 5:3)

¹² Keda okupá ku aktividatnan spiritual. Nos tur ta sinti un grado di ansiedat debí na e kosnan malu i fuera di nos kontrol ku ta tuma lugá den mundu. Pues, nos ta keda okupá ku nos aktividatnan spiritual pasobra esei ta yuda nos pa no preokupá demasiado ku e kosnan ei. Ora nos ta hasi esfuerso pa kumpli ku nos nesesidat spiritual, un nesesidat ku Yehova a krea nos kuné, nos por ta felis. (Lesa Mateo 5:3.) Pa nos por satisfasé e nesesidat ei, nos tin ku siña konosé Yehova mediante estudio di su palabra, Beibel, i hasi tur loke nos por pa ador’é. Si nos hasi esei, nos ta hasi Yehova kontentu pasobra nos ta usa nos tempu na un manera sabí.—Pro. 23:15.

13. Kon nos por “usa [nos] tempu mas mihó posibel”?

¹³ Manera Efesionan 5:15 i 16 ta bisa, nos ta determiná pa “usa [nos] tempu mas mihó posibel.” Aki, Beibel no ta djis rekomendá nos pa hasi bon uso di e tempu ku nos ta dediká na asuntunan di tur dia. Mas bien, e ta animá nos pa wak bon kon nos ta usa nos tempu promé ku e fin yega. Kon nos por usa nos tempu mas mihó posibel? Si nos ta dediká hopi tempu pa keda al dia ku tur notisia tokante e kosnan malu ku ta sosodé, esei por distraí i desanimá nos i kaba ku tur nos forsa ku nos por usa pa sirbi Yehova. Lo ta hopi bon si nos pone límite na e kantidat di notisia ku nos ta wak òf lesa. Di e manera ei, nos lo tin mas tempu i energia pa dediká na nos aktividatnan spiritual. Ta bon tambe pa nos pensa kon pa oumentá nos sirbishi kaminda por. Por ehèmpel, nos por hasi esfuerso pa hasi mas rebishita. Nos ta komprondé ku ta importante pa probechá di tur oportunidat pa yuda hende “ser salbá i haña konosementu eksakto di e bèrdat.”—1 Tim. 2:4.

14. Dikon ta bon pa nos keda okupá ku aktividatnan spiritual? (Wak e plachi.)

¹⁴ Ora nos ta keda okupá ku nos aktividatnan spiritual, esei ta yuda nos keda kòrda dikon tin tantu kos malu ta pasa na mundu. Nos no ta desesperá ora nos haña nos ku problema polítiko, problema ekonómiko i malesa, pasobra nos ta mira tur e kosnan ei komo prueba ku profesia di Beibel ta kumpliendo. Na lugá di laga miedu paralisá nos, nos tin konfiansa ku Yehova lo kumpli ku su propósito. Sí, nos por keda trankil si nos sigui konfia ku Yehova lo yuda nos perseverá.—Sal. 16:8; 112:​1, 6-8.

15. Ora nos ta “pensa kla i bon,” kon esei ta yuda nos? (1 Pedro 4:7)

¹⁵ Keda kòrda loke di bèrdat ta importante. Awe, hopi hende ta enfoká riba dibertishon i plaser; nan no ta pensa riba e fin ku ta serka. Aunke ta bon pa nos dibertí, nos mester tin sano huisio, esta, nos mester “pensa kla i bon” i no laga e punto di bista di mundu influensiá nos. (Lesa 1 Pedro 4:7.) Si nos ta “pensa kla i bon,” kon esei ta yuda nos? Esei lo yuda nos pa no dediká demasiado tempu na dibertishon i plaser. Mas bien, nos lo usa nos tempu na un manera sabí. Nos desishonnan sabí ta demostrá ku nos ta pensa manera Yehova i ku nos ta komprondé loke di bèrdat ta importante.—2 Tim. 1:7.

16. Kiko tabata mas importante pa Hesus segun ku su morto tabata aserká?

¹⁶ Hesus tabatin un punto di bista kla di loke tabata mas importante. Durante su último oranan difísil aki riba tera, e tabata determiná pa keda leal na Yehova i kumpli ku Su boluntat. P’esei, el a hasi orashon ku masha fervor. Kontrali na Hesus kende a keda alerta, su disipelnan sí a pega soño, pasobra “tristesa a laga nan keda agotá.”—Lúk. 22:​39-46; Huan 19:30.

17. Dikon hopi hende ta usa ret sosial, pero kon e por bira un distraishon? (Wak e plachi.)

¹⁷ Meskos ku e disipelnan di Hesus, tin biaha nos tambe por sinti nos kansá i tristu. Susesonan di e último dianan akí por duna nos ansiedat. P’esei, awe hopi hende ta pasa hopi tempu riba ret sosial pa purba di lubidá nan problemanan. Nan ta usa ret sosial pa komuniká ku nan famia i amigunan rònt mundu, pa kompartí potrèt, notisia i hopi mas. I tambe nan ta us’é pa entretené nan mes sin fin. Sinembargo, tin asina tantu kos nobo pa lesa i wak ku kada dia e hendenan ei ta dediká hopi tempu i energia riba Internet. Pero, pa nos por tin un punto di bista balansá di ret sosial, nos mester puntra nos mes: ‘Loke mi ta entretené mi mes kuné ta yudando mi, òf e ta strobando mi di mira loke realmente ta importante?’

18. Dikon nos mester pensa bon ora di skohe entretenimentu?

¹⁸ Nos mester tin sano huisio tambe ora nos ta wak pelíkula, serinan di televishon riba servisio di streaming, videoclip riba Internet òf hunga weganan di vidio. E aktividatnan akí por ta dushi i por yuda nos relahá. Pero, ta importante pa nos wak bon ki tipo di entretenimentu nos lo skohe i kuantu tempu nos lo dediká na dje. Hopi bes ora un vidio finalisá, mesora ta bini un otro su tras; anto esei por ta un tentashon pa sigui wak. I sin ku un hende ripará, e por kuminsá wak esenanan violento i inmoral. Esei ta loke a pasa ku un ruman na Asia. El a kuminsá ta wak e esenanan prinsipal di pelíkula riba Internet. Segun ku e tabata wak e vidionan nobo rekomendá, el a kuminsá wak esenanan inmoral sin ku el a ripará. Ku tempu, el a kuminsá wak pornografia. E bon ta, ku el a stòp di hasi esaki ku yudansa di e ansianonan i sosten di su bon amigunan. El a kita algun app i a limitá e tempu ku e tabata pasa riba su telefòn. E eksperensia di e ruman akí ta mustra bon kla dikon nos mester tin sano huisio ora nos ta skohe entretenimentu.

19. Kiko por pasa si nos dediká demasiado tempu na rekreo?

¹⁹ Nos mester pensa bon tambe ora ta trata di rekreo i fakansi. Ratu ratu nos tur mester di tempu pa deskansá di un bida drùk—esei ta yuda nos keda salú. Pero si nos enfoká muchu hopi riba rekreo, nos por bira desbalansá i esei por kita tempu for di e kosnan mas importante. (Flp. 1:10) Nos tur mester disidí ki aktividat nos ta skohe den fakansi i kuantu tempu nos ta dediká na dje. Pues, ora di tuma e desishonnan ei, puntra bo mes: ‘E tempu ku mi ta dediká na rekreo i fakansi ta demostrá ku mi tin sano huisio? Mi ta hasi sigur kiko ta e kos mas importante i asina prepará pa e fin ku ta yegando serka?’

20. Kon nos lo benefisiá si nos no laga nada distraí nos?

²⁰ Si nos no laga nada distraí nos for di nos aktividatnan spiritual, nos lo saka hopi benefisio. (Isa. 48:17) Por ehèmpel, ku yudansa di Yehova, nos lo ta mihó prepará pa trata ku nos problemanan. Nos lo no desesperá pa motibu di e kosnan ku ta pasa rònt mundu. I nos lo evitá di enfoká muchu riba rekreo. Pues, laga nos ta determiná pa sigui pensa manera Yehova, keda okupá ku aktividatnan spiritual i keda kòrda loke di bèrdat ta importante. Ora nos hasi asina, no solamente nos lo evitá di ser distraí, pero tambe nos lo “haña un gara firme riba loke realmente ta bida.”—1 Tim. 6:19.