Mehorá Bo Manera di Siña Hende

1. Kiko nos mester siña pa hasi, i dikon? (2 Timoteo 4:2) (Wak e plachi.)

HESUS a bisa su siguidónan: “Yuda [hende] bira mi disipel. . . . Siña nan kumpli ku tur e mandamentunan ku mi a duna boso.” (Mat. 28:​19, 20) Loke Hesus a manda su siguidónan hasi ta konta pa tur kristian awe. Nos tur mester hasi esfuerso pa siña otro hende. Ta bèrdat ku Yehova sa ken ta esnan ‘ku ta dispuesto pa aseptá e bèrdat.’ Ademas, e angelnan ta guia nos pa nos yega serka nan. (Echo. 13:48; Huan 6:44; Rev. 14:6) Apesar di esei, tòg, nos mester hasi nos parti pa siña hende tokante Yehova. Pensa un ratu riba e ehèmpel di Apòstel Pablo i Apòstel Bárnabas. Beibel ta bisa ku ora nan a prediká den e snoa na Ikonio, “nan a papia asina bon ku, komo resultado, un kantidat grandi di hende, tantu hudiu komo griego, a bira kreyente.” (Echo. 14:1) Pa nan por a hasi esei, nan mester a siña kon pa bira un “bon maestro.” (Lesa 2 Timoteo 4:2.) Pues, nos tur mester siña kon pa bira un bon maestro.

2. Dikon algun ruman ta sinti ku nan no por bira un bon maestro?

² Algun di nos kisas ta sinti ku nos no por bira bon maestro pasobra nos no tin muchu edukashon òf nos ta haña difísil pa splika otro hende algu. Algun hende menshoná den Beibel tambe tabata sinti asina. (Éks. 4:10; Yer. 1:6) Otro ruman ta sinti ku nan no ta bon maestro pasobra nan no ta haña e mesun bon resultadonan ku otro ruman ta haña den sirbishi. Pero nos tin ku kòrda ku no ta tur hende ku nos topa ke skucha e bon notisia, ni maske kon bon nos ta den siña otro hende. I nos tin ku kòrda tambe ku nos no ta nos so den e trabou; Yehova i e angelnan ta yuda nos pa nos haña e hendenan ku ta interesá den e bèrdat. Maske e kosnan ei ta un konsuelo pa nos, tòg nos mester hasi esfuerso pa presentá nos mensahe na un manera ku ta lanta interes di e hendenan. E artíkulo akí lo trata tres kos ku por yuda nos mehorá nos manera di siña otro hende.

MUSTRA INTERES DEN HENDE KU NOS TA SIÑA

3. Dikon hende tabata gusta skucha Hesus?

³ Beibel ta bisa ku Hesus “por a wak den kurason di hende.” (Huan 2:25) Esei ke men ku Hesus tabata sa kiko hende tabata pensa i dikon nan tabata pensa asina. P’esei, Hesus tabata sa presis kiko hende tabatin mester, i ta nèt tokante e kosnan ei Hesus tabata papia ku nan. Hesus tabata sa ku e lidernan religioso tabata hasi hende su bida difísil i ku pa e motibu ei e hendenan tabatin mester di guia i konsuelo. (Mat. 9:36; 23:4) Den Hesus su Diskurso Riba Seru, el a papia tokante vários kos ku lo a yuda nan trata ku e difikultatnan ei. Hopi hende tabata gusta skucha Hesus pasobra e tabata papia tokante kos ku tabata importante pa nan.

4. Kon nos por mustra hende ku nos ta interesá den nan? (Wak e plachinan.)

⁴ Nos por mustra hende ku nos ta topa den teritorio ku nos ta interesá den nan dor di purba di komprondé loke ta preokupá nan. Tur hende ku nos topa den sirbishi di un òf otro manera ta sufri pa motibu di e mundu malbado di Satanas. Si nos kòrda esei, e por yuda nos komprondé mas mihó kon e hendenan den nos teritorio ta sinti. Por ehèmpel, tin algu den notisia ku ta preokupá hende den nos teritorio? Mayornan ta preokupá pa futuro di nan yunan? Tin hopi hende ku no por haña trabou? Purba di imaginá kon difísil bida ta pa hende ku no tin e speransa ku Beibel ta duna.—2 Tim. 3:1; Isa. 65:​13, 14.

5. Ki diferensia tabatin entre Hesus i e fariseonan? (Mateo 11:​28-30)

⁵ Hesus tabata stima hende, i hende por a ripará esei na e manera ku e tabata trata nan. Hesus no tabata manera e fariseonan. Nan tabata pensa ku nan tabata mihó ku e pueblo i tabata trata nan malu! (Mat. 23:13; Huan 7:49) Hesus tabata trata hende ku amor i rèspèt. E tabata “un persona trankil i humilde,” i esei a yud’é ta un bon maestro. (Lesa Mateo 11:​28-30.) Meskos ku Hesus, nos tambe tin ku trata e hendenan den nos teritorio ku amor i rèspèt.

6. Kon nos por mustra amor pa hende ku no ke skucha nos mensahe òf ku ke stroba nos di prediká?

⁶ Tin hende ku no ke skucha nos òf ku asta ta zundra nos ora nos purba di prediká na nan. Kon nos mester reakshoná? Hesus no a djis bisa nos pa no trata nan malu. Pero el a bisa tambe pa nos “hasi loke ta bon pa e hendenan ku ta odia [nos],” “bendishoná e hendenan ku ta maldishoná [nos],” i pa asta “hasi orashon pa e hendenan ku ta insultá [nos].” (Lúk. 6:​27, 28) Tin biaha, ta mas fásil pa hasi esei si nos komprondé dikon nan no ke skucha nos. Ta bèrdat ku tin hende ku ke djis stroba nos trabou. Pero otro hende no ke papia ku nos pasobra nan ta hopi preokupá tokante un problema den famia òf un otro kos ku ta preokupá nan. Pues, nos no mester tuma nan na kurason. Kisas nan tabatin mal beis promé ku nos a bin. En todo kaso, semper ta bon pa sigui e konseho ku nos ta haña na Kolosensenan 4:6. E ta bisa: “Laga [nos] palabranan semper ta agradabel, manera un kuminda sasoná ku salu. E ora ei, [nos] semper lo sa kon pa kontestá kada persona.” Si nos stima hende, nos lo komprondé ku nan tin hopi kos ta preokupá nan, i esei lo yuda nos pa no sinti nos ofendí ora nan no ke papia ku nos. Ademas, nos lo hasi esfuerso pa siña nan algu ku lo yuda nan.

USA PALABRA DI DIOS ORA BO TA SIÑA HENDE

7. Kon Hesus tabata siña hende? (Huan 7:​14-16)

⁷ Beibel ta bisa ku Hesus tabata siña hende “manera un hende ku outoridat, i no manera e eskribanan.” Hesus no a siña hende su mes ideanan. Semper e tabata usa palabra di Dios pa siña hende, i e tabata mustra nan kon nan por a apliká e lèsnan ku el a siña nan. E tabata siña nan na un manera simpel i fásil pa kòrda. P’esei, ora hende tabata skucha Hesus papia, nan tabata “keda babuká.” (Mar. 1:22) E eskribanan den tempu di Hesus tabata gusta sita otro lider religioso hudiu bon konosí ora nan tabata siña hende. Pero Hesus sí nò. E tabata basa tur su siñansanan riba palabra di Dios. Kòrda ku Hesus ta Yu di Dios, i e tabata huntu ku Dios den shelu. Fásilmente e por a impreshoná e hendenan ku tur e sabiduria ku e tabatin i pone nan pensa ku nan no sa nada. Pero Hesus no a hasi esei. El a usa palabra di Dios pa siña hende kiko Dios ke pa nan hasi. (Lesa Huan 7:​14-16.) El a pone un tremendo ehèmpel pa su siguidónan.

8. Kon Apòstel Pedro a imitá Hesus?

⁸ Hesus su disipelnan tambe tabata usa palabra di Dios pa siña hende. Por ehèmpel, pensa un ratu riba e diskurso ku Apòstel Pedro a duna na Pentekòste di aña 33 D.K. Pedro no a bai e skolnan prestigioso di su tempu. Pero esei no a strob’é di yega na kurason di su oyentenan. El a usa Skritura pa mustra su oyentenan kon e profesianan tokante Hesus a kumpli. (Echo. 2:​14-37) Kiko tabata e resultado? ‘E hendenan ku di buena gana a aseptá loke Pedro a papia a ser boutisá. Riba e dia ei, mas o ménos 3.000 hende a bira disipel.’—Echo. 2:41.

9. Dikon nos mester usa palabra di Dios ora nos ta siña hende?

⁹ Ora nos usa palabra di Dios, esei ta e mihó manera pa yega na kurason di hende i yuda nan hasi kambio. (Heb. 4:12) P’esei, ta asina importante pa usa Beibel ora nos ta siña hende. Nos ke “prediká palabra di Dios,” i no nos mes ideanan. (2 Tim. 4:2) Proverbionan 2:6 ta bisa: “Yehova ta duna sabiduria; su palabranan ta yuda hende haña konosementu i perspikasia.” Pues, ora nos usa Beibel pa siña hende, ta manera nos ta laga Yehova mes papia ku nan. (Mal. 2:7) Nos ke pa hende komprondé ku e konsehonan ku Beibel ta duna ta mihó ku kualke konseho ku hende por duna nan. Komo ku Beibel ta palabra di Dios, e ta yuda nos haña sa kiko nos mester hasi pa agrad’é i pa nos ta felis.—2 Tim. 3:​16, 17.

10. Kiko nos mester hasi pa un studiante mira ku loke e ta siñando ta bini for di Beibel?

¹⁰ Segun ku bo ta prepará pa dirigí un estudio di Beibel, ta bon pa bo pensa kua teksto di Beibel bo ke bai usa pa yuda bo studiante. Plachi i vidio por yuda bo studiante komprondé e lès mihó. Pero e mester komprondé ku Beibel ta e parti mas importante di e lès. Pues, lesa e tekstonan ku por yuda bo studiante komprondé e puntonan prinsipal di e lès, i yud’é mira kiko e por siña for di e tekstonan ei. Purba di yud’é mira ki lès di Beibel e plachinan i e vidionan ta siñ’é. Esei no ke men ku bo mester papia hopi òf lesa hopi teksto. Na lugá di esei, ora bo ta lesa un teksto di Beibel, duna e studiante sufisiente tempu pa e pensa riba dje i komprondé loke e ta bisa. Tin biaha, bo mester asta lesa e teksto di nobo. Kòrda ku no ta e buki di estudio, e plachinan òf e vidionan nos ta studiando, pero ta Beibel nos ta studiando!—1 Kor. 2:13.

11-12. (a) Kon nos por tene pasenshi ku nos studiantenan? (Echonan 17:​1-4) (Wak e plachi.) (b) Kon nos por yuda hende ku no sa muchu tokante Beibel?

¹¹ Tin biaha, un studiante no ta aseptá un siñansa mesora. Ora esei pasa, nos ta sigui siña nan “ku masha pasenshi.” (2 Tim. 4:2) No ta tur hende ta progresá mes lihé. Algun studiante mester mas tempu pa komprondé sierto siñansa ku pa nos ta parse masha simpel. Ora Pablo a prediká na e hudiunan na Tesalónika, nan no a komprondé mesora loke Pablo tabata splika nan. P’esei, el a sigui bai bèk serka nan pa splika nan loke Skritura ta bisa. Ku tempu, algun di nan a komprondé loke e tabata siña nan.—Lesa Echonan 17:​1-4.

¹² Un otro manera ku nos por mustra nos studiantenan ku nos tin pasenshi ku nan ta dor di hasi nan pregunta i duna nan tempu pa kontestá. Ora nan kontestá, purba di skucha bon i komprondé dikon nan ta pensa un sierto manera. Despues, lesa i trata teksto di Beibel ku por yuda nan komprondé Yehova su manera di pensa tokante e asuntu ei. Awor pensa riba un otro punto. Tin hende ku no sa kasi nada di Beibel. Pa yuda nan, bo por bai na e sekshon “Kiko Nos Por Siña for di Palabra di Dios,” ku tin parti dilanti di e Tradukshon di Mundu Nobo. Einan, bo por mustr’é algun di e tópikonan importante ku tin den Beibel. Kisas bo por mustra nan kon e konsehonan di Beibel por yuda nan ta felis, usando algun di e tekstonan bou di pregunta 15. Pues, si bo laga bo studiantenan di Beibel mira kon nan por benefisiá di loke Beibel ta bisa, esei lo motivá nan pa apliká loke nan ta siña i duna nan gana pa siña mas.

YUDA HENDE ENFOKÁ RIBA YEHOVA

13. Ora nos siña hende tokante Beibel, riba ken nos mester enfoká? Duna un ehèmpel.

¹³ Nos meta mester ta pa yuda hende siña konosé Yehova i bira su amigu. (Sant. 4:8) Nos por kompará nos trabou ku e trabou di un persona ku ta traha ku lus na un konsierto. Durante e konsierto, e no ta pone e spotlight riba su mes. Mas bien, e ta pone e spotlight riba e hendenan riba plataforma, pasobra e ke pa hende enfoká riba esnan riba plataforma. Ora nos siña hende tokante Beibel, nos mester hasi meskos. Nos no ke pa e spotlight ta riba nos i riba kuantu kos nos sa, pero nos ke pa e spotlight ta riba Yehova.

14. Kon nos por motivá nos studiante pa hasi loke Yehova ke?

¹⁴ Ora bo ta dirigí un estudio di Beibel, bo ke yuda bo studiante pa stima Yehova. Esei lo motiv’é pa hasi loke Yehova ke. (Pro. 27:11) E meta no ta pa djis siña bo studiante kiko ta bon i malu pa e por bira un Testigu di Yehova. Pero bo ke pa bo studiante hasi kambio pa agradá Yehova. Por ehèmpel, kiko bo por hasi si bo studiante ta haña difísil pa stòp ku un mal hábito? Kisas bo por hasié e siguiente preguntanan: “Dikon Yehova ta pensa ku e hábito ei ta malu? Dikon Yehova ke pa bo stòp ku e hábito ei, aunke ku bo ta gust’é? Dikon esei ta mustra ku e ta stima bo?” Mas bo yuda bo studiante pensa tokante Yehova i su kualidatnan, mas lo e komprondé kuantu Yehova ta stim’é. Esei lo yuda bo studiante stima Yehova i motiv’é pa hasi loke Yehova ke.

KEDA MEHORÁ BO MANERA DI SIÑA HENDE

15. Kiko mas nos por hasi pa mehorá nos manera di siña hende?

¹⁵ Si nos ke mehorá e manera ku nos ta siña hende, nos por pidi Yehova pa yuda nos ku esei. (1 Huan 5:14) Despues di hasi orashon, nos mester hasi algu. Nos mester presta bon atenshon na nos reunionnan, kaminda nos ta ser entrená pa siña otro hende. Anto nos mester apliká loke nos a siña na reunion. Algu otro ku bo por hasi ta di invitá rumannan ku ta bon maestro na bo estudio di Beibel. Despues di e estudio, puntra nan kon bo por mehorá bo manera di siña hende. Algu mas ku por yuda bo mehorá ta di puntra bo mes kiko bo studiante sa i kiko e no sa. Purba di pensa di antemano kon bo studiante lo por reakshoná riba loke boso ta bai studia. Durante e estudio, yuda bo studiante mira e benefisionan di loke e ta siñando, i siñ’é tokante Yehova su bunita promesanan. Si bo hasi eseinan, bo studiante por haña gana di sera un amistat ku Yehova i esei lo hasié felis.—Sal. 1:​1-3.

16. Dikon ta bon pa nos sigui mehorá nos manera di siña hende?

¹⁶ Un di e kosnan ku ta hasi nos mas felis ta di siña hende tokante Yehova. Den paradeis nos lo sigui hasi e trabou importante akí. P’esei, laga nos sigui mehorá nos manera di siña hende. Nos por hasi esei ora nos ta mustra interes den e hendenan ku nos ta siña, ora nos ta usa e palabra di Dios i ora nos ta yuda hende enfoká riba Yehova segun ku nos ta siña nan.